Երկու հայ է մահացել Թբիլիսի ավերիչ հեղեղի հետևանքով. հայերն այսօր կօգնեն փրկարարներին

Երեկ ուշ երեկոյան հայտարարվել է Թբիլիսիի ավերիչ ջրհեղեղի զոհերի պաշտոնական թիվը՝ 14 մարդ, որոնց թվում երկու հայ կին կա՝ Եղիազարովա քույրերը, 15-20-ն էլ համարվում են անհետ կորած: Այս մասին Tert.am-ին հայտնեց Վրաստանի նախկին նախագահի նախկին ազգային հարցերով խորհրդական Վան Բայբուրդը:

«Այսօր ժամը  11-ին Սուրբ Էջմիածնին կից գործող «Հայարտանը» պետք է հավաքվեն հայեր, որպեսզի որպես կամավորների գան  փրկարարներին օգնելու»,- ավելացրեց Վան Բայբուրդը:
 

Նրա տեղեկացմամբ`  Վրաստանում սուգ է հայտարարված, բայց  ոչ աշխատանքային օր՝ միայն Թբիլիսիում, որպեսզի կամավորները փրկարարներին օգնելու հնարավորություն ունենան:

Նա տեղեկացրեց, որ երեկ կեսգիշերին ելույթ է ունեցել Թբիլիսիի կենդանաբանական այգու տնօրենը և հայտնել, որ ջրհեղեղից փախած մոտ 80 գազանի, հավանաբար, ջուրը քշել տարել է, որովհետև դրանցից շատերին քնաբեր ներարկումներ էին արել:

Երեկ խոսակցություններ էին պտտվում, որ գազանանոցից փախած առյուծների, վագրերի, արջերի ու գայլերի մի մասը փախել է անտառ, սակայն Վան Բայբուրդը կրկնեց Թբիլիսիի կենդանաբանական այգու տնօրենի խոսքերը, որ գազանները պետք է անկած լինեն` ջուրը տանելու հետևանքով: