Առանց մեկնաբանությունների. Գ. Կոստանյանի դիմումի մասին հարցին պատասխանեցին ՌԴ գլխավոր դատախազի գրասենյակից

Առանց մեկնաբանությունների.  Tert.am-ը նման պատասխան ստացավ Ռուսաստանի Դաշնության գլխավոր դատախազության լրատվամիջոցների հետ փոխգործակցության վարչությունից՝ ի պատասխան հարցի, թե քննարկվել է արդյոք Վալերի Պերմյակովին  ՀՀ 7 քաղաքացիների սպանության դեպքի առթիվ հարուցված քրեական գործի վարույթը  ՀՀ իրավապահ մարմիններին փոխանցելու վերաբերյալ միջնորդությունը և ինչ ընթացք կարելի է ակնկալել:

Սույն վարչության աշխատակցուհին, որ ավելի վաղ խոստացել էր ճշտել, մեկ ժամ անց ասաց. «Գիտեք՝ հնարավոր չեղավ ճշտել, այնպես որ՝ առանց մեկնաբանությունների»:

Աշխատակցուհին, ճշգրտող հարցին, թե «առանց մեկնաբանությունների»-ն, միայն այսօրվան է վերաբերվում, թե  առհասարակ, ասաց, որ միայն այսօրվան:

Հիշեցնենք, որ ՀՀ գլխավոր դատախազ Գևորգ Կոստանյանը, ղեկավարվելով ՀՀ և ՌԴ միջև ՀՀ տարածքում  ռուսաստանյան ռազմական բազայի գտնվելու հետ կապված գործերով իրավասության և փոխադարձ իրավական օգնության հարցերի վերաբերյալ համաձայնագրի 6-րդ հոդվածով, հունվարի 12-ին Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը  ՀՀ իրավապահ մարմիններին փոխանցելու վերաբերյալ միջնորդությամբ  դիմել է ՌԴ գլխավոր դատախազ Յու. Չայկային։ Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։

Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր անց մահացել: