ՀՀ–ԵՄ համաձայնագիրը ՌԴ ազգային շահերին սպառնալիք չէ, եթե այն չի խախտում ՀՀ–ի՝ ԵԱՏՄ պարտավորությունները. Զատուլին

Մենք չենք համարում, որ Եվրամիության հետ Հայաստանի համաձայնագիր կնքելը սպառնալիք է՝ Ռուսաստանի ազգային շահերին ուղղված, եթե, իհարկե, այն չի խախտում Հայաստանի պարտավորվածությունները ԵԱՏՄ-ի շրջանակներում. լրագրողների հետ զրույցում խոսելով ՀՀ-ԵՄ համաձայնագրի ստորագրումից հետո Հայաստանի՝ ՌԴ-ի և ԵՄ-ի միջև կամուրջ լինելու հնարավորության մասին՝ այսպես ասաց ռուս հայտնի վերլուծաբան, ԱՊՀ երկրների ինստիտուտի տնօրեն Կոնստանտին Զատուլինը:

«Այո, մենք նկատի ենք առնում և ունենք իրավունք նկատի առնելու ոչ միայն Հայաստանը, այլ նաև այն, որ աշխարհի հայերը դրական են տրամադրված Ռուսաստանի և նրա քաղաքականության նկատմամբ, և շատ հաճախ այդ մասին արտահայտվում են այլ երկրներում ապրող հայերը»,- ասաց նա:

Անդրադառնալով եվրոպական կողմի ներկայացուցիչների, մասնավորապես վերջերս ՀՀ-ում Ֆրանսիայի դեսպանի խոսքին, որ Հայաստանը կարող է լինել կամուրջ Ֆրանսայի և ԵԱՏՄ շուկայի միջև՝ կնքելով ԵՄ-ի հետ համաձայնագիր, Կոնստանտին Զատուլինը համաձայնեց, որ հիմքեր կան, որպեսզի եվրոպացի դիվանագետի ասածն իրականանա։ 

«Բայց դրա հետ մեկտեղ պետք է հասկանալ, որ Ռուսաստանը մեծ երկիր է, և այն վարում է ուղիղ երկխոսություն եվրոպական երկրների հետ, և այդպես լինելու է նաև հետո: Այդ առումով՝ չի կարելի ասել, որ մենք մեր արտաքին քաղաքականությունը պետք է վստահենք մեկ այլ երկրի, հույս ունենք, որ մեր փոխարեն մեր խնդիրը կլուծի ուրիշը: Իհարկե, մենք ենք նախ պատասխանատու այդ երկխոսության համար, բայց եթե կան երկրներ, որոնք այդ հարցում մեզ կօգնեն, շնորհակալ կլինենք»,- ասաց նա:

Կոնստանտին Զատուլինը խոսեց նաև ԼՂ հիմնախնդրի շուրջ հնարավոր զարգացումների վերաբերյալ: Նա մատնանշեց, որ Լեռնային Ղարաբաղը երբեք չի լինի Ադրբեջանի կազմում, իսկ Ադրբեջանը հետ չի կանգնի իր ցանկությունից՝ Լեռնային Ղարաբաղն իր կազմում տեսնելուց:

«Կարծում եմ՝ ԼՂ հիմնախնդիրը չի լուծվում՝ կողմերի միջև եղած անհամաձայնությունների պատճառով: Ես կարծում եմ, որ Լեռնային Ղարաբաղը ոչ մի պարագայում չի համաձայնի լինել Ադրբեջանի կազմում: Դա փաստ է, որի հետ վաղ թե ուշ պետք է հաշտվել, բայց այդ մտքի հետ Ադրբեջանը, հայտնի է, չի հաշտվում: Նա անում է շատ բարձր հայտարարություններ հողերի մասին, որոնք պետք է վերադարձնել: Կարծում եմ, որ ԼՂ հիմնախնդիրը կարող է մոտ լինել իր հանգուցալուծմանը, եթե կողմերը ելնեն սկզբունքից խաղաղ հանգուցալուծման ու հանեն և՛ Ադրբեջանում, և՛ Հայաստանում, և՛ Ղարաբաղում եղած բոլոր արգելքները. դա պետք է լինի Լեռնային Ղարաբաղի ճանաչումը, Ադրբեջանին վերադարձնել հակամարտության ժամանակ Լեռնային Ղարաբաղի կողմից գրաված տարածքները, լինի գործարք կողմերի միջև, որ ադրբեջանցի փախստականները վերադառնան իրենց բնակավայրեր»,- ասաց նա: 

Նա նշեց, որ առաջիկայում չի սպասում լուրջ ճեղքում կարգավորման գործընթացում: Կոնստանտին Զատուլինի խոսքով՝ դա երկարատև գործընթաց է, Ադրբեջանում եղած տրամադրվածությունները հաշվի առնելով՝ նման բան սպասել պետք չէ:

«Ես իմ ջանքերը գործադրում եմ, որ այլևս սուր ռազմական հակամարտություն չլինի: Արյուն չլինի, նորից չվերսկսվեն ռազմական գործողությունները: Դա ամենակարևոր դիրքորոշումը պետք է լինի»,- ասաց նա