Էներգետիկայի և բնական պաշարների նախարարությունը տեղեկացված է այն մասին, որ Արաքս գետի հունը փոփոխությունների է ենթարկվում և այդ իսկ պատճառով դադարեցրել է Արաքսի ավազանից ավազի արդյունահանման համար նոր արտոնագրերի տրամադրումը:

Էներգետիկայի և բնական պաշարների նախարարության մամուլի քարտուղար Լուսինե Հարությունյանը Tert.am-ին փոխանցեց Էներգետիկայի և բնական պաշարների նախարար Արմեն Մովսիսյանի պատասխանը մեր այն հարցին, թե հաշվի առնելով Արաքսի ափին ստեղծված իրավիճակը, նախարարությունը չի՞ պատրաստվում ավազահանքերի շահագործման լիցենզիայից զրկել արդյունահանում իրականացնող ընկերություններին:

«Այս հարցում սահմանափակում է մտցված: Իսկ արդեն լիզենզիա ստացած ընկերություններից իրավունք ունեն ավազ արդյունահանել միայն նրանք, որոնք իրենց հատկացված տարածքներում «Հիդրոնախագիծ» ինտիտուտի կողմից տրված նախագծերով կառուցել են ափապաշտպան ինժեներական կառույցներ, որոնք կանխում են գետի հունի փոփոխությունը»,-հայտնեց նախարարության մամուլի խոսնակը:

Հիշեցնենք, որ «Հայ ազգային կոնգրես»-ի անդամ, Սոցիալ դեմոկրատ-հնչակյան կուսակցության անդամ Գուրգեն Եղիազարյանն հինգշաբթի օրը «Ժողովուրդ» օրաթերթի թղթակցին հայտնել էր, որ Թուրքիայի հետ սահմանին, Արաքս գետը փոխել է հունը՝ այստեղ շահագործվող ավազահանքերի պատճառով:

Tert.am-ի հետ զրույցում Գուրգեն Եղիազարյանը հավելեց, որ նշված փոփոխությունները Արմավիրից` Արարատ ողջ երկայնքով են կատարվում, փաստորեն, Հայաստանի տարածքային ամբողջականության հաշվին: Այսինքն՝ Գուրգեն Եղիազարյանի նկարագրությամբ, ավազի հանքավայրերի շահագործման հետևանքով առաջացել են դատարկ տարածություններ՝ փոսեր, որտեղ և գետի ջուրն այդտեղ լցվելով, լայնացնում է իր հունը՝ Հայաստանի հաշվին:

Բնապահպանական «Էկո» դաշինքի անդամ, գեոֆիզիկոս Մանե Հակոբյանը ևս տեղյակ է խնդրին և Tert.am-ի հետ զրույցում ասաց, որ սա նորություն չէ: Երեք տարի առաջ բնապահպանները եղել են Արաքսի ափին և արձանագրել գետի հունի փոփոխությունը: Ըստ Մանե Հակոբյանի, խոսքը տասնյակ մետրերի մասին է: Բնապահպաններն այն ժամանակ մամուլի ասուլիս էին հրավիրել, ինչին արձագանքել էր ՀՀ կառավարությունը, և Մանե Հակոբյանը եզրակացրել էր, որ հարցին լուծում է տրված:

Նախարարության մամուլի քարտուղար Լուսինե Հարությունյանը հայտարարեց, որ նախարարությունը վերահսկում է իրավիճակը, կառավարությունն այս հարցով ընդունել է մի շարք որոշումներ, Արաքս գետի խնդրով միջգերատեսչական հանձնաժողով է ստեղծվել, որը նաև գործնական լուծումներ է գտնում և առաջարկում:

Նշենք, որ էներգետիկայի և բնական պաշարների նախարարության պաշտոնական կայքում՝ «Ընդերքի շահագործում» բաժնում զետեղված տեղեկանքի համաձայն, նշված հատվածում՝ Արարատի և Արմավիրի մարզերում, այս պահին ավազահանքերի և ավազակրաքարային խճի (ԱԿԽ) շահագործման լիցենզիաներ են տրամադրված մոտ երկու տասնյակ ընկերությունների: Դրանք են՝ Արարատում «Շեն կոնցեռն» ՓԲԸ-ն, «Մեդիս-Շին», «ԱրևՍյուզի» ՍՊԸ-ները (Մեդիսի ավազ, Լուսառատի ավազ), «Վզգո» ՍՊԸ-ները և այլն:

Նշենք, որ Արարատի մարզից արդյունահանվող ավազը համարվում է ամենաորակյալը: