Գյումրիում սպանված տղայի հարազատները արդարադատություն են պահանջում ոստիկանությունից

Ապրիլի 26–ին հիվանդանոցում դաժան ծեծի հետևանքով այդպես էլ գիտակցության չեկած ու մահացած 17–ամյա Տիգրան Թադևոսյանի հարազատներն արդարադատություն են պահանջում ոստիկանությունից։ Այս մասին այսօր Tert.am–ի հետ հեռախոսազրույցում շեշտել է Տիգրան Թադևոսյանի հորեղբոր տղան՝ Արմանը։

Մեր խմբագրությունը նամակ–դիմում է ստացել մահացած տղայի մոր՝ Ջավահիր Սերոբյանից և տղայի հորեղբոր կնոջից՝ Անիչկա Թադևոսյանից։ Այս նամակ–դիմումը, որն ուղղված է Շիրակի մարզի Գյումրու ոստիկանության բաժանմունքի պետ, գնդապետ Շ. Շահնազարյանին, պատմում է ապրիլ ամիսին Գյումրիում տեղի ունեցած ողբերգության մասին։ Ըստ հորեղբորորդու պատմածի՝ 17 տարեկան Տիգրան Թադևոսյանը հանրահայտ «Օդնակլասնիկի» կայքում խոսել է մի աղջկա՝ Լիդայի հետ և շփման ընթացքում նրան գրել է «գնա քո....» արտահայտությունն ու չի շարունակել։ Այս գրությունից հետո ապրիլ 14-ին պարապմունքից դուրս գալուց հետո այդ աղջիկը Տիգրանին է ցույց տվել 4 տղաների՝ Սերգեյ, Սամվել, Վալերիկ և Էդգար անուններով, որոնք հարձակվել ու դաժան ծեծի են ենթարկել տղային, ինչի հետևանքով Տիգրան Թադևոսյանը մահացել է։

Դեպքի մանրամասներին չանդրադառնալով՝ նշենք, որ նամակում մահացածի հարազատները կասկածներ են հայտնում ոստիկանության աշխատանքի վերաբերյալ՝ նշելով, որ ոստիկանների արդարամտությանը կասկածելու հիմքեր ունեն ու նաև մտավախություն, թե ոստիկանությունն այս գործը կկոծկի։ Ոստիկանության պաշտոնական կայքից տեղեկանում ենք, որ դեպքի առիթով մայիսի 9–ին մեղայականով ոստիկանություն է ներկայացել Սամվել Ս–ն, որն այս պահին ձերբակալված է։

Տիգրան Թադևոսյանի հորեղբոր տղան՝ Արմանը, մեզ հետ հեռախոսազրույցում նշել է, որ իրենց մտահոգությունն այն է, որ Տիգրանին ծեծած 4 տղաներն էլ պատասխանատվության ենթարկվեն, ինչը կախված է ոստիկանության աշխատանքից։ Հակառակ դեպքում, ըստ նրա, այս դեպքը չի բացահայտվի, մինչդեռ իրենք հետամուտ են լինելու, որ բոլոր մեղավորները պատժվեն։

Արմանի խոսքով, Գյումրու ոստիկանության աշխատակիցներն իրենց ասել են, որ քննությունը նորմալ է ընթանում ու հուսադրել են, թե 3 օրվա մեջ մյուս երեքին էլ կձերբակալեն, մինչդեռ, ըստ Արմանի, ոստիկանների այդ խոստումից արդեն 6 օր է անցել։ «Գյումրիում խոսակցություններ են պտտվում, թե էդ տղաները թղթեր են սարքում, որ գնան Գյումրիից»,– նշել է Տիգրանի հարազատը։