Առանձնապես խոշոր չափերով կաշառք պահանջելու և ստանալու գործով կալանավորված Գեղարքունիքի մարզի ընդհանուր իրավասության  դատարանի նախկին նախագահ Աղվան Պետրոսյանի, դատախազ Սևակ Շհոյանի և մյուսների գործով դատավոր Վահագն Մելիքյանն ինքնաբացարկ է հայտնել:

Դատալեքս տեղեկատվական համակարգից Tert.am-ը տեղեկացավ` ՀՀ Գեղարքունիքի մարզի ընդհանուր իրավասության առաջին ատյանի դատարանի դատավոր Վահագն Մելիքյանը միջնորդություն է ներկայացրել, որ ծանոթանալով ըստ մեղադրանքի՝ Աղվան Ալբերտի Պետրոսյանի, Վանիկ Վարդանյանի, Սևակ Շհոյանի, Կարեն Մարտիկյանի, Հայկ Կարապետյանի, Մելանյա Գալստյանի, Կամո Գալստյանի, Էդվարդ Չինարյանի, Ռոբերտ Գրիգորյանի, Խաչատուր Դադոյանի, Արմեն Բարսեղյանի, Վրույր Վարդանյանի և Լաուրա Մարտիրոսյանի քրեական գործի նյութերին, պարզել է, որ մեղադրյալ Աղվան Պետրոսյանին ճանաչում  է վաղուց:

Դատավորն իր միջնորդության մեջ գրել է. «Աղվան ն իմ մտերիմ ընկերն է, ում ճանաչում եմ վաղուց: 1990 թվականին ծանոթացել ենք ԵՊՀ-ի ընդունելության քննությունների ժամանակ: 1996-1997 թվականներին աշխատել ենք Երևան քաղաքի Շենգավիթի ՆՎՇՏ-ի դատարանում: 2004 թվականից աշխատել ենք ՀՀ Գեղարքունիքի մարզի ընդհանուր իրավասության առաջին ատյանի դատարանում՝ դատավորի պաշտոնում: 2008 թվականի հունվարի 1-ից Աղվան Ալբերտի Պետրոսյանը վերը նշված դատարանի նախագահ է: ՀՀ քրեական դատավարության օրենսգրքի 90-րդ հոդվածի համաձայն՝ «դատավորը պարտավոր է ինքնաբացարկ հայտնել , եթե նա տեղյակ է այնպիսի փաստերի կամ հանգամանքների մասին, որոնք կարող են ողջամիտ կասկած հարուցել տվյալ գործով նրա անկողմնակալության մեջ»:

Դատավորը որոշել է ինքնաբացարկ հայտնել և գործը ներկայացնել վերաբաշխման ընդհանուր կարգով: Մեղադրյալների նկատմամբ ընտրված խափանման միջոցները թողնվել են անփոփոխ:

Նշենք, որ Գեղարքունիքի դատարանի նախագահին մեղադրանք է առաջադրվել այն բանի համար, որ իր վարույթում քննվող գործերից մեկով ամբաստանյալների օգտին որոշումներ կայացնելու համար  իր վարորդ Կարեն Մարտիկյանի և Վարդենիս քաղաքի բնակիչ Հայկ Կարապետյանի միջոցով ստացել է առանձնապես խոշոր չափերով՝ 11մլն 343 հազար ՀՀ դրամին համարժեք 23 000 ԱՄՆ դոլար կաշառք, ինչպես նաև 2017թ. փետրվարի 27-ին  իր աշխատասենյակում, Ռոբերտ Գրիգորյանի ներկայացուցիչ Էդվարդ Չինարյանի միջոցով վերջինիս ներկայացրած անձանց օգտին, իր պաշտոնեական դիրքն օգտագործելով, ակնհայտ ապօրինի գործողություններ կատարելուն ապօրինի պարզաբանում տալուն նպաստելու համար, նույն դատարանի դատավոր Վանիկ Վարդանյանի հետ խմբով ստացել է առանձնապես խոշոր չափերով՝ 1մլն 11հզր ՀՀ դրամին համարժեք 120.000 ՌԴ ռուբլի կաշառք։

Նույն դատարանի դատավոր Վանիկ Վարդանյանն ու դատախազ Սևակ Շհոյանը նույնպես մեղադրվում են կաշառք ստանալու մեջ: