Փայլակ Հայրապետյան անուն ազգանունով քաղաքացին դիմում է հղել գլխավոր դատախազ Աղվան Հովսեփյանին և ոստիկանապետ Վլադիմիր Գասպարյանին, որում նշում է, որ ինքը խաբեության զոհ է դարձել, որ իր գրավադրված գույքը աճուրդի է հանվում ժամանակից շուտ և պարզաբանումներ է պահանջում իրավապահներից։

Դիմումը ներկայացնում ենք ստորև.

2009թ. նոյեմբերի սկզբներին ՀՀ առևտրի և արդյունաբերության նախարարության շենքում նախարար Ներսիսյանի կողմից անցկացված նիստին մասնակցում էին 23 արդյունաբերական կազմակերպություններ:


Նիստում մասնավորապես որոշվեց ՌԴ-ից 100 մլն դոլարի ադամանդի ներմուծմամբ տասը հազար աշխատատեղ ստեղծել Հայաստանում: Նիստում ելույթ ունեցավ նաև «Ձորագյուղ» ԱԿ նախագահ Աշոտ Սուքիասյանը, առաջարկելով Աֆրիկայում իր ունեցած հանքերից բերել համապատասխան քանակությամբ հումք` 30% և ավելի էժան գներով: Նշեմ , որ նիստի ընթացքում և հետագայում` շուրջ 5 տարի , Աշոտ Սուքիասյանը շրջապատին ներկայանում էր, որպես Մայր Աթոռի Արարատյան թեմի «սուրբ քավոր» և ցույց էր տալիս իրեն մոլեռանդ քրիստոնյա, ինչպես նաև նշում էր , որ Աֆրիկյան երկրներում իր սեփականությունը հասնում է միլիարդավոր դոլարների: Հեղինակություն վայելող բազմաթիվ մարդկանց շրջանակում նրա դրսևորած վարքը կասկածներ չէր առաջացնում, իր ով լինելու մասին:


Վերոհիշյալ նիստի ավարտին 23 մասնակից կազմակերպությունների ղեկավարներով, վարչության պետ Գագիկ Քոչարյանի մասնակցությամբ գնացինք Սևան ` նշելու տվյալ նախնական համաձայնությունը:


Դրանից մոտ 20 օր հետո Աշոտ Սուքիասյանն իր ղեկավարած կազմակերպություն հրավիրեց վերոհիշյալ նիստի մասնակիցներին, այդ թվում Գ. Քոչարյանին: Այստեղ նաև ցուցադրեց 370 կարատ ադամանդի հումք և դարձյալ կոչ արեց ստեղծել հիմնադրամ` ֆինանսավորելու համար իր մտահաղացած բիզնեսը և պահանջեց 12 մլն դոլարի սահմաններում ներդրում անել:


Ես պատրաստակամություն հայտնեցի ինձ պատկանող անշարժ գույքն ամբողջությամբ գրավադրել ՀՀ որևէ բանկում, որը համապատասխան քանակությամբ միջոցներ կտրամադրի Աշոտ Սուքիասյանին:


Արդյունքում իմ ունեցած գույքը, որը գնահատվել էր շուրջ 33 մլն ԱՄՆ դոլար: Նոտարական գրասենյակների միջոցով համապատասխան ձևակերպմամբ հանձնեցի Աշոտ Սուքիասյանին, մտածելով, որ նա կարող է Հայաստանում ստեղծել 10 հազար աշխատատեղ, ինչպես պնդում էր:


Մեզ` վերոհիշյալ նիստի 23 մասնակիցներիս , ինչպես նաև նախարար Ներսիսյանին և Գ. Քոչարյանին հրավիրեցին «Սվիս» բանկ : Քննարկման արդյունքում սակայն բանկը հրաժարվեց ֆինանսավորել 12 մլն ԱՄՆ դոլարի չափով` իմ տրամադրած անձնական գույքի դիմաց:


Մի քանի օր անց Աշոտ Սուքիասյանը զանգահարեց ինձ և ասաց, որ ինքը «Ամերիա բանկ»-ի միջոցով վերցրել է 12մլն ԱՄՆ դոլարը` մեր մտահղացած գործը սկսելու համար: Ըստ իմ ունեցած տեղեկությունների ` Ա. Սուքիասյանը «Ամերիաբանկից» ստացել է 9 մլն 753350 ԱՄՆ դոլար, համապատասխան ամսաթվերով:


Անցել է շուրջ 2 տարի , սակայն այս ընթացքում որևէ իրական գործ չի արվել Ա Սուքիասյանի կողմից, իսկ նրա հետ պարբերաբար ունեցած անձնական հանդիպումների և հեռախոսազրույցների ընթացքում ամեն անգամ ինձ փորձել է վստահեցնել , որ գործն ընթացքի մեջ է, և շուտով ոսկին ու ադամանդը կբերվի Հայաստան, կսկսենք աշխատել:


Վարկի վերցնելուց դեռ չի անցել 2 տարի , բայց արդեն 1 տարի է, ինչ «Ամերիաբանկ» ՓԲԸ իմ 33 մլն դոլար արժողությամբ ներդրած գույքը դրել է աճուրդի և վաճառում է: Այն դեպքում, որ գրավադրված է 10 տարի ժամկետով, և միայն այդ ժամկետից հետո այն կարելի կլիներ օտարել ազատ աճուրդով:


Տեղեկացնեմ , որ Բիզնես ծրագիրը Ա. Սուքիասյանը կազմել է Ամերիաբանկի հետ միասին:
Արդյունքում`


1. Հայաստանը զրկվեց 100մլն ԱՄՆ Դոլարի Ռուսաստանի Դաշնությունից ադամանդի համար վարկ ստանալուց

2. Չաշխատեցին նախատեսված 23 ֆաբրիկաները, որտեղ պետք է աշխատեր շուրջ 10.000 մարդ:

3. Ըստ հավաստի աղբյուրների պարզվեց, որ Սիերա Լեոնե Հանրապետություն ոչ մի աշխատանքներ մինչ օրս չի տարվել, աշխատատեղ չի ստեղծվել, տեխնիկա չի փոխանցվել

4. Կորցրեցի իմ ունեցվածքը

5. Հայաստանից դուրս եկավ 10 մլն ԱՄՆ դոլար

Խնդրում եմ ստուգել այդ գումարները ուր և ինչպես են ծախսվել, ինչ հիմնավորումների վրա են գումարները օտարվել : Հնարավորության դեպքում տրամադրել հավաստի գրավոր ապացույցներ վերոհիշյալ ծախսումների մասին: