Eurasia Review-ն Ռուսաստանում քաղաքացիական միջուկային էներգիտիկայի վիճակը գնահատելով՝ ահազանգում է, որ «մոլորակը պետք է դողա և նոր աղետի պատրաստվի», քանի որ այդ երկրում «ռադիոակտիվ թափոնավայրերը լցված են՝ պայթելու աստիճան, իսկ շատ ռեակտորներ այնքան հնացած են, որ չեն համապատասխանում անվտանգության նույնիսկ ամենահիմնական չափանիշներին»:

Ներկայում Ռուսաստանի տարածքում 10 ատոմակայան և 32 միջուկային միավորում է գործում: Փորձագետը հատկապես վտանգավոր է գնահատում սրանց աշխատանքի հետևանքով գոյացած պլուտոնիումի 175 տոննա թափոնը: Իսկ առհասարակ Ռուսատանում է գտնվում աշխարհի միջուկային թափոնների գրեթե կեսը: Թափոնավորման վայրերում տեղ կա ընդամենը առաջիկա 5-8 տարիների համար:

Հոդվածագիրը նշում է, որ ի տարբերություն քաղաքական շրջանակների, գիտական շրջանակները վաղուց մտահոգ են այս հարցով և առաջարկում են չերկարաձգել այնպիսի հին միջուկային միավորների գործունեությունը, ինչպիսիք են Նովովորոնեժի ատոմակայանի 3 և 4, Կոլսկիի ատոմակայանի 1 և 2 բլոկները: Չափազանց հին են նաև 11 միջուկային միավոր շահագործող Սանկտ Պետերբուրգի և Կուրսկի ատոմակայանները:

Ըստ հոդվածագրի՝ այն, որ ռուսական ատոմակայաններից ոչ մեկը անվտանգության ժամանակակից ստանդարտներին չի համապատասխանում ևս մեկ Չեռնոբիլ է խոստանում առաջիկայում:

Իսկ Չեռնոբիլի հետևանքների վերացումը մինչ օրս՝ 25 տարվա ընթացքում 700 մլրդ դոլար է արժեցել դրանից տուժած երկրներին: Ուկրաինան մինչ օրս իր բյուջեի 5 տոկոսը տրամադրում է Չեռնոբիլի հետևանքների վերացմանը: Նույն կտրվածքով՝ Բելառուսը՝ 10, իսկ Ռուսաստանը՝ 0,5-1 %-ը:

Ամբողջ աշխարհում այսօր 60 նոր ատոմակայան է կառուցվում՝ ոչ թե այն գործոնի կարևորումով, որ միջուկային էներգիան ամենավտանգավորն է, այլ այն, որ այն ամենաէժանն է մնում, նշում է հոդվածագիրը: Իսկ Ռուսաստանի պարագայում՝ ավելացնում, որ «Ռոսատոմը» նաև «սուպեր մաֆիա» է, ինչպես դեռ 2002-ին Boston Globe-ին հաղորդել էր ռուսաստանցի մի գիտնական: Այս համատեքստում հոդվածագիրը ներկայացնում է, թե ինչպես 2005-ին Շվեյցարիայում ձերբակալվեց «Ռոսատոմի» ղեկավար Եվգենի Ադամովը՝ Ռուսաստանի միջուկային անվտանգության համար ԱՄՆ-ի տրամադրած 9 մլն դոլարի անհետացումից հետո:

1991-ից ԱՄՆ-ը միլիարդավոր դոլարներ է տրամադրել Ռուսաստանում միջուկային անվտանգությունը բարձրացնելու համար: 2002-ին Ռուսաստանը հայտարարել է, որ ամերիկյան օգնությունից 270 մլն դոլար անհետացել է: Գիտահետազոտական աշխատանքների համար հատկացված տասնյակ միլիոնավոր դոլարների ճակատագիրն էլ անհայտ է մնում: Այս բոլոր գործոնների ու վտանգների համադրմամբ Eurasia Review-ն Ռուսաստանը «շատ առումներով հետխորհրդային թերի միջուկային տերություն» է որակում: