Լևոն Տեր-Պետրոսյանի գլխավորած ընդդիմությունը դադարեցնում է նստացույցը ու հետաձգում հանրահավաքը

Լևոն Տեր-Պետրոսյանի գլխավորած ընդդիմությունը դադարեցնում է հուլիսի 4-ից Հյուսիսային պողոտայում մեկնարկած նստացույցը ու նաև հետաձգում սեպտեմբերի 5-ին հայտարարած հանրահավաքը։ Այս մասին քիչ առաջ ասուլիսում հատարարել է Հայ ազգային կոնգրեսի համակարգող Լևոն Զուրաբյանը։ Իր այդ որոշումը ՀԱԿ-ը պայմանավորում է՝

- վերջին շրջանում տեղի ունեցած տարածաշրջանային իրադարձություններով և դրա հետևանքով ստեղծված լարված ու նուրբ իրավիճակով,

- այն հանգամանքով, որ առաջին անգամ մեր երկիր են ժամանելու Թուրքիայի հազարավոր քաղաքացիներ (գուցե, նաև այդ երկրի նախագահը), որոնց անվտանգության հետ կապված բազմաթիվ օբյեկտիվ խնդիրներ կարող են առաջանալ,

- մտահոգված լինելով երկրի միջազգային վարկով,

- ինչպես նաև կողմնակիցը լինելով հայ–թուրքական հարաբերությունների կարգավորմանը և չցանկանալով որևէ կերպ ստվերել դրանց զարգացման հեռանկարներին նպաստող որևէ միջոցառում։

Հայտարությամբ հանդես եկած Լևոն Զուրաբյանն ասել է, որ օգոստոսի 31-ին ժ. 23.00-ից դադարեցնում են հուլիսի 4-ից շարունակվող շուրջօրյա նստացույցը, սեպտեմբերի 5-ի հանրահավաքը տեղափոխում սեպտեմբերի 12-ը։ Զուրաբյանը տեղեկացրել է նաև, որ մինչև սեպտեմբերի 12-ը Հյուսիսային պողոտայում կանցկացվեն միայն «քաղաքական զբոսանքներ»՝ ժ. 19.00-ից մինչև 22.00–ը։

Ընդդիմության ներկայացուցիչը ժողովրդին կոչ է արել չհուսալքվել, գնալ տուն, կազդուրվել և պատրաստվել սեպտեմբերի 12-ի հանրահավաքին։ Զուրաբյանը նաև կոչ է արել ակտիվ աջակցել Հայաստանի ֆուտբոլի հավաքականին ու նաև ընդգծեց, որ ընդդիմությունը մտահոգություն չունի, որ իր այս որոշումից ընդդիմությունը կհուսալքվի։