Պրեմիեր լիգայի մեկնարկից առաջ շարունակում ենք ծանոթանալ անգլիական թիմերում տիրող իրադրություններին:

«Ռեդինգ». Թիմը Պրեմիեր լիգա է վերադառնում կազմը հիմնովին փոխելուց հետո, որի կազմում չեն մնացել ոչ ոք, ով խաղացել էր Սթիվ Կոպելայի գլխավորությամբ: Ակումբի նախկին սկաուտը' Բրայան Մակդերմոտը, ով այժմ մարզում է թիմը, կարողացել է կառավարելի կոլեկտիվ ստեղծել և չնայած Չեմպիոնշիպում անհաջող մեկնարկին' կարողացան դուրս գալ Բարձրագույն խումբ:

Ակումբում փոխվել է նաև սեփականատերը. սըր Ջոն Մեդեյսկուն փոխարինել է ռուս բիզնեսմեն Անտոն Զինգարևիչը:
Թիմ է տեղափոխվել ռուս հարձակվող Պավել Պոգրեբնյակը, ով անցած մրցաշրջանի կեսը վարձավճարով անցկացրեց «Ֆուլհեմում»:

Հաջորդ մրցաշրջանում «Ռիդինգը», ամենայն հավանականությամբ, կպայքարի տեղը Պրեմիեր լիգայում պահպանելու համար:

«Սանդերլենդ». Անգլիայի հյուսիսում գտնվող այս ակումբը անցած մրցաշրջանը ավարտեց 13-րդ հորիզոնականում: Ինչպես երևում է, այդ արդյունքը լիովին բավարարում է թե թիմի սեփականատերերին և թե գլխավոր մարզիչ Մարտին Օնիլին: Քանի որ վերջինս չի փորձում ոչ մի ձեռքբերում կատարել, եթե, իհարկե, հաշվի չառնենք Լուի Սահային և Էնդի Քերոլին գնելու անհաջող փորձերը:

Իսկ «Սանդերլենդը» հզորացման կարիք ունի համարյա բոլոր դիրքերում, բացի դարպասապահից, որտեղ վստահորեն կանգնած է բելգիացի Սիմոն Մինոլեն:

«Սև կատուները» չունեն գոլահար ռմբարկու և այդ դիրքի բացակայությունը կարող է շատ լուրջ կերպով անդրադառնալ թիմի արդյունքների վրա:

Օնիլը դեռևս ժամանակ ունի, և հուսանք, որ թիմում կարվեն անհրաժեշտ գնումները: Իսկ հակառակ դեպքում ակումբին սպասվում է կենաց-մահու պայքար մրցաշարային աղյուսակի հետնամասում: 

«Սաուտհեմփթոն». Ակումբը բավականին երկար ժամանակ է, ինչ բացակայում էր Պրեմիեր լիգայից և վերադառնալով' միանգամից մասնագետների կողմից դիտարկվում է' որպես էլիտար լիգան լքելու հավակնորդ:

Թիմը տրանսֆերային բյուջեի հիմնական մասը ծախսել է «Բյորնլիի» հարձակվող Ջեյ Ռոդրիգեսի վրա (6 մլն ֆունտ), ինչպես նաև պայմանագիր է ստորագրել արգենտինացի դարպասապահ Գասանիգայի հետ:

Ազատ գործակալի կարգավիճակով թիմին է միացել շոտլանդական «Ռենջեսի» նախկին ավագ Սթիվեն Դևիսը:
Ինչպես ցույց է տալիս փորձը, պատմությունը, Պրեմիեր լիգա վերադարձած ակումբների մեծ մասին հաջողվում է հեշտ հարմարվել, եթե, իհարկե, նրանց կազմերում լինում են մեծ թվով փորձառու խաղացողներ: Հենց սա կարող է հանդիսանալ «Սոուտի» հաղթաթուղթը:

«Սթոք Սիթի». Թոնի Պուլինի ստեղծած հզոր ակումբը կշարունակի սեփական հարկի տակ վտանգավոր լինել յուրաքանչյուրի համար: Թիմը համալրվել է «Ռենջերսի» ակադեմիայի սան Ջեյմս Նեսայով և Մայքլ Կեյտլիով, ովքեր իդելական կերպով համապատասխանում են Պյուլիսնի քաղաքականությանը:

Դժվար թե «Բրիտանիայում» մտածեն եվրագավաթների մասին, սակայն նույն ժամանակ նրանք չեն մտածում նաև տեղը պահպանելու մասին:

Հարկ է նշել, որ թիմից հեռացել է փորձառու պաշտպան Ջոնաթան Վուտգեյտը և Պուլինսը տրանսֆերային պատուհանի վերջին օրերին կփորձի փոխարինող գտնել նրան:

«Սուոնսի». Ուելսյան ակումբը հիանալի կերպով իրեն դրսևորեց անցած մրցաշրջանում' զբաղեցնելով 11-րդ հորիզոնականը: Բայց դրանից հետո կորցրեց ոչ միայն գլխավոր մարզիչ Բրենդան Ռոջերսին, այլ նաև առաջատար կիսապաշտապան Ջոու Ալենին, ում շուրջ կառուցվում էր «կարապների» խաղը: Հավանական է համարվում նաև թիմից Սկոտ Սինկլերի և Էշլի Ուիլիամսի հեռանալը:

Միկաել Լաուդրուպը, ով պետք է շարունակի Ռոջերսի սկսածը, չի կարողանա որոշ հարցերին լուծում տալ առանց առաջատարների, և թիմի' հաջորդ մրցաշրջանում ձախողումը կարծես թե անխուսափելի է,
գումարած այն, որ դանիացի երիտասարդ մասնագետը Պրեմիեր լիգայում անփորձ է համարվում:

Պետք է նշել, որ թիմը մինչ այս համալրվել է միայն հարձակվող Միչուով:
Հեքիաթը կավարտվի, և գեղեցիկ կարապը կվերածվի անճոռնի ճուտիկի...

«Տոտենհեմ». «Չելսիի»' Չեմպիոնների լիգայում տարած հաղթանակից հետո «Բավարիայից» ոչ պակաս տուժեց նաև «Տոտենհեմը», քանի որ դի Մատեոյի տրիումֆից հետո «խթանները» ,չնայած նրան, որ զբաղեցրել էին 4-րդ հորիզոնականը, այժմ Չեմպիոնների լիգայի փոխարեն պետք է հանդես գան Եվրոպա լիգայում: Արդյունքում «Ուայտ Հարտ Լեյնից» հեռացավ նաև Հարի Ռեդնապը, ով 2006 թվականից սկսած թիմին միայն օգուտ էր բերել' նրան բարձրացնելով լրիվ այլ մակարդակի:

Այժմ թիմի ղեկին է «Չելսիում» անհաջող շրջան անցած երիտասարդ պորտուգալացի Անդրե Վիլաշ Բոաշը: Նա արդեն կարողացել է 2 արժեքավոր ձեռբերում կատարել' գնելով Ֆուլֆի Սիգուրդսոնին (իսլանդացին շատ տաղանդավոր է համարվում) և բելգիացի պաշտպան Յան Վերտոնգենին:

Միևնույն ժամանակ մոտակա ժամանակներս թիմը կարող է լքել խորվաթ կիսապաշտպան Լուկա Մոդրիչը, ում' Մադրիդի «Ռեալ» տեղափոխությունը արդեն «եղած» գործ է համարվում: Դժվար կլինի նաև թիմում պահել անգլիացի հարձակվող Ջերմեն Դեֆոյին, ով չի ստանում իր ցանկացած խաղային ժամանակը:

Հաշվի առնելով «Տոտենհեմի»' անցած տարվա խաղը և ներուժը' կարելի է եզրակացնել, որ թիմը ի զորու կլինի այս տարի պայքարելու Չեմպիոնների լիգայի վերջին ուղեգրի համար:

«Ուիգան». Ռոբերտո Մարտինեսի կոլեկտիվը հերթական անգամ հրաշքով փրկվեց և կրկին պետք է հանդես գա Պրեմիեր լիգայում: Միջմրցաշրջանային հատվածում «Լետիկսը» քիչ մնաց զրկվի գլխավոր մարզիչից, սակայն վերջին պահին Մարտինեսի և «Լիվերպուլի» սեփականատեր Ջոն Հենրի բանակցությունները մտան փակուղի:

«Ուիգանի» համար մեծ կորուստ կլինի, եթե «Չելսիին» այնուամենայնիվ հաջողվի պայմանագիր ստորագրել թիմի կիսապաշտպան Վիկտոր Մոզեսի հետ:

Անկասկած, կորուստներից և ձեռբերումներից զատ Մարտինեսը կշարունակի մնալ Պրեմիեր լիգայի ամենահանելուկային թիմի գլխավոր մարզիչը:

«Ֆուլհեմ». Մարտին Յոլին անցած մրցաշրջանում հաջողվեց գրավել 9-րդ հորիզոնականը, նույն ժամանակ թիմը լքեցին Ռոյ Հոջսոնի ժամանակ կարևոր խաղացողներից Էնդի Ջոնսոնը, Բոբի Զամորան և Դանի Մերֆին:

Չկարողանալով երկարաժամկետ պայմանագիր ստորագրել Պավել Պոգրեբնյակի հետ' Յոլը թիմ հրավիրեց Պետրիչին և Ռոդալեգային:

Հոլանդացի մասնագետը ծրագրում է որքան հնարավոր է երիտասարդացնել թիմի կազմը:
«Ֆուլհեմը» առաջիկա մրցաշրջանում տեղ կգրավի մրցաշարային աղյուսակի միջնամասում:

«Չելսի». Լոնդոնի «Չելսին» կարծես թե փոքր-ինչ փոխել է իր տրանսֆերային քաղաքականությունը. այժմ թիմը արդեն ավելի շատ ուշադրություն է դարձնում ֆուտբոլիստների տարիքին, իսկ մնացածը' ֆինանսական կողմը, մնացել է նույնը, այսինքն' «ազնվականները» շարունակում են ծախսել «խելքից» դուրս:

Մարկո Մարին, Էդեն Ազար և Օսկար. ահա նրանք են կերտելու «կապույտների» ապագան' գումարած նաև Խուան Մատային:
Դի Մատեոն փորձում է ապագայի թիմ ստեղծել, որը ցանկալի արդյունք կտա արդեն մոտակա մրցաշրջաններում:

Չնայած մեծ ձեռքբերումներին' «Չելսիին» բրիտանական մամուլը չի համարում չեմպիոնական տիտղոսի լուրջ հավակնորդ, այլ հակառակը' բավարարվում են' նրանց միայն լավագույն քառյակում պայքարելու թիմի կարգավիճակ տալով:

«Էվերտոն». Լիվերպուլյան այս ակումբին կարելի է համարել Պրեմիեր լիգայի վերջին տարիների ամենաստաբիլ թիմը: Բայց, միևնույն ժամանակ, պետք է փաստել, որ Մոյեսի սաները գնալով նահանջ են ապրում: Կար ժամանակ, երբ «Էվերտոնը» պայքարում էր եվրագավաթներում, իսկ հիմա նրանք չեն ցանկանում անգամ մտածել Եվրոպա լիգայի ուղղությամբ: Ամեն տարի կրկնվում է նույն սցենարը' անհաջող մեկնարկ, նորմալ շարունակություն, ապա կրկին բացթողումներ, և թիմը վերջնահաշվարկում զբաղեցնում է կամ 7, կամ 9, կամ է էլ 11-րդ հորիզոնականը:

Եթե Ռոդվելի հետքերով հեռանա նաև Լեյթոն Բենը, ապա Մոյեսին դժվար կլինի պահել թիմի հավասարակշռությունը:
«Գուդիսոն Պարկի» տերերին կարելի է կանխատեսել 8-10-րդ հորիզոնականները: