Շենքին եմ ծանոթանում, վատ առիթով եմ եղել. Ալիկ Սարգսյանը՝ ԱԺ-ում (տեսանյութ)

ՀՀ նախկին ոստիկանապետ,  ՀՀԿ Արարատի մարզի տարածքային պատասխանատու Ալիկ Սարգսյանը այսօր 6-րդ գումարման նորընտիր խորհրդարանի նիստին մասնակցելով՝ չթաքցրեց, որ շատ նորեկների նման, ովքեր լրագրողներից հարցնում էին այս կամ այն սենյակի կամ բուֆետի տեղը,  ծանոթանում է շենքին:

«Շենքին եմ ծանոթանում, վատ առիթով եմ եղել այս շենքով, հիմա լավ առիթով եմ եկել, ուզում եմ՝ տպավորությունս փոխեմ»,-ասաց ՀՀ նախկին ոտիկանապետը՝ մանրամասնելով, որ խոսքը  1999 թվականի Հոկտեմբերի 27-ի մասին է: 

Լրագրողի հարցին, թե իրենց արդեն բացատրե՞լ են՝ ինչպես են կոճակ սեղմելու, Ալիկ Սարգսյանը պատասխանեց. «Չէ, ես փորձում եմ հասկանալ, կարիք չկա, կհասկանամ»:

Անդրադառնալով  ապրիլի 2-ի ընտրություններին՝ Ալիկ Սարգսյանն ասաց, թե այս ընտրությունները առավել, քան կարևոր էին:

«Եվ ժողովրդի ուշադրությունն էինք հրավիրում, որ ճիշտ կողմնորոշվեն, ճիշտ ընտրություն կատարեն, որովհետև 5 տարիների ընթացքում Ազգային ժողովը լինելու է, հիմնականում,   երկրի բարձրագույն օրենսդիր մարմինը և  շատ ավելի շատ կարևոր խնդիրներ է լուծելու, քան նախկին տարիներին:  Գիտեք՝ սահմանադրական կարգը փոխվեց, հիմա կարևորում ենք այդ աշխատանքները: Բայց մնացածը, երևի թե, ընթացքում կմեկնաբանեմ: Թույլ տվեք անցնենք աշխատանքի»: