Այս տարի Սուրբ Մարիամ Աստվածածնի վերափոխման տոնը, կամ խաղողօրհնեքը, կնշվի առաջիկա կիրակի օրը՝ օգոստոսի 12-ին, այսօր հրավիրված մամուլի ասուլիսում տեղեկացրեց Սուրբ Հովհաննես եկեղեցու հոգևոր սպասավոր Տեր Շմավոն քահանա Ղևոնդյանը՝ նշելով, որ այս տոնը հայերի ամենասիրելի տոներից մեկն է:

«Մենք՝ հայերս դիմում ենք նրան, որպես մոր: Յուրաքանչյուր տոն, կապված նրա հետ՝ սիրելի է: Տոնը մենք համարում ենք Աստվածածնի ննջման օր: Ըստ Աստվածաշնչի, Հիսուս Քրիստոսը Հովհաննես առաքյալին հանձնարարեց խնամել իր մորը: Դա տևեց շուրջ 30 տարի»,– պատմեց նա:

«Աստվածածնի ննջելուց հետո նրան հրաժեշտ տալու եկան բոլորը հավատացյալները, որից հետո նրան ամփոփեցին քարայրում: Առաքյալներից ներկա չէր Բարդուղիմեոսը: Վերադառնալուն պես նա ցանկանում է հրաժեշտ տալ Աստվածամորը, բայց երբ բացում են քարայրը, տեսնում են, որ նրա մարմինն այլևս այդտեղ չէ»,- շարունակեց քահանան և ավելացրեց, որ առաքյալներն այդ ժամանակ հասկանում են, որ նա վերափոխվել է և տեղ գտել իր որդու կողքին:

Տեր Շմավոն քահանա Ղևոնդյանը նաև նշեց, որ այս տոնը նշվում է բոլոր քրիստոնեական եկեղեցիներում: Տոնին օրհնվում է նաև խաղողը, ինչն, ընդհանրապես, պտղաբերությունն օրհնելու խորհուրդ ունի:

Քահանան բացատրեց, թե ինչո՞ւ է օրհնվում հե՛նց խաղողը. «Դա ուղղակի պտուղ չէ: Ի վերջո, այն վերածվում է գինու՝ Քրիստոսի արյան: Թեև դեռևս խաղողը օրհնված չէ, բայց ես տեսնում եմ, որ այսօր շուկայում խաղող են վաճառում և մարդիկ գնում են այն: Բայց հայերը նախկինում, մինչև օրհնանքը, չեն կերել խաղող: Նշեմ, որ թեև խաղողն օրհնվում է եկեղեցում, բայց աստծո օրհնությունը տարածվում է նաև եկեղեցուց դուրս»,- ասաց Տեր Շմավոնը:

Քահանան հիշեցրեց, որ Սուրբ Մարիամ Աստվածածնի վերափոխման տոնը Հայոց Առաքելական եկեղեցու տաղավար տոներից մեկն է, որին հաջորդող օրը պետք է այցելել հարազատ ննջեցյալներին:

«Այդ օրը պետք է աղոթել ննջեցյալների համար: Արգելվում է տոնի օրը հուղարկավորություն կատարել կամ գնալ գերեզմանոց»,- ասաց Տեր Շմավոնը։

Ասուլիսին ներկա ազգագրագետ Սամվել Մկրտչյանը նշեց, որ այս տոնը համաժողովրդական է և այդ օրը հայերը միշտ ուխտագնացության են մեկնել։

«Խորհրդային տարիներին նկատվեց տոնի անկում: Պատճառը պետական համակարգն էր: Եթե հարյուր տարի առաջ հիմնականում ավագ սերունդներն էին տոնի կրողը, ապա ներկայումս ամենաակտիվը երիտասարդ և միջին սերունդն է:

Ներկայումս կրոնաավանդական տոներին հետևելու ավանդույթը վերակենդանացել է»,- ասաց նա:

Ազգագրագետը նաև նշեց, որ հայերը միշտ որևէ կտորի մեջ փաթաթած իրենց խաղողը տարել են եկեղեցի՝ օրհնելու:

Միաժամանակ Սամվել Մկրտչյանը տեղեկացրեց, որ տոնն ունի բնապաշտական՝ հեթանոսական հիմքեր: