Ստամբուլահայերը բոյկոտել են Արամ Աթեշյանի մատուցած պատարագը

Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեկչյանը ևս մեկ պաշտոնական հայտարարություն է տարածել տեղապահի ընտրություններից հետո համայնքում առաջացած ճգնաժամի հետ կապված:

Հիշեցնենք, որ մարտի 15-ին Ստամբուլում կայացած Պոլսո Հայոց պատրիարքի տեղապահի ընտրությունից հետո, որում համոզիչ հաղթանակ էր տարել Արամ Աթեշյանի հակառակորդ  Գարեգին արքեպիսկոպոս Բեկչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն է ուղարկել, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:

Պատրիարքի տեղապահի ընտրություններում իր մրցակից Արամ Աթեշյանին ձայների 23/11 հարաբերակցությամբ պարտության մատնած արքեպիսկոպոս Բեկչյանը «Ակօսում» հրապարակված նամակում իր խորին շնորհակալությունն է հայտնել իր թեկնածությանը կողմ քվեարկած հոգևորականներին ու պոլսահայ համայնքին` վստահության ու ցուցաբերած աջակցության համար: 

Ընտրված տեղապահն իր երախտագիտությունն է հայտնել ստամբուլահայերին միասնական ու համառ պայքարի համար և հորդորել նրանց լինել համբերատար և ուրախ պահել իրենց հոգիները: Բեկչյանը հույս է հայտնել, որ առկա բյուրոկրատական խնդիրները կգտնեն իրենց լուծումը մոտ ապագայում: 

Նշենք, որ այս կիրակի Ստամբուլի հայ համայնքի մեծ մասը բոյկոտել է Արամ Աթեշյանի մատուցած եկեղեցկան պատարագը, փոխարենը ստամբուլահայերի մեծ մասը ուղևորվել է Ստամբուլի Ֆերիքյոյ թաղամասում գտնվող Սուրբ Վարդանանց եկեղեցի, որտեղ պատարագ է մատուցել արքեպիսկոպոս Բեկչյանը: 

Ավելի վաղ Գարեգին Բեկչյանը, մեկնաբանելով ստեղծված ճգնաժամային իրավիճակը, ասել էր. 
«Այս հարցերը պարզելու համար նահանգապետարանում հանդիպում կնշանակվի և խնդրի շուրջ համաձայնություն ձեռք կբերվի: Պոլսո Հայոց պատրիարքարանի անունից կհայտնենք մեր խնդիրը: Մի քանի օրվա ընթացքում սա կկազմակերպվի: Ես էլ մի որոշ ժամանակ այստեղ եմ լինելու: Այս խնդիրը լուծման մի ձև ունի՝ Աթեշյանի հրաժարականը»:

Հիշեցնենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի կարող կատարել պատրիարքի իր լիազորությունները։Նրա փոխարեն այդ լիազորությունները կատարում է  Արամ արքեպիսկոպոս Աթեշյանը, որն ընտրված է ոչ թե համայնքի, այլ պետության կողմից:

Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի: