Ահաբեկչություն Ստամբուլում Ամանորի գիշերը. ակումբի վրա հարձակման հետևանքով զոհերի թիվը հասել է 39-ի (լուսանկարներ, տեսանյութ)

Թուրքական Ստամբուլ քաղաքում Reina ակումբում տեղի ունեցած զինված հարձակման հետևանքով զոհվել է 39 մարդ, 69-ը հոսպիտալացվել է, հաղորդում է Haberturk-ը:

Ճշգրտված տվյալները հաղորդել է Թուրքիայի ներքին գործերի նախարար Սուլեյման Սոյլուն: Նաև հայտնի է, որ զոհերի թվում 16 օտարերկրյա քաղաքացի կա: Դրա հետ մեկտեղ, հարձակման հետևանքով զոհվածներից շատերի անձը հաստատված չէ:

Սոյլուի խոսքով՝ իրավապահ մարմինները դեռ փնտրում են հարձակվողին: Մինչ այդ, որոշ լրատվամիջոցներ հաղորդել էին հրաձիգի ոչնչացման մասին:

Ավելի վաղ Ստամբուլի իշխանություններն ահաբեկչություն էին որակել Reina գիշերային ակումբի վրա հարձակումը:

Նշենք, որ հունվարի 1-ին՝ տեղական ժամանակով 01.15-ին, Սանտա Կլաուսի հագուստով զինված տղամարդը ներխուժել է Ստամբուլի Reina գիշերային ակումբ, որտեղ հարյուրավոր մարդիկ տոնում էին Նոր տարին: