Օգոստոսի 5-ին Թալինի քաղաքապետի ընտրություններն անցան մայիսի 6-ի խորհրդարանական ընտրություններին հարիր ավանդույթների շրջանակում. ռեսուրսի բացարձակ և կոպիտ կիրառում, տարբեր մանիպուլիացիաներ ընտրողների հետ և օքսիդացող թանաքներ, որոնք եկել են փոխարինելու բացահայտ լցոնումներին, քվեատուփի գողության դեպքերին ու դիտորդների ծեծուջարդին:

Tert.am-ի հետ զրույցում երեկ Թալինում անցկացված համայնքի ղեկավարի ընտրությունների վերաբերյալ նման գնահատական հնչեցրեց քաղաքապետի «Բարգավաճ Հայաստան» կուսակցության թեկնածու, Վազգեն Խաչատրյանի վստահված անձ, ԱԺ ԲՀԿ խմբակցության քարտուղար Նաիրա Զոհրաբյանը:

Ըստ նրա, սակայն, այն, ինչ երեկ տեղի ունեցավ Թալինում, չի կարելի անվանել թալինցիների ազատ կամքի արտահայտություն:

«Մասնավորապես, ընտրողներին բաժանվել էին կապույտ և կարմիր գրիչներ և վերահսկվում էր, որ նրանք անպայման քվեարկեն այդ գրիչներով, շատ օրիգինալ նորամուծություն էր, որը, երևի թե, առաջին անգամ փորձարկվեց Իջևանի ընտրություններում»,– ասաց նա:

«Իսկ Արագածոտնի մարզպետը, վերջին մեկ ամսում, բացառապես Թալինում էր բնակվում և երեկ ողջ օրը նա ընտրատեղամասերից չէր հեռանում: Ես հասկանում եմ, իհարկե, որ մարզպետն իր հետագա պաշտոնավարման հարցը կապում է Թալինի ընտրություններով»,-ասաց Նաիրա Զոհրաբյանը:

Հիշեցնենք, որ նախնական արդյունքների համաձայն, Թալինի քաղաքապետ է ընտրվել Հայաստանի Հանրապետական կուսակցության կողմից առաջադրված Սարգիս Արամյանը՝ ստանալով 1217 ձայն։ Ինքնաառաջադրված թեկնածու, հանրապետական պատգամավոր Մնացական Մնացականյանի աջակցությունը վայելող Վորոշ Խաչատրյանը` 840, «Բարգավաճ Հայաստան» կուսակցության թեկնածու Վազգեն Խաչատրյանը` 817: Ինքնաառաջադրված անկուսակցականներ` Գագիկ Կարապետյանի օգտին քվեարկել է 190, Էդվարդ Գրիգորյանի օգտին ` 28 ընտրող:

Նաիրա Զոհրաբյանը ներկայացրեց Թալին ՏԻՄ ընտրությունների ևս մի առանձնահատկություն, որին ականատես է եղել երեք ընտրատեղամասերում էլ. այն է՝ մոտ 50-60 ընտրողներ, որոնք քվեախցիկ են մտել ուղեկցողի ուղեկցությամբ, թեպետ՝ վիզուալ որևէ խնդիր չեն ունեցել ոչ տեսողության, ոչ առողջության հետ:

«Սրանք երևի այն ընտրողներն էին, որոնց ազնիվ խոսքը երևի թե բավարար չի եղել պատվիրատուների համար և նրանք անձամբ են ուղեկցել ընտրողին քվեախցիկ»,-ասաց ԲՀԿ –ական պատգամավորը, ով 15/2 ընտրատեղամասի հանձնաժողովի անդամներից հետաքրքրվելով, թե ո՞րն է նման ընտրողների առկայության պատճառը, ստացել է, իր խոսքով, շատ օրիգինալ պատասխան.«Բա դու չգիտեի՞ր, որ Թալինում 60–ից հետո բոլորը անգրագետ են և, բնականաբար, ուղեկցողի հետ են մտնում քվեախցիկ, որ նրանց համար կարդան թեկնածուների անունները»:

Իսկ Իջևանում էլ, որտեղ նույնպես մեծ թիվ են կազմել ուղեկցորդներով ընտրողները, Նաիրա Զոհրաբյանին բացատրվել էր, որ բոլորը հոգեկան հիվանդներ են և չեն կարող ինքնուրույն քվեարկել:

Ի դեպ, Թալինում և Իջևանում տեսածով ու լսածով պայմանավորված, պատգամավորը պատրաստվում է հանդես գալ Ընտրական օրենսգրքում փոփոխություններ և լրացումներ կատարելու օրենսդրական նախաձեռնությամբ. եթե հանձնաժողովի անդամը կամ վստահված անձը կասկածներ ունեն, որ ուղեկցվող անձը առողջության և տեսողության հետ կապված խնդիրներ չունի, կարող է նրանից պահանջել բժշկի տեղեկանք:

«Էլ չեմ ասում բազմաչարչար օքսիդացող թանաքների մասին, որոնք, ինչպե և խորհրդարանական ընտրություններին, շատ արագ օքսիդանում էին քվեարկության առաջին ժամերին»:

Հիշեցնենք, որ 5230 ընտրողից երեկ քվեարկությանը մասնակցել է 3369 մարդ: