«Ռուսաստանը լիարժեք պատասխան կտա». ՌԴ-ում կքննարկեն ռազմական ոլորտի իրենց գործընկերների դեմ ԱՄՆ-ի հնարավոր պատժամիջոցները

ՌԴ պետդումայի պաշտպանության հարցերով հանձնաժողովը Պաշտպանության նախարարության ներկայացուցիչների հետ կքննարկի ՌԴ ռազմաարդյունաբերական համալիրի գործընկերների դեմ ԱՄՆ-ի հնարավոր պատժամիջոցները: Այդ մասին երեքշաբթի ТАСС-ին հայտարարել է Պետդումայի պաշտպանության հարցերով հանձնաժողովի նախագահ Վլադիմիր Շամանովը՝ մեկնաբանելով Պետքարտուղարության ներկայացուցիչների հայտարարությունները:

«Մենք, անկասկած, կկազմակերպենք և կլսենք Պաշտպանության նախարարության ներկայացուցիչների դիրքորոշումը: Միևնույն ժամանակ, այն անշուշտ փոխվարչապետ Դմիտրի Ռոգոզինի կողմից կքննարկվի Ռազմաարդյունաբերական հանձնաժողովի նիստին: Ռուսաստանը լիարժեք պատասխան կտա»,- հայտարարել է Շամանովը:

Պետդումայի պաշտպանության հարցերով հանձնաժողովի նախագահը նշել է, որ ՌԴ ռազմաարդյունաբերական համալիրի գործընկերների դեմ ԱՄՆ հնարավոր պատժամիջոցները վկայում են ռուսական տեխնիկայի հետ մրցակցության վախի մասին:

«Նրանք պարզապես վախենում են այդ մրցակցությունից, որովհետև ռուսական զենքի արդյունավետությունը գործնականորեն ապացուցվել է Սիրիայում: Եվ նրանք պարզապես վախեցել են, որ իրենց փտած «Տոմահավկերը», որոնց կեսը հայտնի չէ՝ ուր է հայտնվել, և մնացած հնացած զենքերը բավական պահանջարկ չեն ունենա, ինչի հետևանքով նրանց ընկերությունները մեծ վնասներ կկրեն»,- ասել է խորհրդարանականը:

Նա հավելել է, որ իր գլխավորած հանձնաժողովն «ուշադիր հետևելու է այդ ոլորտում իրավիճակին»:

Ավելի վաղ ԱՄՆ պետքարտուղարության ներկայացուցիչը հայտարարել է, որ Ռուսաստանի դեմ ուղղված նոր պատժամիջոցները, դրանց սահմանման դեպքում, կանդրադառնան ՌԴ ռազմաարդյունաբերական համալիրի և հետախուզական ծառայությունների գործընկերների վրա: 

«Այսօրվանից սկսած Պետքարտուղարությունը կարող է պատժամիջոցներ սահմանել «Պատժամիջոցների միջոցով Ամերիկայի հակառակորդներին հակազդելու մասին» (CAATSA) օրենքի 231-րդ հոդվածի շրջանակում ռազմաարդյունաբերական համալիրի ռուսական ձեռնարկությունների և հետախուզական ծառայությունների հետ մեծ գործարքների համար: Եթե պատժամիջոցները սահմանվեն, դրանք հիմնականում կվերաբերեն ռազմաարդյունաբերական համալիրի ռուսական ձեռնարկությունների և հետախուզական ծառայությունների հետ մեծ գործարքների մեջ ներգրավված ոչ ռուսական կազմակերպություններին»,- հայտնել է նա:

Պետքարտուղարությունում նշել են, որ ԱՄՆ-ն նախազգուշացրել է Ռուսաստանի հետ առևտրային գործարքներ իրականացնող երկրների կառավարություններին և ընկերություններին նրանց դեմ պատժամիջոցների սահմանման հնարավորության մասին:

Պետքարտուղարության պաշտոնական ներկայացուցիչ Հիզեր Նոյերթը հայտարարել է, որ օգոստոսին նոր օրենքի ընդունումից ի վեր օտար երկրների որոշ կառավարություններ հրաժարվել են Մոսկվայից մի քանի միլիարդ դոլարի ռուսական ռազմական տեխնիկայի նախատեսվող կամ հայտարարված գնումներից: