Եղանակն՝ այսօր
ՀՀ-ն պետք է ԵԱՏՄ-ից դուրս գալու գործընթաց սկսի. Էդմոն Մարուքյանը՝ ՀՀ–ում ռուսերենին պաշտոնական կարգավիճակ տրամադրելու առաջարկի մասին
«Ելք» խմբակցության պատգամավոր Էդմոն Մարուքյանի համար անակնկալ չէր ՌԴ պետդումայի խոսնակ Վյաչեսլավ Վոլոդինի առաջարկը Հայաստանի իշխանություններին՝ երկրում օրենսդրորեն պաշտոնական կարգավիճակ տրամադրել ռուսերեն լեզվին: Tert.am-ի հետ զրույցում պատգամավորը նշեց, որ Ռուսաստանի տարածքում ազգային-վարորդական իրավունքների ճանաչման հարցի ընդունումից հետո ինքն առաջինն էր, որ ահազանգեց, որ այդ օրենքը հստակ մեսիջ է ՀՀ իշխանություններին:
«Որովհետև այնտեղ ասում էին, որ եթե ցանկանում եք ձեր վարորդներն էլ օգտվեն, ապա պետք է ռուսերենը պաշտոնեական լեզու դարձնեք: Ես ասում էի, որ հստակ մեսիջ է ՀՀ իշխանություններին, հիմա էլ ԱԺ նախագահին են ասել»,-ասաց նա և հույս հայտնեց, որ «Ելք» պատգամավոր Նիկոլ Փաշինյանը, ով մասնակցում է հանդիպմանը՝ համապատասխան պատասխան տված կլինի, որ դա անընդունելի է:
Բացի այդ Մարուքյանն ընդգծեց, որ ՀՀ Սահմանադրությունը այս հարցում որևէ բաց տեղ չունի: «Այսինքն՝ ՀՀ Սահմանադրությունը խաղալու տեղ չի թողնում այս առումով, որովհետև հստակ գրված է՝ ՀՀ-ում պաշտոնական լեզուն հայերենն է և երկրորդ պաշտոնական լեզու Հայաստանի Հանրապետությունը չի ճանաչում»,-ասաց նա:
Էդմոն Մարուքյանը խոսեց նաև անելիքներից, և նշեց, թե հաշվի առնելով, որ ՀՀ-ն ԵԱՏՄ անդամ է, այդ նորմերի համաձայն՝ ՀՀ աշխատուժը կարող է աշխատել ՌԴ–ում կամ միության անդամ այլ պետությունների տարածքում: «Իսկ եթե դա արգելվում է, ՀՀ-ն կարող է գործընթաց սկսել ԵԱՏՄ-ից դուրս գալու վերաբերյալ, դրանով ցույց տալով իր վերաբերմունքը խախտումներին: Հիմա մեր քայլը պետք է լինի դա, որ սկսում ենք դուրս գալու գործընթաց»,-ասաց Մարուքյանը և հավելեց, որ ԵԱՏՄ համաձայնագիրն ավելի բարձր իրավաբանական ուժ ունի, քան ՌԴ Պետդումայի ցանկացած օրենք:
«Եթե չեն ուզում կիրառեն, այդ դեպքում ՀՀ-ն պետք է սկսի ԵԱՏՄ-ից դուրս գալու գործընթաց: Հիմա, եթե դա չարվի, ուրեմն պետական շահերը ստորադասվում են ինչ-որ հարցերի»,-եզրափակեց նա:
Studio One