Եվրախորհրդարանը զրկել է Մարին Լը Պենին պատգամավորական անձեռնմխելիությունից՝ ԻՊ-ի վայրագությունների լուսանկարների համար

Եվրախորհրդարանի պատգամավորները քվեարկել են ֆրանսիական «Ազգային ճակատ» կուսակցության առաջնորդ, այժմ նախագահի ֆավորիտ թեկնածու համարվող Մարին Լը Պենին պատգամավորական անձեռնմխելիությունից զրկելու օգտին՝ ծայրահեղականության և բռնության քարոզչության մեղադրանքների առնչությամբ, գրում է Deutsche Welle-ն:

Քվեարկությունը տեղի է ունեցել Եվրախորհրդարանում:

«Այդկերպ մեծամասնությունը պաշտպանել է անձեռնմխելիության զրկումը»,- հայտարարվել է վեհաժողովի սրահում պատգամավորների քվեարկությունից հետո:

Անձեռնմխելիությունից զրկումն այժմ թույլ է տալիս Փարիզի դատարանին քրեական հետապնդում սկսել Լը Պենի նկատմամբ 2015 թվականին Twitter սոցիալական ցանցում «Իսլամական պետություն» ծայրահեղական կուսակցության դաժանությունների երեք լուսանկար տեղադրելու համար:

Խորհրդարանականին այժմ կարող է սպառնալ մինչև երեք տարվա ազատազրկում կամ մինչև 75 հազար եվրո տուգանք: Դատավարությունը կարող է ընթանալ ավելի քան մեկ տարի:

Նրա հրապարակած լուսանկարներից մեկում պատկերված էր ծայրահեղականների կողմից գլխատված ամերիկացի լրագրողը: