Ադրբեջանի պետական նավթային հիմնադրամը (ԱՊՆՀ), որը ստեղծվել է 1999թ., նախատեսում է մոտ 400-500 մլն դոլար ներդնել ռուսական ռուբլու ձեռքբերման մեջ, որոնք հետագայում կներդնվեն ռուսական 3-4 բանկերում, հաղորդում է gazeta.ru-ն:

«Ներկայում նախապատրաստական աշխատանք է տարվում հիմնադրամի` ռուբլու մեջ ներդրումներ իրականացնելու համար: Այդ նպատակով մի շարք հանդիպումներ են անցկացվել ռուսական բանկերի հետ և ներկայում բանակցություններ են ընթանում գործարքների կնքման համար», - հայտարարել է հիմնադրամի ղեկավար Շահմար Մովսումովը:

ԱՊՆՀ-ում կուտակվում են նավթի վաճառքից, պետական գույքի վարձակալությունից և մի շարք այլ աղբյուրներից գոյացող գումարները:

Սակայն ռուսական ռուբլին միակ արժույթը չէ, որտեղ ներդրում է իրականացնում հիմնադրամը: Դրանք արվում են թուրքական լիրայի, ավստրալական դոլարի, ոսկու և արտասահմանյան ընկերությունների արժեթղթերի մեջ:

Այսպես, 2012թ. հիմնադրամը 400 մլն դոլարի համարժեք թուրքական լիրա է գնել, որոնք որպես դեպոզիտներ ներդրվել են Թուրքիայի բանկերում տարեկան 8-10% տոկոսադրույքով: 200 մլն ավստրալական դոլար էլ ներդրվել է Ավստրալիայի պետական պարտատոմսերի մեջ:

Հիմնադրամը ոսկի սկսել է գնել այս տարվա փետրվարից և մինչև հունիս արդեն 6847 կգ ոսկի էր գնել, որի արժեքը 343 մլն դոլար է, ինչը հիմնադրամի ներդրումային պորտֆելի 1%-ն է: Ոսկին ներկայում Լոնդոնում է պահվում, սակայն աշնանը նախատեսվում է տեղափոխել Ադրբեջան, իսկ այս տարվա երկրորդ կիսամյակում նախատեսում է ևս 7,5 տոնա ոսկի գնել, իսկ երկու տարվա ընթացքում` 30 տոննա:

Սեպտեմբերից ԱՊՆՀ-ն կսկսի գնել Morgan Stanley Capital International World-ի ինդեքսի մեջ մտնող օտարերկրյա ընկերությունների արժեթղթերը, այդ նպատակով 600 մլն ԱՄՆ դոլար կծախսվի, քանի որ հիմնադրամը իր միջոցների միայն 5%-ը կարող է ներդնել արտասահմանյան արժեթղթերում:

Ընդհանուր առմամբ ադրբեջանական հիմնադրամի հետաքրքրությունը ռուսական արժույթում տարօրինակ է:
Պատասխանելով այն հարցին, թե նման ներդրումները բացառություն են, թե այլ երկրներ ևս ներդրումներ են անում ռուսական ռուբլու մեջ, ՏԿԲ «Կապիտալի» վերլուծաբան Ա. Կովալյովը նշել է, որ արաբական կամ այլ նման ֆոնդերը Ռուսաստանում գումար չեն պահում, չնայած ժամանակին կարող էին ներդրումներ անել խոշոր ռուսական ընկերություններում, օրինակ «Սբերբանկ»-ում կամ «Ռոսնեֆտ»-ում:

Որոշ փորձագետներ կարծում են, որ Ադրբեջանը օպտիմալ կերպով ներդրումները դիվերսիֆիկացրել է ակտիվներում, միջոցները բաշխելով հիմնական ֆինանսական գործիքների միջև:

«Ռուբլին այսօր պահպանում է ներդրումային գրավչությունը, քանի որ դեպոզիտների եկամտաբերությունը զգալիորեն բարձր է, քանի դոլարինը, իսկ հաշվի առնելով ԱՄՆ պարտքային բեռը, դոլարի գնումը ապագայում անվտանգ չի կարող լինել», - կարծում է Մակարովը:

Սակայն որոշ փորձագետներ կարծում են, որ Ադրբեջանի հանկարծակի «սիրահարությունը» ռուսական ռուբլուն չափազանց վտանգավոր է:

UFS Investment Company-ի առաջատար վերլուծաբան Ալեքսեյ Կոզլովը կարծում է, որ Ադրբեջանի նավթային հիմնադրամը շուկայում չափազանց ագրեսիվ տակտիկա է դրսևորում, փորձելով հնարավորինս արագ բազմապատկել իր միջոցները:

Առաջին կիսամյակում դա ստացվեց` հիմնադրամի ակտիվները աճեցին 9,6%-ով և հասան 32,7 մլրդ դոլարի:
Հետագա ռիսկային ներդրումները խոսում են այն մասին, որ դրա կառավարիչները այն տեսակետով են առաջնորդվում, որ ճգնաժամի զարգացումը մոտ է իր գագաթնակետին, որը անցնելով համաշխարհային տնտեսությունը կսկսի վերականգնվել, կարծում է փորձագետը:

«Դեպքերի նման զարգացումը կարող է խթանել ապրանքային ակտիվների գնի աճ, որը կհանգեցնի հումքային արժույթի, այդ թվում և ռուսական ռուբլու ամրապնդման: Նման պարագայում Ադրբեջանի հիմնադրամը շահույթ կստանա ոչ միայն դեպոզիտային եկամուտներից կամ արժեթղթերի կուրսային գնի աճից, այլ նաև կգումարվի կուրսերի տարբերությունը, որը կգոյանա ռուբլու ամրապնդման հետևանքով»,- բացատրել է փորձագետը:

Հետաքրքիր է, որ ոսկին, որը նույնպես ադրբեջանցիների ներդրումների թիրախում է, ներդրողների կողմից որպես ևս մեկ ռիսկային ակտիվ է ընկալվում, այլ ոչ կայուն մի բան:

«Մնում է, որ ճգնաժամը նորից թափ չառնի, այդ ժամանակ հիմնադրամի ղեկավարնեը սխալված չեն լինի», - նշում են վերլուծաբանները: