ՀՀ վարչապետ Տիգրան Սարգսյանի փոփոխության, և առհասարակ, տնտեսության հետ կապված որևէ հարց և հարցադրում Հայաստանի Հանրապետական կուսակցությունում չի քննարկվել և օրակարգում չի եղել: Այս մասին Tert.am –ի հետ զրույցում նշեց ԱԺ «Հայաստանի Հանրապետական կուսակցության» խմբակցության անդամ Հովհաննես Սահակյանը՝ ավելացնելով.«Առավել ևս, դրա քաղաքական պահանջն էլ չկա: Եվ եթե կան խնդիրներ, ապա քաղաքական ուժերը, գործիչներն ազատ են իրենց առաջարկները ներկայացնելու և՛ ԱԺ, և՛ տարբեր հարթակներում դրանք քննարկելու»:

Հիշեցնենք, որ վերջին շրջանում կրկին ակտիվորեն սկսել է շրջանառվել վարչապետի հնարավոր փոփոխության հարցը (ավելին, երեկ լրատվամիջոցներից մեկը կոնկրետ հնարավոր սցենար էր մատնաշել, ըստ որի, ԲՀԿ-ն կմիանա կոալիցիային, եթե պաշտոնանկ արվի Տիգրան Սարգսյանը- Tert.am), իսկ այսօր ԲՀԿ առաջնորդ Գագիկ Ծառուկյանը Zham.am –ին տված հարցազրույցում անուղղակի, բայց քննադատել էր Կառավարության ղեկավարին:

«Ծառուկյանն արդեն քանի տարի է ասում է, որ երկրի տնտեսության վիճակը լավ չէ, ժողովրդի սոցիալական վիճակը ծանր է, արտագաղթի տեմպերը մտահոգիչ են: Մարդկանց մոտ հուսալքությունն ուժեղանում է: Քանի՞ տարի է` ես ասում եմ՝ երկրում լուրջ փոփոխություններ են պետք: Նաև հենց այդ պատճառով մենք հրաժարվեցինք մաս կազմել կոալիցիային: Չի կարող երկրի մյուս ոլորտներում անկում լինի, լճացում լինի, իսկ սպորտում` միայն փայլուն հաղթանակներ լինեն»,- որպես Հայաստանի օլիմպիական կոմիտեի նախագահ Գագիկ Ծառուկյանը հավելել էր, որ ամեն տարի Հայաստանից տասնյակ հազարավոր արտագաղթողների թվում և՛ խոստումնալի սպորտսմեններ կան, և՛ ապագայի չեմպիոններ ու մեդալակիրներ:

ՀՀԿ-ական պատգամավոր Հովհաննես Սահակյանը հավելեց, թե նման լուրերի տարածումը «որոշակի ֆոն» ստեղծելու նպատակ է հետապնդում, սակայն իբրև ՀՀԿ քաղխորհդի անդամ վերջինս նշեց, թե պատրաստ են երկրի տնտեսությանը, մշակույթին, սպորտին վերաբերող ցանկացած հարց քննարկել և ներկայացնել իրենց տեսակետները:

Ի պատասխան մեր այն հարցին, թե ԲՀԿ առաջնորդն իր հարցազրույցում խոսել էր կոնկրետ երևույթների՝ արտագաղթի բարձր տեմպերի ու ժողովրդի սոցիալական ցածր մակարդակի մասին, ՀՀԿ-ական պատգամավորը նկատեց, որ նման քննադատություն եղել է նաև նորընտիր Ազգային ժողովում Կառավարության ծրագրի հաստատման ժամանակ, ինչի վերաբերյալ ՀՀԿ-ն իր կարծիքը ներկայացրել էր, իսկ Կառավարությունն էլ իր հերթին՝ «տնտեսության վիճակն ու աճի տեմպերը»:

Հիշեցնենք, որ այսօրվա հարցազրույցում Գագիկ Ծառուկյանը նաև դժգոհել էր, որ կան մարդիկ, ովքեր իրեն ոչնչով չաջակցելով՝ մեր մարզական հաղթանակների կայացման գործում, իր տպավորությամբ՝ անհամբեր սպասել են մեր մարզիկների անհաջողություններին, իսկ ամեն մեդալից հետո անկեղծորեն տխրել են:

Հովհաննես Սահակյանը կցանկանար, որպեսզի սպորտը չկապվեր ո՛չ տնտեսության, ո՛չ քաղաքականության հետ. «Ընդամենը պետք է ասել, որ մենք ունեցանք և՜ հաղթանակներ, և՜ պարտություններ, որոնցից կարելի է դասեր քաղել, որպեսզի հաջորդ կարևոր մրցաշարերին ունենանք առավել մեծ հաջողություններ»:

Օգտվելով առիթից՝ հանրապետական պատգամավորը խորին շնորհակալություն հայտնեց Լոնդոնի օլիմպիական խաղերին մասնակցած բոլոր մարզիկներից, ովքեր հուզիչ պահեր պարգևեցին հայաստանյան մարզասեր և ոչ մարզասեր հասարակությանը:

« Մենք հպարտանում ենք և՛ մեդալներ նվաճած մարզիկներով, և՛այն մարզիկներով, ովքեր այս կամ այն պատճառով ունեցան որոշակի ձախողումներ»,- ասաց Հովհաննես Սահակյանը: