«Ով քաղաքապետարանին կմեղադրի էդ հարցով, գլուխը պատով կտա». Երևանի փոխքաղաքապետը տպարանի շենքի քանդման մասին  

Հանրության շրջանում շարունակվում են քննարկումները Երևանում քանդված մայրաքաղաքի առաջին տպարանի շենքի առթիվ, որը մոտ 100 տարվա պատմություն ուներ: Լայն հասարակությանը հայտնի չէր, որ շենքը քանդվելու է, և որոշումը շատերի համար անակնկալ էր: Իսկ սոցիալական ցանցերում ծավալված ակտիվ քննարկումներում Երևանի առաջին տպարանի շենքի պայթեցումը գնահատվեց որպես Երևանի անցյալի պայթեցում, և դա գաղտնի է պահվել, որ բողոքի ակցիաներ չլինեն: 

Վարչապետ Կարեն Կարապետյանը հրավիրած աշխատանքային խորհրդակցության ընթացքում տարակուսանք հայտնեց տպարանի շենքի պայթեցման առթիվ և հանձնարարեց բացթողումներ թույլ տված պատասխանատուների նկատմամբ կիրառել առավելագույն խիստ պատիժ: Արդյունքում տուգանվեց շինարարը՝ շենքը պայթեցնելու համար:

Նկատենք, որ հասարակական բողոքը ավելի շատ վերաբերում էր հին Երևանի տեսքը վերացնելուն ու շենքի քանդմանը: Երևանի առաջին տպարանի շենքը քանդելու թույլտվությունը տվել է Երևանի քաղաքապետարանը: Այս առթիվ Tert.am-ը մի քանի հարց ուղղեց Երևանի փոխքաղաքապետ Կամո Արեյանին:

-Պարոն Արեյան, քանի որ քաղաքապետարանն է տպարանի շենքի քանդման թույլտվությունը տվել, այն ևս չպե՞տք է պատասխանատվության ենթարկվի: Վարչապետը հայտարարել էր, որ բացթողումներ թույլ տված բոլոր պատասխանատուները պետք է պատասխանատվության ենթարկվեն:

-Քաղաքապետարանը շենքը պայթեցնելու թույլտվություն չի տվել: Դա եղել է սովորական քանդման թույլտվություն՝ սովորական մեթոդով՝ առանց պայթեցման:

-Պարոն Արեյան, հասարակական բողոքը 100 տարվա շենքը քանդելու դեմ է, ոչ միայն՝ պայթեցման: Հասարակությունը գտնում է, որ այդ շենքը չպետք է քանդվեր, և որ դա Երևանի պատկերն էր:

-Դրան պաշտոնական պատասխան տվեց մշակույթի նախարարը՝ հայտարարելով, որ շենքը պատմամշակութային հուշարձանների ցուցակում ընդգրկված շենքներից մեջ չէ:

-Ասել է թե՝ կարծում եք, որ դա մեր հին Երևանի պատկերը չէ՞ր արտացոլում, չնայած որ 100 տարվա շինություն էր:

-Իմ կարծիքը շատ հարցերում շատ սուբյեկտիվ կարող է լինել, բայց կա պաշտոնական ցուցակ. ճարտարապետական նշանակության շենք չի եղել այդ շենքը: Խնդիրը քանդման եղանակն է:

-Ուզում եք ասել՝ այդ շենքը պիտի քանդվեր, պարզապես խնդիրը քանդման եղանա՞կն էր:

-Այո: Շենքի պատմամշակութային ու ճարտարապետական նշանակության վերաբերյալ եղել է պաշտոնական կարծիք:

-Պարոն Արեյան, հասարակությունը դժգոհ է, որ առանց հարցը քննարկման դնելու 100 տարվա շենքը քանդել են:

-Հասարակությունից յուրաքանչյուր մեկն ունի իր սուբյեկտիվ կարծիքը:

-Միևնույն ժամանակ հանրությունն ասում է, որ այդ շենքը չպիտի քանդվեր, պիտի հանրային քննարկում լիներ: Չե՞ք կարծում, որ էսպիսով քաղաքապետարանը հասարակության հետ հաշվի չի նստում:

-Հասարակությունն էլ ունի իր կարծիքը, մասնագիտական կարծիքն էլ կողքն է դրվել:Քաղաքապետարանը միշտ հաշվի է նստում հասարակության հետ:

-Ասել է թե՝ կարծում եք, քաղաքապետարանը տպարանի շենքի քանդման թույլտվություն տալու համար պատասխանատվություն չպիտի՞ կրի:

-Ոչ, պատասխանում եմ, ոչ: Ով քաղաքապետարանին կմեղադրի էդ հարցով, գլուխը պատով կտա: