Գյումրիի քաղաքապետարանի լրատվության պատասխանատու Լիլիթ Աղեկյանը համարում է, որ առայժմ ժամանակը չէ խոսել Գյումրիի քաղաքապետի ընտրություններում գործող քաղաքապետ Վարդան Ղուկասյանի առաջադրվելու մասին։
«Կգա ժամանակը, կիմանաք: Շնորհակալ ենք, որ մտահոգ եք Հանրապետության երկրորդ քաղաքի ճակատագրով, բայց ժամանակը դեռ չի եկել»,– Tert.am-ի հետ զրույցում ասաց նա:

Հիշեցնենք, որ նախօրեին արդեն մեկնարկել է Գյումրիի քաղաքապետի թեկնածուների առաջադրման գործընթացը և առայժմ առաջադրված առաջին և միակ թեկնածուն «Բարգավաճ Հայաստան» կուսակցության անդամ Սամվել Բալասանյանն է: Իսկ ԱԺ «Հայաստանի Հանրապետական կուսակցություն» խմբակցության ղեկավար Գալուստ Սահակյանը օրեր առաջ հայտնել էր, թե ՀՀԿ-ն պաշտպանելու է Սամվել Բալասանյանին:

Սակայն այսօր ՀՀԿ մամուլի խոսնակ, ԱԺ փոխնախագահ Էդուարդ Շարմազանովը Tert.am—ի հետ զրույցում հայտնեց, որ որևէ որոշման մասին խոսք չի կարող լինել, եթե կուսակցության քաղխորհրդի նիստ չի եղել:

Այսուհանդերձ, գլխավոր ինտրիգը մնում է, թե, արդյո՞ք, Գյումրիի քաղաքապետ Վարդան Ղուկասյանը կառաջադրվի, թե՝ ոչ:
Գյումրիի «Ասպարեզ» ակումբի նախագահ Լևոն Բարսեղյանը պատասխանելով հարցին, թե այնուամենայնիվ, կառաջադրվի՞, թե ոչ Վարդան Ղուկասյանն, ասաց.« Ես միշտ ասել եմ, որ չի կարելի թերագնահատել իրեն և էլի մինչև էս պահը դժվար է ասել՝ կառաջադրվի՞, թե՝ ոչ»:

«Կար մի պահ, երբ ասում էին, որ, անպայման, կառաջադրվի, հետո սկսեցին խոսել, թե կուսակցությունը ինչ էլ որոշի՝ առաջադրվելու է, հետո սկսեցին խոսել, որ դեռ պարզ չէ՝ «Աստված ինչ խորհուրդ, ուղղություն տա», իր խոսքերն են: Չորս օր առաջ լրատվության բաժնի պետն ասաց, որ, անպայման, առաջադրվելու է: Տեսնե՜նք»:

Եթե այս պայմաններում, այնուամենայնիվ, Վարդան Ղուկասյանն առաջադրվի, ապա Լևոն Բարսեղյանը կենթադրի, որ Բաղրամյան 26-ում «սիրում են գլադիատորական մարտեր», եթե ոչ՝ ապա, «խոստացած կլինեն, որ հանձնում-ընդունումը կլինի փափուկ»:

Ինչ վերաբերում է առաջադրված թեկնածու Սամվել Բալասանյանին, ապա Լևոն Բարսեղյանը, նշելով, որ դա իր իրավունքն է, հավելեց, որ ինքը Բալասանյանի ընտրողը չէ և, որ ցավոք, այսօրվա դրությամբ, Գյումրին չունի այն թեկնածուն, որին ինքը կընտրեր:

«Իշխանության մարդն է և, եթե առավել ևս հանրապետականը պաշտպանելու է իր թեկնածությունը, շարունակելու է ավելի շատ ծառայել պետական իշխանությանը, քան քաղաքին: Բայց այս իրավիճակում որևէ փոփոխություն քաղաքապետի, համարում եմ արդյունավետ՝ այն ակնկալիքով, որ «Քաղաքը մերն է» նախաձեռնության ավագանու այս շարժումը ձևավորելու է ուժեղ ավագանի և ով էլ լինի քաղաքապետ՝ Սամվե՞լ Բալասանյանը, նախորդը, գործողը կառաջադրվի-կընտրվի, ավագանին այլևս նախկինը չի լինի»,- ասաց Լևոն Բարսեղյանը: