Միջազգային հանրությունը խնդիր ունի փոխելու իր ձեռագիրն Ադրբեջանի նկատմամբ, որովհետև այդ երկիրը բոլոր չափերն անցնում է. Կարեն Բեքարյան

Արևմտյան հեղինակավոր վերլուծական կառույցներից մեկի` Միջազգայի ճգնաժամային խմբի (ICG) փորձագետների եզրակացության մասով, թե «Լեռնային Ղարաբաղում պատերազմի ամպեր են կուտակվում», զարմանալ պետք չէ: Tert.am-ի հետ զրույցում այս մասին ասաց ԱԺ ՀՀԿ խմբակցության պատգամավոր Կարեն Բեքարյանը:

Վերջինս ասաց, որ Հայաստանը վաղուց է համոզվել, որ հակառակորդին վստահելու ցուցանիշը բավական ցածր է, իսկ ապրիլյան քառօրյա պատերազմում վերահաստատվեց, որ պատերազմի հավանականություն կա:

«Ասել, թե Հայաստանում որևէ մեկը մտածում է, որ պատերազմի հավանականությունը չկա կամ քիչ է, առնվազն կոռեկտ չէ: Խնդիրն այն է, որ հարցը հայտնվել է միջազգային հանրության ուշադրության կենտրոնում: Ապրիլյան պատերազմն աննախադեպ էր միջազգային հանրության համար, մեզ համար սովորական դարձած ռիթմն իրենց համար դարձավ անսովոր, ուստի բոլորի ուշադրության կենտրոնը դարձավ քառօրյա պատերազմը: Ադրբեջանի կողմից մշտապես տարվում է ռազմական հռետորաբանությունը, որը ևս ներկայումս չի վրիպում միջազգային հանրության ուշադրությունից»,- ասաց Կարեն Բեքարյանը:

Պատգամավորն ասաց, որ հակամարտության կարգավորման գործում դրական տեղաշարժ չկա, վստահության ամրապնդման մեխանիզմներն այդպես էլ չեն տեղադրվում՝ Ադրբեջանը տորպեդահարում է այդ գործընթացը, ինչը նշանակում է, որ Հայաստանը զգոնությունը թուլացնելու իրավունք չունի:

Դիտարկմանը, թե մշտապես խոսվում է այն մասին, որ Ադրբեջանը չի դիմի պատերազմի, որովհետև բանակը թուլացել է, խնդիրներ կան և այլն, Կարեն Բեքարյանը պատասխանեց, որ այդ խնդիրները շարունակում են մնալ, բայց դա չի նշանակում, որ հակառակորդը չի կարող կրկնել ապրիլյան իրադարձությունները:

«Զարմանալի բան չկա: Սկանդալներ կան Ադրբեջանում, լրտեսական վերջին սկանդալը հիշեք, որտեղ բանակայիններ կային ընդգրկված: Աչքի առաջ ունեցեք տնտեսական իրենց խնդիրները, սոցիալական բունտի էլեմենտը և այլն: Այն, ինչ կար, հիմա էլ կա, ոչինչ չի փոխվել»,- նշեց Բեքարյանը:

Պատգամավորը հիշեցրեց ԵԽ Նախարարների Կոմիտեում կայացված երեկվա որոշումը, ըստ որի՝ Ադրբեջանին տրվել են հանձնարարականներ և 3 ամիս ժամանակ դրանք կյանքի կոչելու համար: Հակառակ դեպքում՝ Ադրբեջանը կզրկվի ձայնի իրավունքից, իսկ ապագայում՝ դուրս կմնա նաև Եվրոպայի խորհրդից: Կարեն Բեքարյանն ասաց, որ սա հստակ ցուցանիշ էր, որ միջազգային հանրությունը խնդիր ունի փոխելու իր ձեռագիրը Ադրբեջանի նկատմամբ:

«Սա ցույց էր տալիս, որ բոլոր չափերը Ադրբեջանը անցել է: 3 տարի է, ինչ Ադրբեջանը չի կատարում ՄԻԵԴ-ի խնդիրը և սրա վրա աչք փակել չի կարելի: Միջազգային հանրության դիրքորոշումը Ադրբեջանի նկատմամբ գնալով խստանում է: Նրանք էլ ընկալում են, որ Ադրբեջանը բոլոր չափերն անցնում է»,- ընդգծեց Կարեն Բեքարյանը: