«Սևան» ՔԿՀ-ի աշխատակիցը դատապարտյալների համար թմրամիջոցներ է ձեռք բերել

17:50 • 10.03.10

Հատուկ քննչական ծառայությունում ավարտվել է քրեակատարողական հիմնարկի աշխատակցի կողմից իրացման նպատակով ապօրինի թմրամիջոց ձեռք բերելու և պաշտոնեական լիազորությունները չարաշահելու դեպքի առթիվ հարուցված քրեական գործի նախաքննությունը: Քրեական գործի նախաքննության օրինականության նկատմամբ հսկողություն իրականացնող դատախազը հաստատել է մեղադրական եզակացությունը:

Նախաքննությամբ պարզվել է, որ ՀՀ արդարադատության նախարարության «Սևան» քրեակատարողական հիմնարկի սոցիալական հոգեբանական և իրավական ապահովման բաժնի առաջատար մասնագետ Արթուր Առաքելյանը համաձայնության է եկել դատապարտյալների հետ և պատրաստակամություն հայտնել իրացնելու նպատակով հիմնարկից դուրս ձեռք բերել թմրամիջոցներ:
2009թ. դեկտեմբերի 13-ին Երևանի Վարդանանց փողոցում Առաքելյանին դատապարտյալերից մեկի անչափահաս որդու միջոցով փոխանցվել է խոշոր չափերի հասնող 0.04 գրամ բուպրենորֆին տեսակի թմրամիջոց:
Այնուհետեւ 22:00-ի սահմաններում Վարդանանց փողոցում գտնվող «Արևիկ» խանութի դիմաց Առաքելյանը հանդիպել է նաև մեկ այլ դատապարտյալի քենու որդու` Ֆիլիպ Համզոյանի հետ և նրանից ապօրինի ձեռք է բերել և պահել 2.71 գրամ ափիոն տեսակի թմրամիջոց, ինչպես նաև պրեկուրսոր հանդիսացող 3.8 մլ. քացախաթթվի անհիդրիդ:

Հաջորդ օրը ` 2009թ. դեկտեմբերի 14-ին, ապօրինի ձեռք բերված թմրամիջոցները Առաքելյանն իրացնելու նպատակով փորձել է փոխադրել «Սևան» ՔԿՀ-ի տարածք: Սակայն քրեակատարողական վարչության օպերատիվ հետախուզական բաժնի աշխատակիցները նրա մոտից հայտնաբերել և առգրավել են հիշյալ թմրամիջոցների ողջ ծավալը:
Ձեռք բերված ապացույցների հիման վրա` մեղադրանքներ են առաջադրվել Առաքելյանի, երկու դատապարտյալի, Ֆ. Համզոյանի նկատմամբ:

Tert.am