«Ֆեյսբուք» սոցիալական ցանցում բացվել է «Ամոթ «Արմավիային» և Սփյուռքի նախարարությանը» անվանումով խումբ, որի ստեղծման նպատակը, ըստ խմբում զետեղված տեղեկատվության, քննարկել ու մշակել գործողություններ, թե ինչպե՞ս կարելի է օգնել Սփյուռքում բնակվող հայերին։

«Ֆեյսբուքյան» օգտատեր Հովիկ Աթոքյանը Հայաստանից պահանջվող գործողությունները ձևակերպել և ներկայացրել է այսպես. ««Արմավիան» պետք է վերանայի տոմսի գները, կազմվի Սիրիայից եկածների տեղավորման կոմիտե, որը պետք է զբաղվի նրանց տեղավորման հարցերով, սիրիահայերին պետք է աջակցություն տրվի առանց բյուրոկրատական քաշքշուկի՝ բնակարաններ գնելու հարցում, ցանկացողներին օգնել բնակություն հաստատել Արցախում, և վերջապես «հեշտացնել հայկական քաղաքացիություն ստանալու գործընթացը, նախ կրճատելով սպասման 6 ամիս ժամկետը»:

 
Հիշեցնենք, որ օրերս հրավիրված մամուլի ասուլիսում սփյուռքահայերը տեղեկացրել են, որ «Արմավիան»` պայմանավորված ժամանակով, թե երբ է գնվում տոմսը՝ Երևան –Հալեպ, Հալեպ-Երևան ուղղությամբ, մեկ տոմսը վաճառում է 460 ԱՄՆ դոլարով, իսկ մեկ ուղղությամբ՝ 380 դոլարով: Տեղեկություններ կային նաև այն մասին, որ կախված ժամանակից, տոմսի գինը կարող է հասնել մինչև 700 դոլարի:

Tert.am-ի հարցին ի պատասխան, այսօր «Արմավիա»-ից հայտնեցին, որ վերջին մեկ ամսվա ընթացքում Երևան-Հալեպ տոմսերը վաճառվել են՝ միջինը 135 000 դրամով (մոտ 326 դոլար):

 
Խմբի կողմից ներկայացվող գործնական առաջարկներից բացի, նաև գրվում են «ստատուսներ», թե ինչ են մտածում սփյուռքահայերն ու հայաստանցիները կառավարության, Սփյուռքի և Արտաքին գործերի նախարարությունների կողմից վարվող ներքին ու արտաքին քաղաքականության, ինչպես նաև «Արմավիայի» սեփականատեր Միխայիլ Բաղդասարովի մասին:

Հիմնական հարցադրումն այն է, թե Հայաստանում Սփյուռքին դնում են «կթու կովի տեղ». «Ամո՜թ, հազար ամոթ, մեր Հայաստանի նախարարության, … ամեն տարի թելեթոնին այ գումարը, որ հավաքվի, որտեղե՞ն է:… »Արի դեպի տունը» մնում են միայն խոսքեր, ոչ իրականություն: Երբ հարկ եղավ սիրիահայերուն օգնելու կամ թև-թիկունք կանգնելու օդանավ մը նույնիսկ չեն կրնար ապահովել, որպեսզի հայրենիքը երթան… Հայաստանը պետք է ընդունի իր զավակներին ձեռքերը բաց»,-գրել է Ռոզալի Քեոսջերյան-Ջահուկջյանը:

«Ֆեյսբուքյան» խմբի անդամներից շատերը «լայք են» (հավանել են) տվել հրապարակախոս Տիգրան Պասկևիչյանի՝ «Պարզվում է Սփյուռքը ընդամենը կթու կով է» վերտառությամբ, հոդվածին, որին նախաբան են ընտրված հետևյալ տողերը.«Երկիր, ես քոնն եմ, բայց իմը չես դու։ Ես քո զինվորն եմ, դու՝ իմ թշնամին»:

«Մեզ համար, պարզվում է, Սփյուռքն, ընդամենը, կթու կով է, որին կարելի է անդադար կթել, իսկ հետո` որպես գայլերին կեր, թողնել ամայի դաշտում և հեռվից դիտել, թե ինչպե՞ս են հոշոտվում: Իրոք, անհասկանալի բաներ են կատարվում մեր երկրում»,- գրել է Տիգրան Պասկեևիչյանը՝ հիշեցնելով, թե սիրիահայ համայնքն ինչ ահռելի աջակցություն ցուցաբերեց երկրաշարժից տուժածներին, իսկ արցախյան ազատամարտի տարիներին ինչ մասնակցություն ցուցաբերեցին սիրիահայերը:

Հրապարակախոսի գնահատմամբ՝ ամիսներ առաջ, երբ մեր ազգային ավիափոխադրող «Արմավիա» ընկերությունը դադարեցրեց Երևան-Հալեպ չվերթերը, ոչ ոք Միխայիլ Բաղդասարովին չբացատրեց, որ չվերթերը կասեցնելն ազգային դավաճանությանը համարժեք բան է.« Հասկանալի է, որ Միկա Բաղդասարովի համար ազգություն ասվածը վերամբարձ հասկացություն է, բայց հասկանալի չէ պետության վերաբերմունքի բացակայությունն այդ հարցում»,-գրել է Տ. Պասկևիչյանը, ում կարծիքով՝ վերջապես, այս հարցը պետք է լիներ նաև Ազգային անվտանգության խորհրդի օրակարգում:

Ինչպես նշում է Տիգրան Պասկևիչյանը, եթե նախկինում Երևան-Հալեպ թռիչքն արժեր 119 հազ. դրամ, այժմ «Արմավիան» գինը բարձրացրել է 237 հազարի՝պատճառաբանելով, թե առկա են միայն բիզնես դասի տոմսեր:

«Ես չեմ հասկանում ՀՀ-ում ԱԳՆ չկա՞ կամ Սփյուռքի նախարար չկա՞ կամ դեսպաններ չկա՞ն… Հայերը Սիրիայում զոհվում են, սրանք ստեղ «Արի Տուն» են կազմակերպում….հա~ հասկացանք, փող կա…»,-գրել է խմբին միացած հայաստանցի օգտատերերից մեկը, ում պատասխանում է Գագիկ Բատիկյան օգտատերը հետևյալ խոսքերով.« Չեմ հասկնար, թէ ինչու կը զարմանանք նման բաներէ: Եկէք հեղ մը նայինք, թէ ում կը պատկանէ սա ընկերութիւնը: Ոմն Միխաղիլ Պաղտասառով, մարդ մը, որ հայ օլիկարխին ամէնէն փայլուն օրինակներէ մէկը կրնայ հանդիսանալ: Հետեւաբար, ալ ի՞նչու կը զարմանանք, ինքը մեղաւոր չէ, մեղաւորն ապազգային տարրին մոնոփոլիա տուողն է, եւ ան, հարկավ, պիտի փորձէ սուրիահայերու միջոցաւ Մոսկուային իր պարտքերը փակիլ»:

Արտգործնախարարության խոսնակ Տիգրան Բալայանն էլ ի պատասխան հարցադրումների, թե ի՞նչ է անում ՀՀ արտգործնախարությունը սիրիահայերի վիճակը թեթևացնելու ուղղությամբ, նշեց, որ քայլեր արվում են, սակայն դիվանագիտության մեջ դրանց մասին բարձրաձայնելն ընդունված չէ: