Այսօր «Շիրակի» հետ մեկ տարվա պայմանագիր կնքած Լևոն Պաչաջյանը armsport.am-ի հետ զրույցում պատմել է, թե ինչու որոշեց կարիերան շարունակել Գյումրին ներկայացնող ակումբում:

- Ամռանը փորձեցի կարիերաս արտասահմանում շարունակել, բայց ինչ-ինչ պատճառներով չստացվեց: Տրասնեֆերային պատուհանը փակվում էր, ու նպատահակահարմար գտա բանակցել տեղական ակումբների հետ: Առավել հարմար գտա «Շիրակից» եղած առաջարկը: Ակումբի ղեկավարության հետ հանդիպման ժամանակ եկանք ընդհանուր հայտարարի:

Ինձ համար պատիվ է հանդես գալ «Շիրակ» ակումբում: Այն ամենաերկար պատմություն ունեցող հայկական թիմն է, որը ներկայումս վերելք է ապրում: 21-րդ դարի սկզբում թիմը ճգնաժամում էր, սակայն նոր ղեկավարության օրոք «Շիրակը» կրկին պայքարում է ամենաբարձր տեղերի համար: Հայաստանի ներկայիս առաջնությունում «Շիրակը» չեմպիոնության հավակնորդներից է, այս տարի մեկ փուլ հաղթահարել է Եվրոպա լիգայում, իսկ մինչ այդ նվաճել էր Հայաստանի գավաթը: «Շիրակը» բավական հեռանկարային ակումբ է:


- Երեկ ներկա էիր առաջնության «Շիրակ»-«Փյունիկ» հանդիպմանը, որում գյումրեցիները հաղթեցին 2:1 հաշվով: Որքանո՞վ էր տրամաբանական գրանցված արդյունքը:


- Ընդհանուր առմամբ «Շիրակն» առավելություն ուներ, և արդյունքը տրամաբանական է: «Փյունիկում» հանդես են գալիս երիտասարդ ու անփորձ ֆուտբոլիստներ, ու դա զգացնել տվեց իրեն: «Շիրակի» հարկի տակ հանդես գալը շատ բարդ է, ինչում ես համոզվել եմ նախկինում` մեր առաջնությունում ունեցած ելույթների ընթացքում:


- Բնակվելու ես Գյումրիո՞ւմ:


- Այո', քանի որ ցանկալի չէ ամեն օր 2 ժամ վատնել ճանապարհի վրա: Գյումրիում բնակարան եմ վարձելու, իսկ ազատ օրերին կվերադառնամ Երևան: «Շիրակին» մերվելու խնդիրն էլ ինձ համար ավելի հեշտ է, քանի որ տղաներին ծանոթ եմ, իսկ Արմեն Տիգրանյանի ու Կարեն Ալեքսանյանի հետ հանդես ենք եկել «Փյունիկում» ու ազգային հավաքականում:


- 5 տարվա ընդմիջումից հետո վերադառնում ես Հայաստանի առաջնություն: Այս տարիների ընթացքում Բարձրագույն խմբում առաջընթաց նկատո՞ւմ ես:


- Վերջին 10 տարիների ընթացքում մեր առաջնության մակարդակը որոշակիորեն բարձրացել է այն ժամանակ, երբ ազգային հավաքականի խաղացողները եղել են հայկական ակումբներում: 2003-04թթ. երբ ազգային թիմը մարզում էր Ստոյկիցան, ու 2007թ. մեր առաջնության մակարդակը բարձր էր, բայց մի շարք խաղացողներ տեղափոխվեցին արտասահման: Ներկայիս առաջնությունը եթե համեմատենք այդ թվակաների հետ, ապա անկում կա, քանի որ ազգային թիմի շատ խաղացողներ հեռացել են: Ժամանակ է պետք, որ երիտասարդներն աճեն ու ասեն իրենց խոսքը: Ներկայումս նկատվում է, որ թե' երիտասարդկան, թե' ազգային հավաքականում կան լավ երիտասարդներ:


- Լևո'ն, դու Հայաստանի հավաքականում 37 խաղ ես անցկացրել, սակայն վերջին շրջանում հրավեր չես ստանում ազգային թիմից, ու ենթադրվում էր, որ պատճառներից մեկը Իրանի առաջնությունում հանդես գալն է: Հնարավո՞ր է, որ իրավիճակն այժմ փոխվի:


- Չեմ կարող ասել, թե ինչ կլինի, բայց պարզ է, որ, «Շիրակում» հանդես գալով, այս առումով ես շահում եմ, քանի որ այժմ մարզիչները մարզադաշտում արդեն կկարողանան տեսնել, թե որքանով եմ ես պատրաստ: Ես միայն հպարտ կլինեմ, եթե նորից հրավեր ստանամ ազգային հավաքականից: Հնարավոր ամեն բան կանեմ, որ ակումբին օգտակար լինեմ առաջնությունում:

Հ.Գ. Մոտ 10 օր առաջ Լևոն Պաչաջյանն ունեցավ երկրորդ զավակը. լույս աշխարհ եկավ Հարությունը, որը ֆուտբոլիստին անսահման երջանկություն պարգևեց: «Տղայիս ծնունդն ավելի մեծ շարժառիթ կտա ֆուտբոլում ինձ լավագույնս դրսևորելու համար: Շնորհակալ եմ բոլորից այս օրերին շնորհավորանքներ ուղարկելու համար»,-ասաց Լևոն Պաչաջյանը: