Իսրայելը պետական մակարդակով ոչինչ չի ձեռնարկել ինձ ազատ արձակելու համար. Լապշին

Ադրբեջանից վերջերս հեռացած բլոգեր Ալեքսանդր Լապշինն իր puerrtto.livejournal.com բլոգում հայտնել է, որ չնայած հանրության ներսում տարածված կարծիքին՝ Իսրայելը պետական մակարդակով գործողություններ չի ձեռնարկել իր ազատ արձակման համար, և նշել է, որ դրա պատճառն Ադրբեջանի հետ երկրի հարաբերությունները չփչացնելու ցանկությունն է եղել:

«Իսրայելական ռուսախոս համայնքները քննարկում են այն, թե իբր Իսրայելը հերթական անգամ իր անփույթ քաղաքացուն է փրկել ի վնաս ազգային շահերի: Ես չէի ուզենա բարձրացնել այդ հարցը, քանի որ այն շատ մութ է և ոչ միանշանակ: Ձեզ պատասխանատու կերպով հայտարարում եմ՝ Իսրայելը պետական մակարդակով ոչինչ չի ձեռնարկել ինձ փրկելու համար՝ լինի դա բելառուսական բանտում, թե ադրբեջանական բանտում գտնվելու ընթացքում»,- գրել է Լապշինը:

Բլոգերը նշել է, որ չնայած իրեն այցելել են Իսրայելի հյուպատոսները՝ դա նրանք արել են իրենց պարտականությունների շրջանակներում, քանի որ նրանք օրենքով պարտավոր են հյուպատոսական օգնություն տրամադրել իրենց երկրի քաղաքացուն: Դրանից բացի, Իսրայելը ոչինչ չի ձեռնարկել, և դրա համար նա երեք պատճառ է նշել:

Լապշինը հիշեցրել է, որ Ադրբեջանն այս տարի Իսրայելի հետ մոտ 5 միլիարդ դոլարի սպառազինության մատակարարման վերաբերյալ պայմանագրեր է կնքել և դարձել է տեղի ռազմաարդյունաբերական համալիրի գլխավոր հաճախորդներից մեկը:

Բացի այդ, Ադրբեջանը մինչ այժմ չի մարել նախկինում մատակարարված սպառազինության պարտքը՝ նավթի գների անկման պատճառով:

Լապշինը նաև նշել է, որ անգամ ադրբեջանական դատավճռից հետո իրեն ընդունելով՝ Իսրայելը շատ դժվար դրության մեջ կհայտնվեր: Տեղի դատարանը, վերանայելով Լեռնային Ղարաբաղ իր այցելությունների մասին գործը, մեծ հավանականությամբ իրեն արդարացնելու էր՝ «մեղմ ասած՝ ոչ ադեկվատ ճանաչելով ադրբեջանական դատավճիռը»: Դրան ավելանալու էր նաև Իսրայելում հանրային արձագանքը, որն Ադրբեջանի և Իսրայելի քաղաքացու նկատմամբ նրա դատավճռի օգտին չէ ձևավորվել:

«Ինչպես կարելի է ենթադրել՝ նման մասշտաբային պայմանագրեր ստանալը հեշտ չէ, իսկ դրանք կարելի է կորցնել մեկ վայրկյանում՝ օրինակ խոսելով ի պաշտպանություն ադրբեջանական բանտում անօրինական կերպով հայտնված բլոգերի: Կամ նրան վերցնելով, բայց ադրբեջանական վճիռն ուժը կորցրած ճանաչելով»,- գրել է Լապշինը՝ հավելելով, որ դա ոչ թե իր ենթադրություններն են, այլ աղբյուրներից ստացած տեղեկատվություն:

Նա նշել է, որ Իսրայելը որոշել է այդ իրավիճակում ոչ մի գործողություն չձեռնարկել: Սակայն հանգամանքներն Իսրայելի օգտին էին, քանի որ Ադրբեջանը ցանկանում էր ազատվել Լապշինի բեռից:

«Նրանք վստահ էին, որ հենց լինի դատավճիռը, նրանք ինձ անմիջապես կուղարկեն իմ քաղաքացիության երկրներից մեկը (Իսրայել կամ ՌԴ), բայց դրա փոխարեն ես շարունակում էի մնալ նրանց բանտում և նրանց համար գլխացավանք ստեղծել: Ինձ գաղութ ուղարկել, որտեղ հազարավոր կալանավորներ կան, նրանք նույնպես չէին կարող. ինձ այնտեղ պարզապես կսպանեին իմ գործի առանձնահատկությունների, ինչպես նաև հենց Բաքվում իշխանության անկայունության և երկրի գլխավոր աթոռի համար կլանների լուրջ պայքարի պատճառով»,- գրել է Լապշինը:

Բլոգերի խոսքով՝ նախագահ Իլհամ Ալիևը պարզապես չգիտեր՝ ինչպես ազատվել իրենից, իսկ Իսրայելին մնում էր միայն հանգիստ սպասել, մինչև Ադրբեջանն ինքնուրույն ելք գտնի ստեղծված իրավիճակից: Արդյունքում Բաքվում որոշել են բեմադրել իր ինքնասպանությունը, այնուհետև ներում շնորհել նրան:

«Ո՛չ, ինձ Իսրայելը որպես պետություն չի օգնել: Առանձին մարդիկ, Քնեսետի պատգամավորներ, հանրային գործիչներ, լրագրողներ ձեռնարկել են հնարավորինս ամեն բան: Նրանց շնորհակալություն, բայց ոչ Իսրայել պետությանը, որը, առանց վիրավորելու եմ ասում, ինձ վաճառեց պաշտպանական պայմանագրի դիմաց: Երևի թե այդպես կվարվեր ցանկացած պետություն՝ լիներ դա Իսրայելը, Ամերիկան կամ Շվեդիան»,- եզրափակել է բլոգերը:

Հիշեցնենք, որ սեպտեմբերի 14-ին Լապշինը լքել է Ադրբեջանի տարածքն ու մեկնել Իսրայել:

Բաքվի ծանր հանցագործությունների դատարանը բլոգեր Ալեքսանդր Լապշինին դատապարտել էր երեք տարվա ազատազրկման: Ինչպես նշվել է դատավճռում, Ալեքսանդր Լապշինը մեղավոր է ճանաչվել 318.2 հոդվածով, որը նախատեսում է պատիժ «հանցավոր խմբի կազմում Ադրբեջանի պետական սահմաններն անօրինական կերպով հատելու համար»:

Դատախազը խնդրել էր Լապշինի նկատմամբ սահմանել պատիժ՝ 6,5 տարվա ազատազրկման տեսքով:

Օրերս Ադրբեջանի նախագահ Իլհամ Ալիևը հրամանագիր է ստորագրել բլոգեր Ալեքսանդր Լապշինին ներում շնորհելու մասին:

Ռուսաստանի, Իսրայելի և Ուկրաինայի քաղաքացի հանդիսացող բլոգեր Ալեքսանդր Լապշինը ձերբակալվել է Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին՝ 2011 թվականի ապրիլին, 2012 թվականի հոկտեմբերին և 2016 թվականի հունիսին Արցախ այցելելու, ինչպես նաև Ադրբեջանի քաղաքականությունը քննադատելու համար:

ՀՀ արտաքին գործերի նախարարության մամուլի խոսնակ Տիգրան Բալայանը, անդրադառնալով բլոգերի արտահանձնմանը, հայտարարել էր, որ Ալեքսանդր Լապշինի հետապնդումը, Ադրբեջան նրա արտահանձնումը խոսքի ազատության և ազատ տեղաշարժի, մարդու հիմնարար իրավունքների կոպտագույն ոտնահարում է, որը կրկին անգամ ի ցույց է դնում բռնապետության և ժողովրդավարության միջև առկա խորը անդունդը։