Վերջին անգամ իրար հետ հեռախոսով Շերամ երգեցինք. Գագիկ Սուրենյան

Հայ մեծ երգչուհի, ԽՍՀՄ ժողովրդական արտիստ Օֆելյա Համբարձումյանը հայ երգարվեստում մի գագաթ էր, որն այդպես էլ անգերազանցելի ու անհաղթահարելի մնաց: Tert.am-ի հետ զրույցում հայտարարեց ՀՀ ԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը, որը  Օֆելյա Համբարձումյանի մտերիմ էր  ու անգամ երգչուհու մասին ֆիլմ է  նկարել:

«Օֆելյա Համբարձումյանը տիտան էր, այդ ֆիլմում ամփոփված է նրա ողջ կյանքը` ծնված օրվանից: Եվ ֆիլմը նկարելիս մեր ցանկությունն է եղել, որ  մարդիկ տեսնեն, թե ինչ ենք ունեցել, որովհետև  նա մի գագաթ էր հայ ժողովրդական երգում, որն այդպես էլ անգերազանցելի մնաց ու անհաղթահարելի: Նա ստեղծեց մի ոճ, որը կոչվում է օֆելյահամբարձումյանական: Նրա կատարումները ոչ մեկի հետ չես կարող շփոթել»,- ասաց Գագիկ Սուրենյանը` կարևորելով այն, որ երգչուհին հայ գուսանական երգը մաքրեց ավելորդ  «կլկլոցներից  ու ծվծվոցներից»:

Ըստ Գագիկ Սուրենյանի` ականավոր երգչուհին, որի հետ գրեթե ամեն օր շփվել է, որևէ հիվանդությամբ չէր տառապում և մահացավ 91 տարեկանում` ծերությունից:

Հիշեցնենք, որ Օֆելյա Համբարձումյանի մասին Գագիկ Սուրենյանի նկարահանած ֆիլմի պրեմիերան վերջերս էր կայացել, իսկ հիմա հեղինակները ցանկանում են այն տանել շրջագայությունների` սփյուռք:

Գագիկ Սուրենյանը  երգչուհու հետ շփվել է մի քանի օր առաջ. երգչուհին զանգել էր,  երկար խոսել էին, նույնիսկ երկուսով  Շերամ են երգել:

«Մենք  իր հետ համարյա ամեն օր խոսում էինք, բայց այդ օրը  նա գրեթե 30 րոպե կանքի մասին խրատ էր տալիս»,- պատմեց Գագիկ Սուրենյանը:

Չնայած  մշտական  շփումներին` Գագիկ Սուրենյանն ասում  է, որ  երգչուհի հետ շփվելիս`մշտապես մարմնով սարսուռ է  անցել ու գիտակցել է, որ շփվում է մարդ-դարաշրջանի հետ: