Freedom House-ը կրկին Ադրբեջանն անազատ երկիր է ճանաչել

Freedom House իրավապաշտպան կազմակերպությունը հրապարակել է աշխարհի 195 երկրում քաղաքական և քաղաքացիական ազատությունների մակարդակի մասին ավանդական զեկույցը, գրում է contact.az-ը։

Այդ երկրներից 87-ը ճանաչվել են ազատ, 59-ը՝ մասամբ ազատ, 49-ը՝ անազատ։

Ադրբեջանը նախորդ տարիների պես դասվել է անազատ երկրների թվին։ Ընդ որում՝ անցած 10 տարիների ընթացքում իրավիճակն Ադրբեջանում միայն վատթարացել է, ասված է զեկույցում։

Անցած տարի Սահմանադրությունում փոփոխությունների վերաբերյալ հանրաքվեն գնահատվում է որպես Իլհամ Ալիևի ձգտում՝ շարունակել անձնական իշխանության ամրապնդմանն ուղղված քայլերը։

Զեկույցի հեղինակները նշում են, որ Ադրբեջանը և մի շարք արևելյան երկրներ պատրաստվում են անկայունության՝ փորձելով ամրապնդել իշխանությունը։ Հենց այդ նպատակով Իլհամ Ալիևը հանրաքվե է անցկացրել իր իշխանության պահպանումը երաշխավորելու համար, ասված է զեկույցում։

Զեկույցի համաձայն՝ Ադրբեջանում իրավիճակն ավելի վատ է, քան Կուբայում, Չինաստանում և Իրանում։ Միևնույն ժամանակ, Հայաստանը և Վրաստանը ներառված են մասամբ ազատ երկրների շարքում։