Վլադիմիր Պուտին-Սերժ Սարգսյան հանդիպման առանցքային կետը Սիրիան է՝ «ուզենք, թե չուզենք» և մտածել, որ այսօրվա իրավիճակում օրակարգում որևէ հարց կարող է Սիրիայից ավելի կարևորվել և փորձել արհեստական հարցադրումներ անել՝ «այո», «ոչ», իրատեսական չէ, Tert.am-ի հետ զրույցում նման կարծիք հայտնեց «Եվրոպական ինտեգրացիա» հասարակական կազմակերպության նախագահ, քաղաքագետ Կարեն Բեքարյանը: Այս հայտարարությունը հակադրվում է հայաստանյան առանձին քաղաքագիտական շրջանակների այն պնդումներին, որ հանդիպման առանցքում Ռուսաստանի նախագահ Վլադիմիր Պուտինի` Եվրասիական միություն ստեղծելու նախաձեռնության վերաբերյալ քննարկումն է:

Կարեն Բեքարյանը չի հերքում, որ ռազմավարական գործընկերներ Հայաստանի և Ռուսաստանի ղեկավարների ոչ թե հեռախոսազրույցի, այլ սեղանի շուրջ անմիջական առանձնազրույցի թեմաների սպեկտորը շատ լայն է և դրա մեջ, բնականաբար, կան երկկողմ տնտեսական հարաբերությունների (ինչի մասին համոզվում ենք արդեն հրապարակված պաշտոնական հաղորդագրություններից- Tert.am ) և Եվրասիական միության գաղափարները:

Հիշեցնենք, որ երբ մոտ մեկ ամիս առաջ նախ Ռուսաստանի Պետդումայի նախագահ Սերգեյ Նարիշկինը, ապա ՌԴ Դաշնային Ժողովի Դաշնության Խորհրդի նախագահ Վալենտինա Մատվիենկոն Երևանում խոսեցին Եվրասիական նախագծի մասին, այն միանգամից քաղաքական օրակարգում հրատապ թեմա դարձավ:

Մասնավորապես, «Բարգավաճ Հայաստան» կուսակցությունը, ինչպես նաև, մի շարք հասարակական-քաղաքական կազմակերպություններ, ողջունեցին ՌԴ նախագահի նախաձեռնությունը: Անգամ հայտարարվեց, որ ԱՊՀ բոլոր երկրներում շուտով կբացվեն «Եվրասիական միություն» հասարակական-տեղեկատվական կենտրոններ:

Իսկ որ այսօր օրակարգում Սիրիան է՝ Կարեն Բեքարյանը ներկայացրեց մի քանի հիմնավորումներով. «Հստակ է, որ ՌԴ-ի համար ևս այդ խնդիրը շատ զգայուն է, թե՛ քաղաքական շահերի, թե՛ ռազմական ներկայության, և թե՛ տնտեսական հնարավոր ձևափոխումների իմաստով: Գումարած դրան այն, որ տեղեկատվություն կա, որ թուրքական կողմից արդեն Սիրիայի սահմանի խախտում կա, գումարած Իրանի հայտարարությունը, որ Սիրիան պետք է դիտարկել Արևմուտքին ընդդիմացող առանցքի մեջ և այլն, և այլն»:

Ի պատասխան այն հարցին, թե այդ դեպքում, արդյո՞ք, պատահական է համարում ռուսաստանցի բարձրաստիճան պաշտոնյաների նման հայտարարությունները, Կարեն Բեքարյանը նշեց. «Չէ, պատահականություններ չեն լինում, ուղղակի պետք է հաշվի առնենք, որ օրակարգում՝ քննարկումների փուլում, կա Եվրասիական միության գաղափարը, որովհետև այն իր ամբողջության մեջ գաղափար է՝ իր ընդհանուր ստրատեգիայով ու դեռևս չմանրամասնված դետալներով: Կարող է լինել 25-րդ, կարող է՝ 7-րդ տեղում, բայց լինելու է, հատկապես, երբ մենք աշխարհագրորեն տարածաշրջանի մաս ենք կազմում: Եվ Հայաստան-ՌԴ հարաբերություններն էլ այն մակարդակի վրա են, որ բնական է այն, որ Ռուսաստանն այդ գաղափարի զարգացման առաջին «փորձարկումներն» ու մտորումներն անի իր ամենամոտ դաշնակիցների հետ: Այսինքն՝ անգամ միասին մտածեն»:

Նշենք, որ Եվրասիական միությունը որպես կառույց ձևավորվելու է երեք տարի անց` 2015-ին:

Տարածաշրջանային հետազոտությունների կենտրոնի նախագահ Ռիչարդ Կիրակոսյանը ոչ միայն համամիտ է Կարեն Բեքարյանի հետ, այլ նաև հավելեց, որ դրա մասին միշտ էլ ժամանակ առ ժամանակ խոսվել է:

Հայաստանի քաղաքագետների միության նախագահ Հմայակ Հովհաննիսյանը, ով չի շտապում այս հանդիպման մասին մեկնաբանություններով հանդես գալ, այնքան էլ համամիտ չէ այս կարծիքի հետ. «Հաշվի առնելով, որ և՛ Նարիշկինը, և՛ Մատվիենկոն այդ մասին խոսեցին, տրամաբանական է, որ այս հարցը չի կարող շրջանցվել երկու ռազմավարական պետությունների ղեկավարների առանձնազրույցում»,- ասաց Հմայակ Հովհաննիսյանը:

Հիշեցնենք, որ Ռուսաստանը, Բելառուսն ու Ղազախստանը ստորագրել են Եվրասիական ինտեգրման մասին և Եվրասիական տնտեսական հանձնաժողովի ստեղծման համաձայնագիրը, ըստ որի` պետք է ստեղծվի Եվրասիական տնտեսական միությունը: