Բռնությունը քաղաքականության մեջ  անընդունելի է. Ստեփան Դեմիրճյանը «Սասնա ծռեր» զինված խմբի գործողությունների մասին

Հայաստանի ժողովրդական կուսակցության նախագահ Ստեփան Դեմիրճյանն իր ցավակցությունն է հայտնում «Սասնա ծռեր» զինված խմբավորման գործողությունների արդյունքում զոհված ոստիկանության գնդապետ  Արթուր Վանոյանի հարազատներին և շուտափույթ ապաքինում մաղթում բոլոր վիրավորներին: 


Tert.am-ի հետ զրույցում  ՀԺԿ ղեկավարն ասաց. «Հիմա ամեն ինչ պետք է անել` նոր զոհեր ու արյունահեղություն թույլ չտալու համար: Առհասարակ, բռնությունը քաղաքականության մեջ անընդունելի է, իսպառ պետք է արմատախիլ արվի: Իսկ դրա համար պետք է վերացվեն պատճառները. երկրում ձևավորել  ժողովրդավարական ավանդույթներ, անցկացնել ժողովրդավարական ընտրություններ և լուծել բազմաթիվ կուտակված  խնդիրները»:

Հիշեցնենք, որ երեկ առավոտյան մի խումբ զինված անձինք մտել են ՀՀ ոստիկանության պարեկապահակային ծառայության գնդի տարածք և բռնության սպառնալիքով պատանդ են պահում են այնտեղ գտնվող ոստիկաններին: Այսօր արդեն բանակցությունների արդյունքում պատանդներից մեկն ազատ է արձակվել: Նրանք արդեն 5 ոստիկան են, այդ թվում նաև Երևանի փոխոստիկանապետ Վալերի Օսիպյանը և փոխոստիկանապետ Վարդան Եղիազարյանը: