Շոտլանդուհին ասել է, որ վիճակախաղով ավելի քան $1 մլն շահումը լուրջ ընկճախտի պատճառ է դարձել

Շոտլանդիայի մայրաքաղաք Էդինբուրգի բնակչուհին, ով մեկ մլն ֆունտ ստերլինգ (ավելի քան 1.2 մլն դոլար) էր շահել վիճակախաղով, մեղադրել է խաղարկության կազմակերպիչներին` ասելով, որ շահած գումարը փչացրել է իր կյանքը:

Ինչպես հայտնում է Lenta.ru-ն, շոտլանդուհի Ջեյն Փարքը ջեքփոթով շահում է ունեցել 17 տարեկանում, երբ առաջին անգամ վիճակախաղի տոմս էր գնել: Չորս տարի անց աղջիկը եկել է այն եզրակացության, որ չպետք է խոշոր չափի շահումը ստանար նախքան չափահաս դառնալը:

Շոտլանդուհին բողոքել է, որ ձանձրացել է հայտնի դիզայներների հագուստները կրելուց և թանկարժեք հանգստավայրերում ժամանակ անցկացնելուց: Աղջկա խոսքով` խոշոր շահումը նրա համար լուրջ ընկճախտի պատճառ է դարձել:

Խաղարկության կազմակերպիչները վերջինիս ֆինանսական խորհրդատվություն էին առաջարկել, սակայն աղջիկը հրաժարվել է: