Քեմալականներն արշավ են սկսում Էրդողանի դեմ

Թուրքիայի ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն հայտարարել է, որ իր կուսակցությունը սահմանադրական փոփոխությունների վերաբերյալ հանրաքվեին ընդառաջ քարոզարշավ է սկսում նախագահ Ռեջեփ Թայիփ Էրդողանի դեմ, այս մասին գրում է թուրքական demokrathaber.org կայքը: 

«Էրդողանի կուսակցության իշխանության տարիներին երկիրը հետընթաց է գրանցել բոլոր բնագավառներում: Էրդողանն էլ ի՞նչ կարող է անել այս երկրի համար: Եթե սահմանադրական փոփոխությունների միջոցով ընդունվի կառավարման նախագահական համակարգին անցումը՝ երկրում սահմանված արտակագ դրությունը կսկսի սովորական բնույթ կրել», - հայտարարել է քեմալականների ղեկավարը:

Հիշեցնենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր: Այնուհետ օրենքը կդրվի հանրաքվեի, ինչից հետո էլ կկայացվի վերջնական որոշում: