«Միլանո» խանութի գույքը դուրս բերեցին հարկադրաբար՝ առանց փոխհատուցում վճարելու

16:56 • 10.03.10

Այսօր հարկադիր ծառայության աշխատակիցները մտել են Աբովյան փողոցի վրա գտնվող «Միլանո» հագուստի և կոշիկի խանութ-սրահ և այնտեղից, առանց համապատասխան որոշում ներկայացնելու, հարկադրաբար դուրս հանել խանութի գույքը: Նշենք, որ «Միլանո» խանութը պատկանում է «Օլիմպ» արտադրական կոոպերատիվին, որի սեփականատերն է Հովհաննես Ղուկասյանը: Խանութը եռահարկ է, տարածքը բաղկացած է երկու հատվածից՝ «Միլանո» խանութի տարածքը և պահեստային տարածքը, որի մասով արդեն երկու տարի է, ինչ վտարման վճիռը օրինական ուժ է ստացել:

Մեզ հետ զրույցում Հովհաննես Ղուկասյանի փաստաբան Տիգրան Հայրապետյանն ասաց, որ Հովհաննես Ղուկասյանը բազմաթիվ անգամ դիմել է դատարան և «Ավո ՖՄ» ՍՊԸ-ին, որը նշված տարածքի ձեռքբերողն է` պահանջելով, որպեսզի այդ գումարը փոխանցեն Հովհաննես Ղուկասյանի հաշվին, որպեսզի նա կարողանա համարժեք տարածք գնել և գույքը տեղափոխել։

««Ավո ՖՄ» ՍՊԸ-ից հրաժարվել են պայմանագիր կնքել: Հրաժարվել են, որովհետև Կադաստրի պետական կոմիտեում ասել են, որ հողի հետ կապված խնդիր կա, և պայմանագրի մեջ ինչ-որ առումով պետք է հողի կարգավիճակը որոշված լինի, այսինքն՝ հողը նույնպես պետք է տրամադրվեր «Ավո ՖՄ» ՍՊԸ-ին, բայց հողի նկատմամբ փոխհատուցում չի տրվել: Հիմա, այս նկատառումներից ելնելով, «Ավո ՖՄ» ՍՊԸ-ին շահեկան չի պայմանագիր կնքել, բացի այդ «Միլանո» խանութի մասով դատարանի որոշման մեջ նշված է, որ պետք է վտարում իրականացվի միայն մի հարկից՝ 125 քմ տարածքից, իսկ 2-րդ և 3-րդ հարկի հետ կապված որևէ նշում չկա: Բացի այդ, պայմանագիր պետք է կնքվի 125 քմ–ի համար»,- նշեց փաստաբանը և հավելեց, որ «Ավո ՖՄ» ՍՊԸ-ի աշխատակիցները` լավ հասկանալով, որ պայմանագիր կնքելը տանում է փակուղի, դիմել էին հարկադիր կատարման ծառայությանը, հետ էին վերցրել կատարողական թերթը, կատարողական վարույթն ավարտվել էր:

«Մինչև այսօր այդպես գիտեինք, որովհետև մենք ստացել էին կատարողական վարույթի ավարտման որոշումը: Երեկ երեկոյան որոշում ենք ստացել, որտեղ նշված էր, որ այսօր առավոտյան պետք է վտարման գործողություններ իրականացվեն»,– ասաց փաստաբանը՝ նշելով, որ հարկադիր կատարողների խոսքով՝ կատարողական վարույթը վերսկսվել է, և այդ մասին որոշման իրազեկումն իրենց ուղարկվել է փոստով մարտի 3-ին, մինչդեռ իրենք այդ որոշումը չեն ստացել: Խանութի սեփականատիրոջը տարածքն ազատելու համար 7-8 ժամ են տվել՝ գիշերվա ժամը 11-ից մինչև առավոտյան ժամը 8-ը։ Փաստաբանի խոսքով՝ վտարումն իրականացվում է առանց փոխհատուցման գումարը վճարելու։

«Ի՞նչ է լինելու մեր հետագա ճակատագիրը` ոչ մեկին չի հետաքրքրում, գցում են դատարանի վրա, դատավորի վրա, այսպես իրար վրա գցելով՝ մենք հայտնվել ենք ինչ-որ իրավիճակում, որտեղ չգիտենք՝ ինչ անել, ում դիմել, որտեղ է օրենքը, որտեղ պիտի պաշտպանության հանգրվան գտնենք»,- Tert.am–ի թղթակցին ասաց «Օլիմպ» կոոպերատիվի փոխտնօրեն Նելլի Ղուկասյանը։

Ի դեպ, գույքի դուրսբերմանը ներկա էին նաև ՀՀ մարդու իրավունքների պաշտպանի գրասենյակի արագ արձագանքման խմբի աշխատակիցները: Այս մասով Տիգրան Հայրապետյանն ասաց, որ Մարդու իրավունքների պաշտպանի արագ արձագանքման խումբը բացահայտ խախտումներ է արձանագրել. «Առաջարկվեց, որ նախ պայմանագիր կնքեք, հետո փողը փոխանցեք, հետո ժամանակ տրամադրեք, բայց ապարդյուն։ Մարդու իրավունքներիի պաշտպանի արագ արձագանքող խումբը այս պահին անզոր է ՀՀ-ում ինչ-որ հարց լուծել»,- նշեց Տիգրան Հայրապետյանը:

«Միլանո» խանութը իրացնող կազմակերպությունը գնահատել է շուկայականից ցածր գներով` 204 մլն դրամ: Իսկ Հովհաննես Ղուկասյանն ասում է, որ դա իրական շուկայական արժեքի 20-25 տոկոսն է միայն:

Մեր այն հարցին, թե ինչ են պատրաստվում անել, Հովհաննես Ղուկասյանն ասաց, որ իրենք այլևս հույս չունեն տեղական դատական ատյաններից, ուստի պատրաստվում են դիմել Եվրոպական դատարան:

Tert.am