Մանկական ուռուցքաբանության կենտրոն ստեղծելու մասին Առողջապահության նախարարության կողմից մի քանի ամիս առաջ արված պաշտոնական հայտարարությունից այս կողմ ոչ մի քայլ չի արվել: Այս մասին Tert.am-ի հետ զրույցում ասաց մանկական ուռուցքաբան Գրիգոր Բադալյանը և նշեց, որ շատ երկրներում հասկացել են, որ, քանի որ այս հիվանությունը հազվադեպ հանդիպող է, ապա մի շարք կենտրոններում դժվար է ունենալ տարբեր սարքավորումներ և ավելի լավ է կենտրոնացնել բուժումը: «Նույնը մեզ էլ է շատ-շատ հարկավոր, ինչի մասին հայտարարվեց, բայց ժամանակներն անցնում են, և ես տեսնում եմ, որ ոչ մի քայլ արված չի: Եթե դա չստեղծվի և մենք չունենանք փոխպատվաստում, չունենանք ինտենսիվ թերապիա, չունենանանք նոր սարքավորումներ, ցավոք բուժումը շատ կտուժի»,-ասաց մասնագետը և հավելեց, որ արդեն իսկ բացասական ազդեցությունը նկատելի է:

Ըստ բժշկի՝ Հայաստանում տարեկան 80-85 երեխա հիվանդանում է քաղցկեղով, իսկ եթե զարգացած երկրներում երեխաների մոտ 80%-ն է լիարժեք հաղթահարում է այս հիվանդությունը, ապա Հայաստանում միայն 65 %-ին է հաջողվում վերջնական բուժում ապահովել:

«Պատճառները շատ են. առաջին հերթին լավ մասնագետների պակասն է, երկրորդ հերթին՝ լավ ախտորոշում ունենալու համար անհրաժետ սարքավորումները: Մենք տարեցտարի հետ ենք ընկնում, քանի որ տեխնոլոգիաները շատ արագ են զարգանում: Եթե մի քանի տարի հետո մենք չունենանք նորագույն տեխնոլոգիաներ, բուժվող երեխաների թիվը կիջնի, քանի որ քաղցկեղը շատ ագրեսիվ է, իսկ մենք չունենք բուժման համար կարևոր միջոցներ»,- ահազանգեց մասնագետը:

Լավագույն սարքավորումներով արտասահմանում բուժում ստանալու համար անհրաժեշտ գումարը Գրիգոր Բադալյանի խոսքով՝ բավական թանկ է. «Մանկական ուռուցքաբանությունը համարվում է ամենաթանկ ոլորտներից մեկը, որովհետև աշխարում մոտեցումն այսպես է՝ ինչ-լավ բան կա, տրվում է երեխաներին, նոր, թանկարժեք դեղորայք, նոր, թանկարժեք տեխնիկա, ամեն ինչ»,- նշեց նա և ավելացրեց, որ արտասահմանում օրինակ լիմֆոգրիան՝ ավշային հանգույցների հիվանդության բուժումը, որը տևում է մոտ 8 ամիս, արժե մոտ 100-120 հազ եվրո:

Քաղցկեղի առաջացման պատճառերն ըստ բժշկի՝ դեռևս մեծամասամբ անհայտ են, և եթե մեծահասակների և երեխաների մոտ առաջացած քաղցկեղը տարբեր է և՛ ձևերով, և՛ բուժման արդյունքներով, ապա երեխաների դեպքում հիմնականում այն պարզված չէ: «Մեծահասակների մոտ հիվանդության առաջացման պատճառներից մի քանիսը հայտնի են, ինչպես օրինակ՝ քաղցկեղածին նյութերը ծխախոտի, սննդի մեջ, նաև նախաքաղցկեղային խորը հիվանդությունները՝ կանաց մոտ մաստոպատիան, կամ էռոզիաները, տղամարդկանց մոտ ստամոքսի խոցն է կամ այլն: Երեխաների մոտ ոչ մի գործոն չի աշխատում, որովհետև այդ իմ նշածները տարիներ են պետք, որ առաջանան քաղցկեղ: Երեխաների մոտ ամեն ինչ կատարվում է արագ»,-ասաց նա:

Դրանով հանդերձ, նա մի քանի բացատրություն տվեց, ըստ որոնց, հիվանդության առաջացման պատճառ կարող է հանդիսանալ հղի կինը: «Նա պետք է առողջ կյանքով ապրի՝ չծխի, չխմի և այլն, վաղը չէ մյուս օրը այդ նույն քաղցկեղածին նյութերը չանցնեն պտղին»,-ասաց նա:

Բժիշկը հիշեցնում է, որ սնունդը, շրջակա միջավայրը և ամենից շատը ծխելը մեծ նշանակություն ունեն. «Չնայած երկու օր առաջ խոսեցին, թե նվազելէ ծխողների թիվը ես դրան համամիտ չեմ: Շատ-շատ են ծխում և երեխաների կողքը և երիտասարդ մայրերի մոտ»:

Ժառանգուականության գործոնը նա շատ քիչ համարեց: Ըստ նրա, եթե մեծերի մոտ ավելի հաճախ է այն հանդիպում, ինչպես օրինակ՝ կրծքի կամ ստամոքսի քաղցկեղն է, ապա երեխաների քաղցկեղի դեպքում ժառանգականությունը հազվադեպ է նկատվում: «Միայն մեկ քաղցկեղ կա՝ աչքի ուռուցքը, դա է ժառանգական փոխանցվում»,- ասաց նա:

Ընդհանուր առմամբ Հայաստանում ընթացիկ բուժվող երեխաների թիվը 300-400-ն է, որոնց նկատմամբ ըստ մասնագետի, պետության կողմից առանձնահատուկ վերաբերմունք չկա:
««Նվիրիր կյանք» կազմակերպությունը, որը ղեկավարում է առաջին տիկինը, շատ բան է անում, դեղեր է հատկացնում, ինչը շատ լավ գործ է և կարևոր, բայց այդ ամենով հարցը չի լուծում, դա ժամանակավոր է: Դեղը ստացավ, կամ գնաց Մոսկվա, դրանով հարցը չլուծվեց»,-ավելացրեց նա: