«Հայ հեղափոխական դաշնակցություն», «Ժառանգություն» կուսակցությունները, «Հայ ազգային կոնգրես» ընդդիմադիր դաշինքը ՀՀ կառավարությանն ու ՀՀ գլխավոր դատախազությանն են ներկայացրել «Հարսնաքար» ռեստորանային համալիրում դաժան հաշվեհարդարի հետևանքով սպանված ռազմական բժիշկ Վահե Ավետյանի դեպքի առնչությամբ մի շարք հարցեր՝ ակնկալելով օրենքով նախատեսված ժամկետում դրանց պատասխանները:

Ստորև ներկայացնում ենք այն.

«2012թ. հունիսի 17-ին «Հարսնաքար» ռեստորանային համալիրում դաժան և անմարդկային հաշվեհարդարի հետևանքով սպանվեց ՀՀ ՊՆ Կենտրոնական զինվորական կլինիկական հոսպիտալի բաժանմունքի պետ, մայոր Վահե Ավետյանը: Անպատժելիության մթնոլորտի բնական այս հետևանքը հասարակության մեջ առաջացրել է լարված իրավիճակ:

Ղեկավարվելով «Ազգային ժողովի կանոնկարգ» ՀՀ օրենքի 5-րդ հոդվածի 1-ին մասի ը) կետով և 7-րդ հոդվածի 1-ին մասի բ) կետով Ազգային ժողովի պատգամավորների նախատեսված լիազորություններից, ստորև ներկայացնում ենք մի շարք հարցեր և ակնկալում ենք օրենքով նախատեսված ժամկետում դրանց պատասխանները.

1. Ե՞րբ և ու՞մ կողմից է ոստիկանությունում ահազանգ ստացվել դեպքի մասին: Ինչու՞ մի քանի օր ծանր վնասվածք ստացած սպայի գործով անհապաղ չի հարուցվել քրեական գործ, իսկ նյութերը մի քննչական մարմնից մյուսն է դեգերել:

2. Հայտնի՞ են «Հարսնաքար»-ում տեղի ունեցած միջադեպի բոլոր մասնակիցները, կա՞ն դեպքի այլ ականատեսներ, որոք դեռ հարցաքննված չեն:

3. Հարուցված քրեական գործի շրջանակներում ձևակերպվա՞ծ են ապացուցման առարկա հետևյալ հարցերը.
3.1 Ո՞ր ժամանակահատվածում է տեղի ունեցել միջադեպը և որտե±ղ է տեղի ունեցել դեպքի հիմնական մասը: Արդյո±ք այդ վայրում, բացի դեպքի մասնակիցներից, եղե՞լ են այլ քաղաքացիներ և ի՞նչ վարքագիծ են նրանք դրսևորել,
3.2 Ու՞մ հրահանգով են ծեծի ենթարկվել Վահե Ավետյանը և մյուսները, մեղադրյալններից ո՞վ կամ ովքե՞ր են առավել ակտիվ եղել ծեծի ժամանակ,
3.3 «Հարսնաքար» ռեստորանի կալանավորված աշխատակիցների հեռախոսազանգերը առնչություն ունե՞ն դեպքի հետ և ու՞մ անուններն են նշվում,
3.4 ծեծի ժամանակ հայոյանքներ հնչել են, թե՞ ոչ, ի՞նչ առարկաներ և/կամ գործիքներ են օգտագործվել,
3.5 մեղադրյալների և նրանց հագուստների վրա եղե՞լ են ֆիզիկական ուժի, բռնության գործադրման հետքեր,
3.6 հատկապես ո՞վ կամ ովքե՞ր են Վահե Ավետյանին հասցրել կյանքի հետ անհամատեղելի վնասվածքներ:

4. Հանցագործության կատարման տեղանքներում կա±ն տեսանկարահանման սարքավորումներ, որոնք արձանագրել են դեպքը: Եթե չեն պահպանվել տեսագրությունները, ապա ինչպե՞ս է դա բացատրվում:

5. Բացի Վահե Ավետյանից և նրա ընկերներից, ռեստորանը նույն ժամանակահատվածում այլ այցելուներ ունեցե՞լ է, ճշտվա՞ծ են այցելունների տվյալները: Ինչպես ռեստորանի այցելուները, այնպես էլ աշխատակիցները փորձե±լ են սրահի ներսում կանխել միջադեպը, անհատապես ովքե՞ր:

6. «Հարսնաքար» ռեստորանի կալանավորված 7 աշխատակիցները ունեցե՞լ են աշխատանքային պայմանագրեր և այդ պայմանագրերով սահմանված եղե՞լ են նրանց ֆունկցիոնալ պարտականությունների շրջանակը:

7. Ի՞նչ իրավական հիմքերով է ապահովվում «Հարսնաքարի» և ընդհանրապես հանրային սննդի նմանատիպ օբյեկտների, դրանց աշխատակիցների ու հաճախորդների անվտանգությունը, ովքե՞ր են պատասխանատուները, ի՞նչ պահանջներ է սահմանված նրանց համար (նկատի առնելով այն հանգամանքը, որ «Մասնավոր պահնորդական գործունեության մասին» ՀՀ օրենքն ուժի մեջ է մտնելու միայն 2013թ. հունվարի 1-ից), արդյո՞ք այդ անձինք կամ կազմակերպությունները ֆիզիկական ուժի, զենքի և հատուկ այլ միջոցների գործադրման իրավասություններ ունեն և ո՞ր դեպքերում:

8. Արդյո՞ք վարվում է հասարակական վայրերում պաշտոնատար անձանց, նրանց ընտանիքի անդամների կամ նրանց «թիկնազորի» մասնակցությամբ կատարված ծանր հանցագործությունների հաշվառում-վիճակագրություն: Մինչև այժմ քրեաիրավական ինչպիսի՞ պատասխանատվության ու պատժի են ենթարկվել մեղավոր անձինք:

9. Արդյո՞ք համապատասխան առաջարկություններ մշակվել են «Հարսնաքար»-ում և նմանատիպ այլ հաստատություններում բռնության երևույթները կանխելու, քաղաքացիների իրավունքների պատշաճ պաշտպանություն իրականացնելու ուղղությամբ: Մասնավորապես, անհրաժեշտ չէ արդյո՞ք այդպիսի տարածքների տեղակայման և տարածքներում պարտադիր տեսանկարահանման սարքավորումների կիրառման և այլ պահանջներ սահմանելը:

Միաժամանակ հարկ ենք համարում նշել, որ պատրաստ ենք նաև հանդես գալ համապատասխան օրենսդրական նախաձեռնությամբ»:

Փաստաթուղթը ստորագրել են՝ ՀՅԴ-ից Արմեն Ռուստամյանը, «Ժառանգություն»-ից՝ Ռուբեն Հակոբյանը, ՀԱԿ-ից Արամ Մանուկյանը: