Մերկելը նախազգուշացում է հղել Թրամփին G20 գագաթնաժողովից առաջ

Գերմանիայի կանցլեր Անգելա Մերկելը խոստացել է պայքարել ազատ առևտրի համար և պնդել կլիմայի փոփոխությունների դեմ պայքարի համար բազմակողմանի ջանքերի հարցում հաջորդ շաբաթ Համբուրգում կայանալիք G20 գագաթնաժողովի ժամանակ, հայտնում է Reuters գործակալությունը:

Խորհրդարանում ունեցած ելույթի ժամանակ Մերկելը չի նշել ԱՄՆ նախագահ Դոնալդ Թրամփի անունը, բայց շեշտել է, որ համաշխարհային խնդիրները չեն կարող լուծվել պրոտեկցիոնիզմով և մեկուսացմամբ:

Նրա խոսքերը մեծացրել են գագաթնաժողովին Թրամփի հետ բաց առճակատման հավանականությունը:

«Հեշտ բանակցություններ չեն լինելու: Տարբերություններն ակնհայտ են, և սխալ կլինի ձևացնել, թե դրանք չկան: Ես դա չեմ անի»,- ասել է Մերկելը:

ԱՄՆ նախագահ Դոնալդ Թրամփը, հունիսի 1-ին ելույթ ունենալով Սպիտակ տանը, հայտարարել էր Կլիմայական փոփոխությունների վերաբերյալ փարիզյան համաձայնագրից դուրս գալու որոշման մասին:

Փարիզյան համաձայնագիրը կնքվել է 2015 թվականի դեկտեմբերին, որի 195 մասնակիցները պայմանավորվել են թույլ չտալ մոլորակի վրա միջին ջերմաստիճանի բարձրացումն ավելի քան 2 աստիճանով: