Հրապարակվել է տեսանյութ՝ ինչպես է Կադիրովը գրկած ման տալիս Գալուստյանին (տեսանյութ)

Ռուսական life.ru կայքը հրապարակել է ուշագրավ տեսանյութ, որն արվել է հայ սիրված շոումեն Միխայիլ Գալուստյանի՝ «Ուրախների և հնարամիտների ակումբի» (КВН) հոբելյանական երեկոյի ժամանակ ունեցած հայտնի ելույթից առաջ Չեչնիայի ղեկավար Ռամզան Կադիրովի հետ արված փորձի ժամանակ:

Տեսանյութում երևում է՝ ինչպես է Կադիրովը կատակով իր գիրկն առնում Գալուստյանին ու, հումորիստին գրկած, առաջ շարժվում:

Հետաքրքրական է, որ Կադիրովին նմանակելու ելույթից առաջ հումորիստն ու չեչեն ղեկավարն արել են ընդամենը 2 փորձ, որից մեկի տեսագրությունը երեկ հայտնվել էր համացանցում:

Ինչպես ավելի վաղ նշել էր Tert.am-ը, մոտ 2 րոպե տևողությամբ տեսանյութում Գալուստյանը կարդում է չեչեն ղեկավարին նմանակելու ելույթի նախապես գրված տեքստը՝ մինչդեռ Կադիրովը նրան լսում է ու մերթընդմերթ ծիծաղում:

Գալուստյանի նմանակումը դարձել էր «Ուրախների և հնարամիտների ակումբի» (КВН) հոբելյանական երեկոյի ամենահիշարժան պահերից մեկը:

«Ես ու Միխայիլ Գալուստյանը երկու փորձ ենք արել, հագուստ ընտրել, երկու-երեք ժեստ սովորել: Ակցենտի հետ ամեն ինչ կարգին է եղել: Այս հարցում նա վարպետ է: Ասացի նրան, որ չստիպի հանդիսատեսին լարվել՝ փորձելով կռահել, թե ում է նա նմանակում (կատակում եմ): Շատ լավ է ստացվել»,-ելույթից հետո VK սոցցանցի իր էջում գրել էր Կադիրովը։ 

Չեչնիայի ղեկավարը ասել էր նաև, որ ինքը սրտանց ծիծաղել է. «Կապ չունի՝ ում գաղափարն էր. Գալուստյանը կարճ, բովանդակալից, լակոնիկ և պարոդիկ է եղել»: