«Երկիր Ծիրանի» կուսակցության նախագահ Զարուհի Փոստանջյանն այսօր Երևանի ավագանու ընտրությունների քարոզարշավի մեկնարկը տվեց հեծանվաերթով։

Փոստանջյանը հրապարկի աստիճաններին նստեց, հանեց բարձրակրունկ կոշիկները, հագավ մարզակոշիկներ ու անձամբ հեծանիվ վարեց: Երևանի քաղաքապետի թեկնածուն խոստովանեց, որ հեծանիվ առօրյայում չի վարում, որովհետև Երևանի փողոցները նախատեսված չեն հեծանիվների համար, բայց խոստացավ քաղաքապետ ընտրվելուց հետո լուծել այս հարցը:  

Զարուհի Փոստանջյանը լրագրողներին ու հեծանվարշավին մասնակցող իր կուսակից ընկերներին ներկայացրեց իրենց նախընտրական ծրագիրը, ասաց, որ անդրադառնալու են ճարտարապետությանը, փողոցների, բակային տարածքների բարելավմանը, արտաքին լուսավորությանը, հանրային տրանսպորտին, մետրոպոլիտենի շինարարությանը, աղբահանությանն ու աղբի վերամշակմանը, կանաչապատմանը:

«Մենք կարծում ենք, որ անհրաժեշտություն կա վերականգնել տրամվայը և հեծանվային ուղիներ ստեղծել: Անօթևան ընտանիք կենդանիներին ևս անդրադարձ ենք կատարելու, զբոսաշրջությանը ևս»,- նշեց Զարուհի Փոստանջյանը:

Բայց, առաջին խնդիրը, նրա համոզմամբ, որը կներկայացնեն ավագանում մեծամասնություն կազմելու պարագայում, կոռուպցիայի դեմ պայքարն է, հանրային գնումների չարաշահման դեմ պայքարը, որոնց շնորհիվ տարիներ շարունակ վատնվել են Երևանի միջոցները:

«Թամանյանը մեզ համար արևի քաղաք էր նախատեսել, որին անհրաժեշտ է ջերմություն, մարդկային ջերմություն, մեր սրտերի ջերմությունն է անհրաժեշտ, բայց այսօր մենք ունենք վերևից տաքացնող արև, բայց մեր սրտի արևը խավարի մեջ է: Մենք պետք է այն արթնացնենք ու փոխանցենք մեր քաղաքին»,-շեշտեց Փոստանջյանը:

Երևանի քաղաքապետի թեկնածուն ներկայացրեց նաև ավագանու իրենց անդամներին, ասաց, որ ուրախ է, որ թիմում չկան «արատավոր» կյանքով ապրող հայտնի անձինք: