Նախագահի ելույթը բոլորիս սթափվելու կոչ էր, որ վեր կանգնենք ներանձնային շահերից. Ռուզաննա Մուրադյան

Ազգային ժողովի «Հանրապետական» խմբակցության անդամ Ռուզաննա Մուրադյանն այսօր լրագրողների հետ հանդիպման ընթացքում անդրադառնալով ՀՀ Նախագահի ելույթին, ասաց, թե այն յուրօրինակ ուղերձ էր՝ ուղղված բոլորին, ՀՀ քաղաքացուց մինչև ամենամեծ պաշտոնյա:

«Շեշտադրումներից կարևոր էր այն դրույթը, որ սահմանադրության փաստաթուղթը դառնում է ազգային համաձայնության փաստաթուղթ»,-ասաց Ռուզաննա Մուրադյանը, շարունակելով. «Կարևոր է, որ քաղաքական համակարգերը ձևավորում են կուսակցությունները: Կուսակցություններին է տրված գործադիր մարմինը ձևավորելու գործընթացը: Կուսակցություններին ևս մեկ մարտահրավեր հնչեցվեց, որ պետք է կարողանան մրցակցություն ապահովվել, դաշինքներ ստեղծել»:

Պատգամավորն ասաց, թե երբ նախագահն իր ելույթում խոսում էր նրա մասին, որ կուսակցությունների դերակատարությունը պետք  է բարձրանա, նախագահը չէր խոսում միայն «Հանրապետական» կուսակցության մասին:

«Այնտեղ քննադատություն կար իշխանության մեջ գտնվողների նկատմամբ: Ելույթը և՛ յուրօրինակ գնահատական էր, և՛ ապագայի տեսլական էր, և՛ բոլորիս սթափվելու կոչ էր, որ վեր կանգնենք ներանձնային շահերից»,-ասաց Ռուզաննա Մուրադյանը:

ՀՀԿ-ական պատգամավորն ասաց, թե պետք է կյանքի կոչել արված բոլոր կոչերը և կյանքի կոչել սահմանադրության փաստաթուղթը: