Թուրք ապստամբները ֆրեգատ են զավթել և պատանդ վերցրել Թուրքիայի ՌԾՈՒ հրամանատարին. Reuters (լուսանկարներ, տեսանյութ)

ԹԱՐՄԱՑՎՈՒՄ Է

17:30

Հունաստանի իշխանությունները առաջիկայում կհանձնեն թուրքական ուղղաթիռն ու հեղաշրջման կողմնակից թուրք զինվորականներին

Հունական իշխանությունները պատրաստվում են առաջիկայում թուրքական իշխանություններին վերադարձնել թուրքական ռազմական ուղղաթիռով Ալեքսանդրուպոլիս հասած 8 զինվորականներին, որոնք հեղաշրջման փորձի կողմնակիցներ են։

 

Ինչպես տեղեկացնում է РИА Новости գործակալությունը, այդ մասին հայտարարել է Հունաստանի կառավարության պաշտոնական ներկայացուցիչ Օլգա Գերովասիլին։

Նրա խոսքով՝ Հունաստանի կառավարությունը Թուրքիայի հետ քննարկել է հնարավորինս արագ ուղղաթիռը վերադարձնելու հնարավորությունը, ինչպես նաև համոզվել է, որ հեղաշրջման կողմնակիցների նկատմամբ միջազգային իրավունքի բոլոր գործընթացները կպահպանվեն։

Նա նաև  նշել է, որ որ ձերբակալվածները մեղադրվում են իրենց երկրում սահմանադրական կարգը խախտելու համար։

Ավելի վաղ հաղորդվել էր, որ Թուրքիամ Հունաստանին է դիմել՝ փախուստի դիմած զինվորականներին վերադարձնելու խնդրանքով։

 

16:59  

Թուրքիայի օդուժի գլխավոր հրամանատարն առևանգվել է հարսանյաց հանդիսության ընթացքում

 

Թուրքիայում պետական հեղաշրջման կողմնակիցները երկրի օդուժի գլխավոր հրամանատար Աբիդին Ունալին առևանգել են իր ենթակայի դստեր հարսանիքի ժամանակ. հայտնում է թուրքական En Son Haber կայքը։

 

Հարսանեկան  խնջույքի ժամանակ Ստամբուլում վայրէջք է կատարել 5 ուղղաթիռ, որում եղել են հեղաշրջման կողմնակիցները։ Նրանք իրենց հետ վերցրել են Ունալին և այլ սպաների։

 

Այս պահին թուրք զինվորականներն աշխատում են Ունալին ազատ արձակելու ուղղությամբ, որը, լրատվամիջոցների տվյալներով, դեռ որպես պատանդ է պահվում։

Հիշեցնենք, որ գիշերը Թուրքիայում հեղաշրջման փորձ է տեղի ունեցել։ Թուրքիայի ԶՈՒ գլխավոր շտաբի ղեկավարի ժամանակավոր պաշտոնակատար Ումիթ Դունդարը հայտնել է, որ Թուրքիայում հեղաշրջման փորձի հետևանքով սպանվել է մոտ 200 մարդ: Ձերբակալվել է ավելի քան 2.800 մարդ։

15:32 

Էրդողանը վերադառնում է Անկարա

 

Թուրքիայի նախագահ Ռեջեփ Թայիփ Էրդողանը Ստամբուլից մեկնել է Անկարա, տեղեկացնում է Haberturk-ը։

 

Էրդողանը Ստամբուլ էր ժամանել այսօր և երկար ժամանակ գտնվում էր Աթաթուրքի անվան օդանավակայանի շենքում:

 

Հիշեցնենք, որ գիշերը Թուրքիայում հեղաշրջման փորձ է տեղի ունեցել։ Թուրքիայի ԶՈՒ գլխավոր շտաբի ղեկավարի ժամանակավոր պաշտոնակատար Ումիթ Դունդարը հայտնել է, որ Թուրքիայում հեղաշրջման փորձի հետևանքով սպանվել է մոտ 200 մարդ: Ձերբակալվել է ավելի քան 2.800 մարդ։

 

15:30 

Թուրքիայում զայրացած ամբոխը հարձակվել է ապստամբած զինվորականների վրա (լուսանկարներ)

 

Ստամբուլում զինվորականները, ովքեր լույս շաբաթ մի քանի տանկով արգելափակել էին Բոսֆորի նեղուցը, առավոտյան զենքերը հանձնելուց հետո զայրացած ամբոխի կողմից հարձակման են ենթարկվել:

 

Ոստիկանությունը ստիպված է եղել միջամտել և օդ կրակել՝ պաշտպանելու համար հանձնվող զինվորականներին զայրացած ամբոխից, ովքեր բռունցքներով և ոտքերով, ինչպես նաև փայտով հարվածներ են սկսել հասցնել ապստամբներին:

 

Սոցցանցերում նաև լուսանկարներ են հայտնվել Բոսֆորի կամրջի վրա տեղի ունեցած դեպքերից: Լուսանկարներում երևում է, որ զինվորականներին հարվածում են գոտիներով: Մարդիկ նաև բարձրանում են ռազմական տեխնիկայի վրա և սելֆի անում:

 

 

15:11

Անկարայի քաղաքապետը հայտարարել է, որ ռուսական Սու-24-ը խոցողներից մեկը մասնակցել է երկրում հեղաշրջման փորձին

 

Անկարայի քաղաքապետը հայտարարել է, որ Թուրքիայում հեղաշրջման փորձին մասնակցել է ռուսական Սու-24 ռմբակոծիչը խոցողներից մեկը։

 

Ինչպես տեղեկացնում է РИА Новости գործակալությունը, քաղաքապետ Մելիհ Գյոքչեքը հայտարարել է, որ նա Գյուլենական շարժման մասնակից է եղել։

 

Մելիհ Գյոքչեքը նաև Ֆեթուլլահ Գյուլենի կազմակերպությանը մեղադրել է Ռուսաստանի հետ հարաբերությունները փչացնելու, ինչպես նաև համաշխարհային քաղաքականության մեջ Թուրքիային մեկուսացնելու փորձի համար։

 

Ռուսական Սու-24-ը խոցվել էր անցյալ տարվա նոյեմբերին՝ թուրք-սիրիական սահմանի մոտակայքում։ Դրանից հետո կտրուկ վատացել էին ռուս-թուրքական հարաբերությունները, որոնց կարգավորման գործընթացը վերսկսվել է օրեր առաջ։

 

14:57

Թուրք ապստամբները ֆրեգատ են զավթել և պատանդ վերցրել Թուրքիայի ՌԾՈՒ հրամանատարին. Reuters

Թուրքիայում ռազմական հեղաշրջման փորձի մասնակիցները պատանդ են պահում երկրի ռազմածովային ուժերի հրամանատարին: Այդ մասին հայտնում է Reuters-ը՝ վկայակոչելով Հունաստանի պաշտպանության նախարարությանը:

 

Հույն զինվորականների տվյալներով՝ ապստամբները նաև զավթել են Թուրքիայի ռազմածովային ուժերի ֆրեգատներից մեկը Գյոլջուք քաղաքում գտնվող բազայում:

 

Լույս հուլիսի 16-ին զինվորականների խումբը փորձել է ռազմական հեղաշրջում կատարել Թուրքիայում: Անկարայի և Ստամբուլի փողոցներ ռազմական տեխնիկա է դուրս եկել, լսվել են կրակոցներ և պայթյուններ: Նախագահ Ռեջեփ Թայիփ Էրդողանը հայտարարել է, որ հեղաշրջման փորձը տապալվել է և ամբողջությամբ կճնշվի:

 

14:21

Հեղաշրջման փորձի բոլոր կազմակերպիչները հայտնի են. ձերբակալվածների թիվը հասել է 2.839-ի. Յըլդըրըմ

Թուրքիայի վարչապետ Բինալի Յըլդըրըմը ԶՈՒ գլխավոր շտաբի պետ Հուլուսի Աքարի հետ համատեղ հայտարարությամբ է հանդես եկել ու ցավակցել է զոհերի ընտանիքներին, ողջունել հեղաշրջման փորձը կանխելու համար փողոցներ դուրս եկած քաղաքացիներին։

 

Ինչպես տեղեկացնում է «Անադոլու» գործակալությունը, Յըլդըրըմը հայտարարել է, թե Թուրքիան շատ մեծ փորձանքից փրկվեց, ինչի համար գոհունակություն է հայտնել Աստծուն։

 

Նա հայտարարել է, որ հեղաշրջման փորձի բոլոր կազմակերպիչները հայտնի են։ Ձերբակալվածների թիվը հասել է 2.839-ի։

 

Հիշեցնենք, որ գիշերը Թուրքիայում հեղաշրջման փորձ էր տեղի ունեցել։ Թուրքիայի ԶՈՒ գլխավոր շտաբի ղեկավարի ժամանակավոր պաշտոնակատար Ումիթ Դունդարը հայտնել է, որ Թուրքիայում հեղաշրջման փորձի հետևանքով սպանվել է մոտ 200 մարդ:

13:34

Յըլդըրըմը բնակչությանը կոչ է արել մինչ գործողությունների ավարտը դուրս չգալ հրապարակներից

Թուրքիայի վարչապետ Բինալի Յըլդըրըմը Twitter-ում 38 վայրկյան տևողությամբ տեսանյութ է տարածել՝ երկրի բնակիչներին կոչ անելով չլքել հրապարակները։

Ինչպես տեղեկացնում է «Անադոլու» գործակալությունը, Յըլդըրըմը դիմել է քաղաքացիներին՝ կոչ անելով հավաքվել հրապարակներում և փողոցներում։

«Ձերբակալությունները շարունակվում են։ Մեր քաղաքացիներին կոչ եմ անում չլքել հրապարակները՝ մինչ այս ամենը ավարտվի։ Անկարայի, Ստամբուլի բոլոր հրապարակներում հավաքվելը հատկապես կարևորում եմ։ Մեր աշխատանքներն ընթանում են ըստ պլանավորածի։ Աստծո կամքով այս ահաբեկչական խմբավորման անդամներին կչեզոքացնենք»,-ասել է վարչապետը։

Հիշեցնենք, որ գիշերը Թուրքիայում հեղաշրջման փորձ էր տեղի ունեցել։ Թուրքիայի ԶՈՒ գլխավոր շտաբի ղեկավարի ժամանակավոր պաշտոնակատար Ումիթ Դունդարը հայտնել է, որ Թուրքիայում հեղաշրջման փորձի հետևանքով սպանվել է մոտ 200 մարդ:

 Հեղաշրջման փորձի ընթացքում զոհվածներից 41-ը ոստիկան են, 47-ը՝  քաղաքացիական անձ, 104-ը՝ «դավադիրներ»:

 

Ձերբակալվել է հեղաշրջման փորձի մասնակից 1.563 զինվորական:

 

13:04 

Թուրքիայում հեղաշրջման փորձի հետևանքով սպանվել է մոտ 200 մարդ. թուրք պաշտոնյա

Թուրքիայի ԶՈՒ գլխավոր շտաբի ղեկավարի ժամանակավոր պաշտոնակատար Ումիթ Դունդարը հայտնել է, որ Թուրքիայում հեղաշրջման փորձի հետևանքով սպանվել է մոտ 200 մարդ, հայտնում է Associated Press-ը:

 

Գլխավոր շտաբի ղեկավարի ժամանակավոր պաշտոնակատարը հայտնել է, որ Թուրքիայում հեղաշրջման փորձի ժամանակ բախումների հետևանքով զոհվել է ավելի քան 190 մարդ՝ 41 ոստիկան, 2 զինվոր, 47 քաղաքացիական անձ, 104 մարդ հեղաշրջման աջակիցների կողմից՝ այսպես կոչված «դավադիրներ»:

 

«Հեղաշրջման փորձը տապալվել է»,- իր ելույթում հայտարարել է գեներալ Դունդարը: Նրա խոսքով՝ 1563 զինվորական, ով մասնակցել է հեղաշրջմանը, ձերբակալվել է:

 

12:29

Թուրքիայում հազարավոր մարդիկ արձագանքել են փողոց դուրս գալու Էրդողանի կոչին՝ տապալելով հեղաշրջման փորձը

 

Թուրքիայի զինվորականների ձեռնարկած հեղաշրջման փորձը տապալվել է այն բանից հետո, երբ հազարավոր մարդիկ արձագանքել են նախագահ Ռեջեփ Թայիփ Էրդողանի կոչին՝ դուրս գալ փողոց՝ իրեն աջակցելու համար:

 

Տասնյակ ապստամբ զինվորներ թողել են իրենց տանկերը Ստամբուլում, հայտնում է Reuters գործակալությունը:

 

Էրդողանի հաջող տապալումը կլիներ Միջին Արևելքում ամենամեծ փոփոխություններից մեկը: Տապալված հեղաշրջման փորձն ինքնին կարող է ապակայունացնել երկիրը, գրում է գործակալությունը:

 

Էրդողանը, ով հանգստանում էր երկրի հարավարևմտյան ափին, հեղաշրջման փորձից հետո վերադարձել է Ստամբուլ: Նա Աթաթուրքի անվան օդանավակայանում ասուլիս է տվել։

 

«Այս քայլը դավաճանական քայլ էր, հեղաշրջման փորձ, և հայրենիքի այդ դավաճանության գինը ծանր է լինելու»,-ասել է Էրդողանը:

 

Reuters-ը նաև հայտնում է, որ Թուրքիայի նախագահի աջակիցները հարձակվել են հեղաշրջման փորձին մասնակցած մի խումբ զինվորների վրա, ովքեր հանձնվել են Ստամբուլի կամրջի վրա՝ մինչ ոստիկանությունը կմիջամտեր նրանց ազատելու համար:

 

 

11:43 

Թուրքիայի բնակիչներն Էրդողանի անունից փողոց դուրս գալու կոչով SMS են ստացել

Թուրքիայի որոշ բնակիչներ sms հաղորդագրություններ են ստացել Թուրքիայի նախագահ Ռեջեփ Թայիփ Էրդողանի անունից՝ «ժողովրդավարությունը պահպանելու» և փողոց դուրս գալու կոչով: Այդ մասին հայտնում են Facebook սոցիալական ցանցի թուրք օգտատերերը, գրումէ РИА Новости-ն:

«Թուրք ազգի զավակներ, այս շարժումը փորձ է, ինչպես և 1970-ականներին, ուղղված թուրք ազգի դեմ՝ Ստամբուլում և Անկարայում զենքի և տեխնիկայի գրավման ճանապարհով: Հարգելի՛ թուրք ժողովուրդ, պահպանե՛ք ժողովրդավարությունը և խաղաղությունը: Ես հրավիրում եմ ձեզ փողոց դուրս գալ այս փոքր խմբերի դեմ, որոնք կարծում էին, թե կարող են կոտրել թուրք ազգին: Պահպանե՛ք ձեր կառավարությունը և ազգը»,- այս տեքստն է մեջբերել Թուրքիայի բնակիչներից մեկը:

SMS ստացած թուրք քաղաքացիների մոտ հաղորդագրությունն ուղարկողի անվան տեղում նշված է ոչ թե հեռախոսահամար, այլ RTERDOGAN:

Հայտնի չէ, թե արդյոք այդ տեքստը Թուրքիայի առաջնորդի անունից պաշտոնական հաղորդագրություն է, թե ոչ:

11:32 

Նախնական տեղեկություններով Թուրքիայում տեղի ունեցած իրադարձությունների ժամանակ ՀՀ քաղաքացիներ կամ հայեր չեն տուժել. Այս մասին Twitter-ի իր էջում տեղեկացնում է ՀՀ ԱԳՆ խոսնակ Տիգրան Բալայանը: 


Նա նաև զգուշացնում է,որ Թուրքիայի տարածքում աջակցության կարիք ունեցող ՀՀ քաղաքացիները պետք է դիմեն ՀՀ ԱԳՆ, քանի որ այլ երկիր ՀՀ-ի շահերը Թուրքիայում չի ներկայացնում։

 

11.25

Թուրքիայում զոհերի թիվը հասել է 90-ի, ձերբակալվածների թիվը 1500-ից ավելի է

Թուրքիայում հեղափոխության փորձի գործով ձերբակալված զինվորականներ թիվն անցել է 1500-ը:

 Ինչպես տեղեկացնում է Reuters գործակալությունը, այդ մասին հայտնել են թուրքական իրավապահ մարմինների աղբյուրները:

 

Թուրքիայի կառավարությունը շարունակում է վերահսկողություն սահմանել երկրում: AFP գործակալությունը հաղորդում է, որ խորհրդարանի արտակարգ նիստ է հրավիրված:

 

Պետական հեղաշրջման փորձի ընթացքում զոհերի թիվը հասել է 90-ի:

 

Ըստ ճշտված տվյալների՝ վիրավորվել է 1.154 մարդ: Հիմնականում բախումներ են ընթացել երկրի մայրաքաղաք Անկարայում, ամենամեծ քաղաքում՝ Ստամբուլում, ինչպես նաև Մարմարիս հանգստավայր քաղաքի այն հյուրանոցի մոտ, ուր հանգրվանել էր երկրի նախագահ Ռեջեփ Թայիփ Էրդողանը:

 

 –––––––––––––––––––––––––––––––––––––––––––––––––––––––––––––––––––––––––––––––––––

Թուրքիայում լույս հուլիսի 16-ին իրականացված ռազմական հեղաշրջման փորձը շարունակում է մնալ համաշխարհային բոլոր լրատվամիջոցների ուշադրության կենտրոնում:

 

Գիշերը թուրք զինվորականները հայտարարել էին, որ տապալել են երկրի իշխանությունները՝ սահմանադրական կարգուկանոնը և մարդու իրավունքների հետ կապված իրավիճակը վերականգնելու համար:

 

Փակվել էր Ստամբուլի Աթաթուրքի անվան միջազգային օդանավակայանը, աշխատանքը դադարեցրել էր պետական հեռուստատեսությունը: Ողջ երկրով մեկ պարետային ժամ էր հայտարարվել: 

 

Չնայած զինվորականները հայտարարում էին իշխանությունը վերցնելու մասին, երկրի փոխվարչապետը հանդես եկավ հայտարարությամբ՝ նշելով, որ իրենք շարունակում են մնալ իշխանության գլխին:

 

Ավելի ուշ հայտարարությամբ հանդես եկավ երկրի վարչապետ Բինալի Յըլդըրըմը՝ հայտարարելով, որ տեղի է ունեցել հեղաշրջման փորձ և որ Թուրքիայի օդային ողջ տարածքը, առանց իրենց թույլտվության, փակվել է թռչող ինքնաթիռների համար:

 

Չնայած դրան՝ միջազգային լրատվամիջոցները հայտարարեցին, որ Թուրքիայի նախագահ Ռեջեփ Թայիփ Էրդողանն արդեն ապաստան է փնտրում: Տեղեկություններ եղան անգամ այն մասին, որ Գերմանիան հրաժարվել է ապաստան տրամադրել Էրդողանին, պնդում եղավ, որ նա արդեն Լոնդոնի ճանապարհին է:

 

Դրանից ժամեր անց Էրդողանը Ստամբուլի օդանավակայանում մամուլի ասուլիսով հանդես եկավ՝ նշելով, որ որևէ տեղ մեկնելու մտադրություն չունի և մնալու է երկրում՝ ժողովրդի կողքին:

 

Գիշերվա ընթացքում բախումները Թուրքիայում շարունակվում էին ինչպես օդում, այնպես էլ ցամաքում: Երկրի տարբեր վայրերում պայթյունների ձայներ էին լսվում, Ստամբուլի երկու մասերը միմյանց միացնող կամուրջի վրա զինվորականները տանկեր ու տեխնիկա էին կուտակել: Այնտեղ էին նաև ոստիկանական ուժերը, և զինվորականներն ի վերջո ստիպված եղան հանձնվել:

 

Ավելի ուշ հայտնի դարձավ զոհերի ու ձերբակալվածների թիվը: Ըստ պաշտոնական լրատվության՝ գիշերվա ընթացքում Թուրքիայում զոհվել է 60 մարդ: Եղել են նաև ձերբակալություններ, պաշտոնանկություններ. ձերբակալվեց հեղաշրջման փորձի 754 մասնակից:

 

Երկրի Զու Գլխավոր շտաբի պետից երկար ժամանակ որևէ տեղեկություն չկար. այդ մասին հայտարարել էին թե՛ Բինալի Յըլդըրըմը, թե՛ Ռեջեփ Թայիփ Էրդողանը: Նրա պաշտոնակատար նշանակվեց Ումիթ Դունդարը:

 

Այժմ արդեն հայտնի դարձավ, որ ԶՈՒ գլխավոր շտաբի պետ Հուլուսի Աքարը, ով պատանդ էր վերցվել հեղաշրջման փորձի մեկնարկի ժամանակ, հատուկ գործողության արդյունքում ազատ է արձակվել:

 

Նրա առողջական վիճակը լավ է: Ակնկալվում է, որ նա կգլխավորի հեղաշրջման փորձի դեմ իրականացվող գործողությունը: