«Հուսով եմ՝ կգամ մի օր Լեռնային Ղարաբաղ, երբ ամեն ինչ կարգավորված կլինի». Մակրոնը մասնակցել է հայկական համայնքի ամենամյա ընթրիքին (լուսանկարներ, տեսանյութ)

Ֆրանսիայի նախագահ Էմանուել Մակրոնը երեքշաբթի երեկոյան Ֆրանսիայի հայկական կազմակերպությունների համակարգող խորհրդի (CCAF) ամենամյա ընթրիքի ժամանակ խոստացել է օրացույցում Հայոց ցեղասպանության հիշատակման օր ավելացնել՝ կատարելով իր նախընտրական խոստումը, հայտնում է Le Figaro-ն:

Ֆրանսիայի նախագահը կազմակերպված ընթրիքի պատվավոր հյուրն էր: Փարիզի հյուրանոցներից մեկում անցկացված միջոցառմանը մասնակցել է հայ համայնքի մոտ 500 ներկայացուցիչ:

Միջոցառմանը ներկա են եղել նաև Փարիզի քաղաքապետ Ան Հիդալգոն, Իլ դը Ֆրանս երկրամասի ղեկավար Վալերի Պեկրեսը, հայկական ծագմամբ ֆրանսիացի պաշտոնյաներ, այդ թվում՝ Պատրիկ Դևեջյանը և Լիոնի քաղաքապետ Ժորժ Քեփենեկյանը, Թուրքիայի խորհրդարանի հայկական ծագմամբ պատգամավոր Կարո Փայլանը, ինչպես նաև հրեական համայնքի ներկայացուցիչներ:

«Արդարության և ճանաչման համար պայքարը մեր պայքարն է: Մենք տանում ենք այդ պայքարը՝ հիշելով և հանրապետության օրացույցում ցեղասպանության հիշատակման օր ավելացնելով»,- հայտարարել է Ֆրանսիայի նախագահը՝ հավելելով, որ կարևոր է, որ երկրի օրենսդիրներն այդ հարցին անդրադառնան առաջիկա ամիսներին:

Միջոցառման ժամանակ CCAF-ի համանախագահներ Արա Թորանյանը և Մուրադ Փափազյանը կոչ են արել Էմանուել Մակրոնին դատապարտել Թուրքիային, որը սպառնում է փոքրամասնություններին, այդ թվում՝ հայերին: Նրանք նաև կոչ են արել Ֆրանսիայի նախագահին այցելել Արցախ:

Մակրոնը, խոսելով Թուրքիայի մասին, նշել է, որ Թուրքիայի նախագահ Ռեջեփ Թայիփ Էրդողանի հետ կանոնավոր երկխոսության մեջ է, և այդ երկխոսությունն արդյունքներ է տվել, ինչպես լրագրողների ազատ արձակումը: Նա հավելել է, որ ահաբեկչության և միգրացիոն ճգնաժամի հարցերում Ֆրանսիային անհրաժեշտ են դաշնակիցներ, «ներառյալ՝ այնպիսի դաշնակիցներ, որոնք չեն կիսում մեր արժեքները»:

Մակրոնը նաև ջերմորեն ողջունել է Կարո Փայլանին՝ հիշատակելով անհավասար պայմանները, որոնցում վերջինս բարձրացնում է իր ձայնը, և նշելով, որ դա շատ ավելի կարևոր է, քան ամպագոռգոռ հայտարարությունները:

Մակրոնը, սակայն, պաշտպանել է Էրդողանի հետ իր քաղաքական երկխոսությունը և Լեռնային Ղարաբաղի հարցում Ֆրանսիայի չեզոքությունը:

«Ես ձեզ չեմ ուղեկցի Լեռնային Ղարաբաղ այցի ընթացքում, քանի որ Ֆրանսիան կկորցնի իր դերն այս հակամարտությունում և չի կարողանա միջնորդ և լսելի լինել երկու կողմերի համար»,- ասել է նա:

«Հուսով եմ՝ կգամ ձեզ հետ մի օր, երբ ամեն ինչ կարգավորված կլինի»,- եզրափակել է Մակրոնը:

LIVE | Discours du Président de la République @EmmanuelMacron devant le Conseil de Coordination des Organisations Arméniennes de France (CCAF) #DinerCCAF2018. https://t.co/fiJpcbYsU1

— Élysée (@Elysee) January 30, 2018