Եթե մի քանի տարի առաջ հեռուստաեթերը մաքրելու պահանջմունքը մեծ էր, ապա այսօր այն բավական կրճատված է, այսօր լրագրողների հետ հանդիպմանը նման տեսակետ հայտնեց հոգեբան Կարինե Նալչաջյանը՝ անդրադառնալով հասարակության վրա հեռուստասերիալների ազդեցության հարցին, որը վերջերս հաճախակի է քննարկվում։

«Հասարակության ինչ-որ շերտեր կարող են մեզ ասել, որ դա մեզ դուր է գալիս, մենք ուզում ենք նայել և դուք մեզ մի ասեք՝ ինչ նայենք, ինչ՝ ոչ: Սա վկայում է այն մասին, որ պրոցեսը, որ սերիալները իրենց արդյունքը տվել են»,– ասաց նա:

«Այս սերիալային թյուրիմացությունը սկսեց օտար սերիալների ներմուծումով, որից հետո ստեղծեցինք մերը՝ ցածրորակ»,- նկատեց նա և ավելացրեց, որ ինքը սերիալներին դեմ չէ, սակայն եթե լինի լուրջ մշակութային մոտեցում հասարակության զարգացման վրա նույնիսկ դրական ազդեցություն դրանք կարող են ունենալ:

Տիկին Նալչաջյանը նշեց, որ զանգվածային լրատվությունը մեծ ազդեցություն է ունենում հասարակության վրա և պատահական չէ, որ կոչվում է (չորրորդ) իշխանություն:

«Մի կողմից դա ազդում է դեռևս ձևավորվող մարդու վրա՝ նրա ճաշակն ու մտածողությունն է ձևավորում, բայց նաև ազդեցություն ունի մեծահասակների վրա: Սերիալ ստեղծողների ու դրանից օգուտ քաղողների համար հարմար է այն կարծիքը ասել, թե դրանք իրական կյանքն են ցույց տալիս: Բայց բոլորս էլ աչք ու ականջ ունենք ու տեսնում ենք, որ ամեն ինչ այդքան էլ կորած չէ»,- ասաց նա:

Հոգեբանը բացասական համարեց հատկապես այն, որ սերիալներում քրեական կերպարին շատ դրական ֆոնի վրա են պատկերում:

«Երեխան որը նայում է այդ սերիալը տեսնում է, որ այդ քրեական մարդու կողքը ամեն ինչ շատ գեղեցիկ է ու հաճելի: Իսկ այն, ով ավելի գրագետ է ու բանիմաց հաճախ հիմարի կերպար են տալիս ու երեխան չի էլ ցանկանա գիրք վերցնել ձեռքը»,– բացատրեց նա:

«Շատ վատ է, որ պրոպագանդում են այն, որ բռի ուժով ու զոռբայությամբ մարդ կարող է հասնել իր նպատակին»,- ասաց հոգեբանը և ավելացրեց, որ այսօր հեռուստասերիալներում ծիծաղելի են դարձնում այն կերպարներին, որոնք բարի են ու ազնիվ՝ նրանց հաղորդելով կյանքից ոչինչ չհասկացող մարդիկ։

Հոգեբանն առաջարկեց ոչ թե հրաժարվել սերիալներից, ինչը նա անհնար է համարում, այլ ունենալ մշակութային պետական քաղաքականություն և դրանք ստեղծել այդ նորմերին համապատասխան: