Սաուդյան Արաբիայի թագավորը արքայազնի կալանավորման հրաման է տվել

Սաուդյան Արաբիայի միապետ Սալման բին Աբդուլազիզը հուլիսի 20-ին  արքայազն Մուսաեդ բին Սաուդ բին Աբդուլազիզ ալ Սաուդին անհապաղ կալանավորելու վերաբերյալ հրաման է արձակել:

Ինչպես նշում է Al Arabiya-ն, կալանավորման հրամանը վերաբերում է ոչ միայն արքայազնին, այլև բոլոր նրանց, ովքեր թագավորական ընտանիքի անդամի հետ բռնաճնշումներ են իրագործել շարքային քաղաքացիների նկատմամբ:

Թագավոր Սալմանի հրահանգով՝ բռնի գործողություններից բոլոր տուժածները վկայություն կտան դատարանում, մեղավորները կկանգնեն օրենքի առաջ:

Միապետի հրամանում նշվում է, որ ոչ ոք ազատ չի արձակվի, քաի դեռ համապատասխան վճիռը չի կայացվել:

Փաստաթղթում ասվում է, որ  ցանկացած անձ, որը կչարաշահի իր դիրքն ու կխախտի շարքային քաղաքացիների իրավունքները, կկալանավորվի ու կդատվի շարիաթի օրենքների համաձայն: