Tert.am –ի հավաստի տեղեկություններով՝ ԱԺ երեք պատգամավորների մասին ԱԺ էթիկայի հանձնաժողովի ստացած դիմում բողոքներից երկուսը վերաբերում են ԱԺ փոխխոսնակ, ՀՀԿ մամուլի քարտուղար Էդուարդ Շարմազանովին և ԱԺ «Հայ հեղափոխական դաշնակցություն» խմբակցության անդամ, պատգամավոր Արծվիկ Մինասյանին՝ DIY ակումբի պայթեցման հետ կապված վերջիններիս արած հայտարարությունների առնչությամբ:


Նկատենք, որ դիմում-բողոքի հեղինակը հայաստանյան հասարակական կազմակերպություններից մեկն է:


Հիշեցնենք, որ անդրադառնալով DIY ակումբի պայթեցմանը ՀՀԿ մամուլի խոսնակը հայտարարել էր. «Բոլոր նրանք, ովքեր փորձում են իրենց պաշտպանության տակ առնել մեր հասարակությունը այլասերող համասեռամոլներին, պղծում են հայերիս ազգային նկարագիրը»:


Ի դեպ, սրա կապակցությամբ լրագրող Ծովինար Նազարյանը Էդուարդ Շարմազանովին դիմել էր սթափվելու կոչով . «Էդիկ ջան, խնդրում եմ, սթափվիր, քանի ուշ չի: Դու չես կարող ֆաշիստանալ», ինչին ՀՀԿ խոսնակը հակադարձել էր.«Ծովինար ջան, իրավացի ես, ես չեմ կարող «ֆաշիստանալ» , քանի որ քրիստոնյա եմ: Այս դեպքում անտեղի է ֆաշիզմին հղում անելը, քանի որ իմ կարծիքը, որը կա ու կմնա նույնը այս հարցի վերաբերյալ, բխում է իմ քրիստոնեական սկզբունքներից»:


Իբրև խոսքի վերջաբան Էդուարդ Շարմազանովը բարեկամաբար կոչ էր արել՝ կարդալ աստվածաշնչյան հետևյալ տողերը. «Ամբարիշտին արդար ասողը պիտի արժանանա ժողովուրդների անեծքին և ատելի պիտի լինի ազգերից»:


Հիշեցնենք, որ DIY ակումբի պայթեցումը մեկնաբանվում էր որպես համասեռամոլներին պատժելու ակցիա:
Իսկ Արծվիկ Մինասյանն էլ, ում DIY ակումբի տիրուհի Ծոմակը՝ Արմինե Օգանեզովան, մեղադրում էր ակումբի մեջ պայթուցիկ նյութեր նետած երկու իրանահայ երիտասարդների կալանքը այլընտրանքային խափանման միջոցով փոխարինելու համար գրավ մուծելու մեջ, այդ օրերին իր հարցազրույցներից մեկում նշել էր. «Ծոմակի տեսակը ոչնչացնում է հայ հասարակությանը»:


Ի պատասխան հարցին, թե՝ ընտրական գրավը մուծել է սեռական փոքրամասնությունների նկատմամբ որոշակի դիրքորոշում ունենալո՞վ, Արծվիկ Մինասյանն ասել էր.«Իհարկե, այդպիսի դիրքորոշում էլ կա, բայց ես չեմ ուզում դա օգտագործենք որպես հիմնական հակադրություն»:


Այն տեղեկատվությունը, թե ԱԺ էթիկայի հանձնաժողովի ստացած դիմում բողոքներից երկուսը, իրո՞ք, վերաբերո՞ւմ են Արծվիկ Մինասյանին և Էդուարդ Շարմազանովին, այս պահին չհաջողվեց պաշտոնապես պարզել ոչ՛ հանձնաժողովի անդամներից, ոչ՛ էլ հիշյալ պատգամավորներից:


Տեղեկացնենք, որ համաձայն «ԱԺ կանոնակարգ-օրենքի» 24. 4 հոդվածի 1-ին կետի «բ» ենթակետի՝ հանձնաժողովի նիստերը դռնփակ են, բացառությամբ այն դեպքերի, երբ դիմումում նշված պատգամավորն առաջարկում է նիստերն անցկացնել դռնբաց:


Մյուս կողմից, մինչև հանձնաժողովում քննարկվող դիմումի վերաբերյալ վերջնական եզրակացության կամ որոշման ընդունումը, դիմումի բովանդակությունը հրապարակման ենթակա չէ, բացառությամբ սույն կետի «բ» ենթակետի:


Այսինքն՝ երբ պատգամավորն ինքն է պնդում, որ նիստն անցկացվի դռնբաց, հետևաբար, այս մասին մեկնաբանություն տալուց հետո պատգամավորը կարող է դառնալ Էթիկայի հանձնաժողովի քննարկման «առարկա»:


Պարզելու նպատակով, թե, արդյո՞ք, Արծվիկ Մինասյանն ու Էդուարդ Շարմազանովը չեն պահանջում դռնբաց անցկացնել հանձնաժողովի նիստերը, Tert.am-ը փորձեց կապ հաստատել երկու պատգամավորների հետ, սակայն Էդուարդ Շարմազանովը գտնվում է արձակուրդում և այժմ Հունաստանում է, իսկ Արծվիկ Մինասյանի հեռախոսահամարն անջատված էր:


Հիշեցնենք, որ այսօր «Փաստինֆո» գործակալությունը, առանց որևէ աղբյուրի հղում անելու, տեղեկացրել էր, որ ԱԺ Էթիկայի հանձնաժողովի օգոստոսի 31-ի նիստի օրակարգում ընդգրկված է Արարատի մարզի Դվին գյուղի բնակիչ Արթուր Զադոյանի դիմումի քննության վերաբերյալ հարցը: