Լուսանկարը՝ Aravot.am-ի

ՀՀ Ազգային անվտանգության ծառայության հատուկ քննչական վարչության կողմից տարածած հայտարարության համաձայն ՀՀ նախկին արտգործնախարար, «Բարգավաճ Հայաստան» կուսակցության անդամ, «Սիվիլիթաս» հիմնադրամի հիմնադիր Վարդան Օսկանյանի դեմ հարուցվել է քրեական գործ՝ ՀՀ Քրեական օրենսգրքի 190-րդ հոդվածի 3-րդ մասի 1-ին կետով, այն է «հանցավոր ճանապարհով ստացված եկամուտներն օրինականացնելը»՝ փողերի լվացում: Տեղեկացնենք, որ սույն հոդվածով նախատեսվում է ազատազրկում 6-12 տարի ժամկետով:

Ի դեպ, որպեսզի պարզ լինի, թե ինչ բնույթի հանցագործության մասին է խոսքը, ներկայացնենք ՀՀ քր.օրենսգրքի համապատասխան հոդվածը.

«Հանցավոր ճանապարհով ստացված գույքի փոխարկումը (կոնվերտացումը) կամ փոխանցումը (եթե հայտնի է, որ այդ գույքն ստացվել է հանցավոր գործունեության արդյունքում), որը նպատակ է ունեցել թաքցնել կամ խեղաթյուրել այդ գույքի հանցավոր ծագումը կամ օժանդակել որևէ անձի, որպեսզի նա խուսափի իր կատարած հանցանքի համար պատասխանատվությունից, կամ գույքի իրական բնույթը, ծագման աղբյուրը, գտնվելու վայրը, տնօրինման եղանակը, տեղաշարժը, իրավունքները կամ պատկանելիությունը թաքցնելը կամ խեղաթյուրելը (եթե հայտնի է, որ այդ գույքն ստացվել է հանցավոր գործունեության արդյունքում) կամ գույք ձեռք բերելը կամ տիրապետելը կամ օգտագործելը կամ տնօրինելը (եթե այդ գույքի ստացման պահին հայտնի էր, որ այն ստացվել է հանցավոր գործունեության արդյունքում)` և նախատեսված արարքը, որը կատարվել է` առանձնապես խոշոր չափերով, պատժվում է ազատազրկմամբ` վեցից տասներկու տարի ժամկետով` սույն օրենսգրքի 55-րդ հոդվածի չորրորդ մասով նախատեսված գույքի բռնագրավմամբ»:

ՀՀ ԱԱԾ հաղորդագրությունից տեղեկանում ենք նաև, որ այս պահին «Սիվիլիթաս» հիմնադրամում տեղի են ունենում հարկային ստուգումներ, ինչպես նաև իրականացվում է նախաքննություն և գործի հանգամանքների բազմակողմանի բացահայտմանը նպաստող միջոցառումներ:

Tert.am-ի հետ զրույցում, անդրադառնալով սույն քր. գործին, Կենտրոն և Նորք-Մարաշ համայնքների առաջին ատյանի նախկին դատավոր Պարգև Օհանյանն ասաց, որ Հայաստանում ամեն ինչ հնարավոր է և՛ տեսականորեն, և՛ գործնականորեն, որպեսզի կարողանան անել այն՝ ինչ ցանկանում են:

«Պետք է ասեմ, նախ ինչպե՞ս է պատահում, որ հենց այս ժամանակ է տեղի ունենում այդ ամենը: Չցանկանալով խախտել անմեղության կանխավարկածը, պետք է ասեմ, որ եթե որոշել են մի բան անել, ապա կանեն»,-նկատեց Պարգև Օհանյանը:


Տեղեկացնենք, որ այսօր ՀՀ ԱԺ պատգամավոր Վարդան Օսկանյանը հարցազրույց է տվել «Երկիր Մեդիա» հեռուստաընկերությանը, որտեղ նշել է, որ հնարավոր է ինքը օգտագործի իր սահմանադրական իրավունքը և չներկայանա քննչական մարմիններին:

Պետք է նշենք նաև, որ որևէ անձի հանդեպ քր. գործ դեռ հարուցված չէ, առայժմ շարունակվում է նախաքննությունը:
Հիշեցնենք, որ ՀՀ սահմանադրության 66-րդ հոդվածի համաձայն, պատգամավորին չի կարելի որպես մեղադրյալ ներգրավել, կալանավորել կամ նրա նկատմամբ դատական կարգով վարչական պատասխանատվության ենթարկելու հարց հարուցել՝ առանց Ազգային ժողովի համաձայնության: