Թբիլիսիի մետրոյում առաստաղի փլուզվելու հետևանքով վիրավորների թիվը հասել է 14-ի (լուսանկարներ, տեսանյութ)

Թբիլիսիի մետրոյի «Վարկետիլի» կայարանում կախովի առաստաղի կոնստրուկցիայի փլուզվելու հետևանքով վիրավորների թիվը հասել է 14-ի: Այդ մասին հայտնում է «Новости-Грузия»-ն՝ վկայակոչելով Վրաստանի հանրային հեռարձակողին:

Ավելի վաղ հաղորդվել էր 7 տուժածի մասին:

Թբիլիսիի քաղաքապետ Կախա Կալաձեն հայտարարել է, որ տուժածների բուժման համար կվճարի Առողջապահության նախարարությունը և Թբիլիսիի քաղաքապետարանը:

Թբիլիսիի տրանսպորտային ծառայության ղեկավար Մամուկա Կոբախիձեն հաստատել է, որ դեպքի առնչությամբ քննչական միջոցառումներ են իրականացվում:

Բժիշկների խոսքերով՝ վիրավորների մեծ մասի վիճակը բավարար է, մի քանիսինը՝ միջին ծանրության: Հիվանդների մեծ մասի մոտ գրանցվել են վերջույթների կոտրվածքներ և ուղեղի ցնցում:

ԶԼՄ-ների հաղորդմամբ՝ մետրոյի այդ կայարանում վերանորոգումն ավարտվել էր չորս ամիս առաջ՝ 2017 թվականի սեպտեմբերին:

«Վարկետիլին» Թբիլիսիի մետրոպոլիտենի հիմնական ճյուղի վերջին կայարանն է: Այն գտնվում է հարավ-արևելքում և սպասարկում է մայրաքաղաքի ծայրամասի անմիջապես մի քանի խոշոր միկրոթաղամաս: