ՀՀԿ-ում դեռ չեն քննարկել Հրազդանի քաղաքապետի որդու ավտովթարի հարցը. Ռուբեն Թադևոսյան

Հայաստանի Հանրապետական կուսակցության Կոտայքի տարածքային կառույցը դեռ չի քննարկել Հրազդանի քաղաքապետ Արամ Դանիելյանի որդու՝ Ռազմիկ Դանիելյանի կողմից քաղաքապետարանին պատկանող ավտոմեքենայով հետիոտնին վրաերթի ենթարկելու հետ կապված հարցը: Այս մասին Tert.am–ի հետ զրույցում ասաց ՀՀԿ կազմակերպչական հանձնաժողովի նախագահ Ռուբեն Թադևոսյանը:

«Երբ Կոտայքի տարածքային կառույցը նման քննարկում կունենա, մամուլը այդ մասին կտեղեկանա»,- շեշտեց նա:

Ռուբեն Թադևոսի դիտարկմամբ, եթե քննարկում չի եղել բնական է, ոչ մի որոշում չի կարող կայացվել:

Նշենք, որ Ռուբեն Թադևոսյանն ավելի վաղ ասել էր, որ հարցը կուսակցությունում քննարկվելու է:

Հիշեցնենք, որ 16-ամյա Ռազմիկ Դանիելյանը հունիսի 8-ին Nissan Teana մակնիշի 444 ԼԼ 70 համարանիշի ավտոմեքենայով Հրազդանի Շահումյան փողոցում վրաերթի է ենթարկել Հրազդան քաղաքի Միկրոշրջան թաղամասի 223 շենքի 12 բնակարանի բնակիչ 58-ամյա Վալերի Թորոսյանին և դեպքի վայրից դիմել փախուստի։

Վալերի  Թորոսյանը հիվանդանոցում գիտակցության չգալով` մահացել էր։ Քաղաքապետի անչափահաս որդին դեռևս չունի վարորդական իրավունք: Հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով՝ ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ: Քաղաքապետի որդին ստորագրությամբ ազատ է արձակվել: