Երիտասարդների շրջանում, նրանց ստեղծած միջավայրում յուրաքանչյուր մարդ նոր ու դրական լիցքեր է ստանում: Նման կարծիք այսօր հայտնեց ՀՀ նախագահ Սերժ Սարգսյանը, ով ներկա էր Ծաղկաձորում անցկացվող «Բազե» համահայկական երիտասարդական հավաքի պաշտոնական փակմանը:

Նա իր խոսքում նշեց, որ չի ցանկանում հայրենասիրական կոչեր անել, բայց հորդորեց հիշել, որ երիտասարդները կարևոր մասն եք կազմում մի հրաշք ամբողջականության, որը կոչվում է Հայաստան:

«Առանց ձեզանից որևէ մեկի` ամբողջական լինել չի կարող Հայաստանը: Այսպիսի հավաքները հնարավորություններ են ստեղծում նոր ծանոթությունների հին ընկերների ու բարեկամության հաստատման, ինչպես նաև նոր ծրագրերի գաղափարների առաջացման շատ լավ հարթակ են: Բոլորիս ցանկութոյւնն է որպեսզի դուք հաճելին համադրեք օգտակարի հետ, քանի որ դա շատ լավ կլինի ձեզ ձեր շրջապատի ու ողջ հասարակությահ համար»,-ասաց նա:

Նախագահ Սերժ Սարգսյանը հետևեց բազեականների միջև անցկացվող մրցումներին՝ ձեռքի ուժ, պարանի ձգում, շախմատային մրցաշար:

Երիտասարդները նաև նկարների ցուցահանդես էին բացել, որտեղ տեղ էին գտել բազեական նկարիչների աշխատանքները:

Սերժ Սարգսյանը նշեց, որ ինքը տպավորված է շախմատիստների պատրաստվածությամբ, ինչպես նաև պարանը ձգողների ուժով ու
նրանց հայացքներով:

ՀՀԿ Երիտասարդական հիմնադրամի նախագահ, ԱԺ պատգամավոր Կարեն Ավագյանը նշեց, որ արդեն մեկ տասնամյակ է բազմաթիվ երիտասարդներ համախմբվում են մի դրոշի ներքո: Ըստ նրա՝ հոգով ու մտքով առողջ, հայրենասեր սերունդ ունենալու համար հարկ է ստեղծել այն միջավայրը, որտեղ պետք է այդ սերունդը ձևավորվի:

«Նախաձեռնությունը հաջողվել է և սպորտային ու ինտելեկտուալ միջոցառում լինելուց բացի դարձել է հասարակական հետաքրքրոթյան առարկա: Տասը տարվա ընթացքում հավաքին մասնակցել են շուրջ 8 հազ. երիտասարդներ: Կարևոր է հատկապես Սփյուռքից ժամանած բազեականների մասնակցությունը: Հայաստանը սիրելու համար պետք է ճանաչել այն, ապա հայի տեսակը»,- ասաց նա և նկատեց, որ ՀՀ նախագահի ուշադրությունը «Բազե»-ին ոչ միայն պատիվ է, այլ նաև պարտավորվածություն:
 

Թե որ ճակատն է ճանաչվում այս տարվա հաղթող, պարզ կդառնա ավելի ուշ:

Հիշեցնենք, որ «Բազե» երիտասարդական համահայկական հավաքը մեկնարկել էր օգոստոսի 13-ին: Երիտասարդները «Բազե»-ին հրաժեշտ կտան վաղը: Հավաքին մասնակցում են Հայաստանի Հանրապետությունից, Լեռնային Ղարաբաղի Հանրապետությունից, Ջավախքից ու սփյուռքից ժամանած երիտասարդներ, որոնք կազմել են 42 ջոկատներ՝ յոթական մասնակիցներով:


Հավաքի ընթացքում 18-30 տարեկան շուրջ 400 երիտասարդներ ուժերը չափեցին մարզական տարբեր խաղերում, ինտելեկտուալ ու մշակութային ամենատարբեր մրցույթներում և, իհարկե, հանդիպումներ կունենան պետական-քաղաքական ամենատարբեր գործիչների հետ:

Բացի մրցութային ծրագրերից, երիտասարդներին ուսուցանվել են ազգային պարեր, կազմակերպել են հայկական ֆիլմերի ցուցադրություններ:

Այս տարվա «Բազե» երիտասարդական հավաքի ջոկատներում առաջին անգամ ընդգրկվել էին նաև մարզերում գործող բուհեև, ինչպես նաև միջին մասնագիտական ուսումնական հաստատություններից:

Երիտասարդական հավաքի օրերին բազեականները հանդիպումներ են ունցել մի շարք քաղաքական ու հասարակական գործիչների հետ: