Աշխարհում ավելի քան 1.4 մլն երեխա սովամահ լինելու վտանգի տակ է. ՄԱԿ

Միացյալ ազգերի կազմակերպության (ՄԱԿ) Մանկական հիմնադրամը (ՅՈՒՆԻՍԵՖ) հայտարարել է, որ աշխարհում ավելի քան 1.4 մլն երեխա սովամահ լինելու վտանգի տակ է:

Ինչպես նշում է Reuters-ը, իրավիճակն առավել ծանր է Նիգերիայում, Սոմալիում, Հարավային Սուդանում և Եմենում:

Ըստ ՅՈՒՆԻՍԵՖ-ի՝ այս 4 երկրում մարդիկ սովամահ են լինում, և առաջիկա 6 ամսվա ընթացքում ավելի քան 20 մլն մարդու կյանք վտանգված է:

«Ժամանակը շատ սուղ է ավելի քան 1 մլն երեխայի համար, բայց մենք դեռևս հնարավորություն ունենք փրկելու նրանց»,-ասել է ՅՈՒՆԻՍԵՖ-ի գործադիր տնօրեն Էնթոնի Լեյքը, ում խոսքով՝ սովը մարդու գործողությունների անմիջական հետևանքն է:

Աղբյուրը մանրամասնում է, որ Սուդանի որոշ հատվածներում արդեն սով է հայտարարվել: Հայտնի է, որ այս երկրում սովամահ լինելու վտանգի տակ է մոտ 1 մլն երեխա: Հարյուր հազարավոր երեխաներ նույն վտանգի տակ են Սոմալիում, Նիգերիայում, Եմենում: